އީރާނާއެކު ހަނގުރާމައެއް ފައްޓަން ބޭނުންނުވާކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

އެމެރިކާއިން ދިން ހަމަލާއެއްގައި އީރާންގެ ސަލާމަތީ ބާރުތަކުގެ އިސްވެރިޔާ ގާސިމް ސުލައިމާނީ އަވަހާރަ ކޮށްލާފައިވާއިރު، މި ހަމަލާ ދީފައިވަނީ ޓްރަމްޕުގެ އޯޑަރަކަށް ކަމަށް މީޑީއާތަކުގައި ރިޕޯރޓް ކޮށްފައިވެއެވެ.

އެކަމާ ގުޅޭގޮތުން ޓްރަމްޕް ވިދާޅުވީ، ސުލައިމާނީ ގެންދެވީ އެމެރިކާއާއި ދެކޮޅަށް ހަނގުރާމަވެރި ރޭވުންތަކެއް ރާވަމުން ކަމަށާއި، ސުލައިމާނީ މަރާލުމަކީ މާ ކުރިންވެސް ކުރަން ޖެހިފައި އޮތް ކަމެއް ކަމަށެވެ.

ނަމަވެސް އެމެރިކާއިން އެ ހަމަލާ ދިނީ ހަނގުރާމައެއް ފެށުމުގެ ނިޔަތުގައެއް ނޫން ކަމަށާއި، އެއީ ހަނގުރާމައެއް ހުއްޓުވުމަށް ދިން ހަމަލާއެއްގެ ކަމަށް ޓްރަމްޕް ވަނީ ސިފަ ކުރައްވާފައެވެ.

އެމެރިކާއިން ދިން ހަމަލާއެއްގައި ސުލައިމާނީ އަވަހާރަވެފައިވާއިރު، އެކަމުގެ ބަދަލު ހިފާނެ ކަމަށް އީރާނުގެ ސަރުކާރުން ވަނީ ވައުދުވެފައެވެ. އަދި އެކަމުގެ ސަބަބުން މެދުއިރުމަތީގައި ހަނގުރާމައެއް އުފެދިދާނެކަމުގެ ބިރު ހީވެފައިވާކަމަށް ބައިނަލްއަޤުވާމީ މަޝްރަހު ދިރާސާ ކުރާ ފަރާތްތަކުން ދަނީ ބުނަމުންނެވެ.

އެގޮތުން އީރާނުގެ ނޭޝަނަލް ސެކިއުރިޓީ ކައުންސިލުން ތެހްރާންގައި ބައްދަލުވުންތައް ބާއްވަމުން ގެންދާއިރު، މި ބައްދަލުވުންތަކުގައި އީރާނުގެ ލީޑަރު އާޔަތުއްﷲ ހާމަނާއީ އަމިއްލަފުޅަށް ބައިވެރިވެ ވަޑައިގެންފައިވެއެވެ.

ރިޕޯރޓްތައް ބުނާގޮތުން އީރާނުން ބަދަލު ހިފުމުގެ ގޮތުން އިރާޤާއި، ސީރިއާގައި ހުންނަ އެމެރިކާގެ އަސްކަރީ ބޭސްތަކަށް ހަމަލާ ދިނުމާއި، ޖޯޑަންއާއި އިޒްރޭލުގެ ބެލުމުގެ ދަށުގައިވާ ގޯލަން ހައިޓްސްއާއި، ހޮރްމޫޒު ކަނޑުއޮޅީގައި ހުރި ޓޭންކަރުތަކުގެ އިތުރުން ސައުދީއަރަބިއާގެ ތެޔޮ ފެކްޓަރީތަކަށް ހަމަލާދިނުން އެކަށީގެންވެއެވެ.

އެގޮތުން މި ހަމަލާތައް ފަށައިފިނަމަ ނިއުކްލިއަރ ބޮޑެތި ބާރުތައް ކަމަށްވާ ޗައިނާއާއި، އިޒްރޭލްއާއި ރަޝިއާވެސް މި ހަނގުރާމައިގެ ތެރެއަށް ވަނުމުގެ ފުރުސަތު އެބައޮތް ކަމަށާއި، އޭގެ އިތުރުން ހަމަލާތަކުހެ ނުސީދާ އަސަރުކޮށްގެން ޔޫރަޕްގެ ޤައުމުތަކުންވެސް މިކަމުގެ ތެރެއަށް ވަނުން އެކަށީގެންވާކަމަށް މަޝްރަހު ދިރާސާކުރާ ފަރާތްތަކުން ބުނެއެވެ.

އެމެރިކާއިން ދިން ހަމަލާ އާއި ގުޅިގެން ދުނިޔޭގައި ބޮޑު ހަނގުރާމައެއް ފެށިދާނެ ކަމުގެ ބިރު ބޮޑުވެފައިވާއިރު، މި ހަމަލާއަކީ ސީދާ ޓްރަމްޕްގެ އޯޑަރަށް ދިން ހަމަލާއެއް ކަމަށް ރިޕޯރޓްތައް ބުނެއެވެ.

އެކަމާ ގުޅިގެން ހަމަނުޖެހުންތައް އިތުރުވެފައި ވަނިކޮށް އެމެރިކާއިން މެދުއިރުމަތީގެ ޤައުމުތަކަށް އިތުރު ސިފައިން ފޮނުވައި، ލަޝްކަރުތައް ވަރުގަދަ ކުރަމުންދާކަމަށް އެމެރިކާގެ އަސްކަރިއްޔާގެ އޮފިޝަލަކާއި ހަވާލާދީ މީޑިއާތަކުގައި ރިޕޯރޓްކޮށްފައިވެއެވެ. އެގޮތުން އެމެރިކާއިން މެދުއިރުމައްޗަށް 3500 ސިފައިން ފޮނުވުމަށް ނިންމާފައިވާއިރު، އިރާޤާއި ކުވެއިތުގައި އެމެރިކާގެ ފައުޖު ވަރުގަދަ ކުރުމުގެ މަސައްކަތް މިހާރު ފަށާފައިވާކަމަށް ރިޕޯރޓްތައް ބުނެއެވެ.