އޮޑިޓަކީ ނަމަކަށް ހެދި އެއްޗެއް ނޫން، އަޅަންޖެހޭ ފިޔަވަޅުތައް އަޅާނެ: މިނިސްޓަރު އަލީ ވަހީދު
މިފެށުނު އައު އަހަރުގެ މެއި މަހުގެ އެއްވަނަ ދުވަހުން ފެށިގެން ހެޔޮ ބަދަލުތަކެއް އަންނާނެ
ޓޫރިޒަމް މިނިސްޓަރު އަލީ ވަހީދު
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހުގެ ސަރުކާރުން ފަތުރުވެރިކަމުގެ ދާއިރާއިން ހެދި އޮޑިޓް އެއީ ނަމަކަށް ހެދި އެއްޗެއް ނޫންކަމަށާއި، އޮޑިޓާ ގުޅިގެން އަޅަންޖެހޭ ފިޔަވަޅުތައް އަޅާނެ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.
އައު އަހަރާއެކު، ރާއްޖެއަށް ފުރަތަމަ އައި ފަތުރުވެރިޔާއަށް މަރުޙަބާ ދެންނެވުމަށް ވެލާނާ އިންޓަރނޭޝަނަލް އެއަރޕޯޓުގައި ބޭއްވި ޚާއްޞަ ރަސްމިއްޔާތުގައި ނޫސްވެރިންނާ ބައްދަލުކުރައްވާ މިނިސްޓަރު އަލީ ވަހީދު ވިދާޅުވީ، ފަތުރުވެރިކަމުގެ ދާއިރާގައި މަސައްކަތް ކުރާ ފަރާތްތަކުގެ ޙައްޤުތައް ރައްކާތެރި ކުރުމަށް މަސައްކަތްތަކެއް ކުރެވެމުންދާ ކަމަށެވެ.
އަލީ ވަހީދު ވިދާޅުވީ މިނިމަމް ވޭޖު (ދެވޭނެ އެންމެކުޑަ މުސާރަ ކަނޑައެޅުން)އަކީ ސަރުކާރުގެ ވަޢުދެއް ކަމަށެވެ. އަދި މިނިމަމް ވޭޖްވެސް ހަމަ ސަރުކާރުން ވަޢުދުވި ގޮތަށް އަންނާނެ ކަމަށްވެސް އަލީ ވަހީދު ވިދާޅުވިއެވެ.
މީގެ އިތުރުން އަލީ ވަހީދު ވިދާޅުވީ، މިފެށުނު އައު އަހަރުގެ މެއި މަހުގެ އެއްވަނަ ދުވަހުގެ ކުރިން ފަތުރުވެރިކަމުގެ ދާއިރާ އިތުރަށް ހަރުދަނާ ކުރުމަށް ހަދަންޖެހޭ ޤަވާއިދުތަކާއި މިހާރު ފަތުރުވެރިކަމުގެ ދާއިރާގައި ހުރި މައްސަލަތައް ޙައްލުކުރެވިގެންދާނެ ކަމަށެވެ.
ސަރވިސް ޗާރޖަށް ދެނީ އެންމެ 11 ޑޮލަރު ކަމަށް ބުނުމުން ހޮނޑާފުށި އައިލެންޑް ރިސޯޓުގެ މުވައްޒަފެއް ކަމަށްވާ ތ. ގުރައިދުއަށް ނިޞްބަތްވާ އަޙްމަދު ޝިމްހާޒު ވަޒީފާއިން ކަނޑާލުމާއި ގުޅިގެން ގިނަ ބަޔަކު ގެންދަނީ ސޯޝަލް މީޑިއާގައި ޝިމްހާޒުގެ ދިފާޢުގަ ވާހަކަ ދައްކަމުންނެވެ.
ޓޫރިޒަމް މިނިސްޓަރު އަލީ ވަހީދު ވެސް ވަނީ ޝިމްހާޒާ ބައްދަލުކުރައްވާފަ އެވެ. އަދި ޓޫރިޒަމް އެސޯސިއޭޝަން އޮފް މޯލްޑިވްސް (ޓީމް)އިން ވެސް ޝިމްހާޒުގެ މައްސަލަ ދަނީ ގާތުން ބަލަމުން ނެވެ.
