އަނިޔާގެ ސަބަބުން ޗެލްސީގައި މުހިތް ރޯލެއް އަދާކުރަމުން އަންނަ ބެލްޖިއަމްގެ ކެޕްޓަން އެޑެން ހަޒާޑްއަށް ދެ ހަފްތާއެއްހާ ދުވަހަށް ކުޅުމާއި ދުރަށްދާންޖެހިއްޖެއެވެ.

ހަޒާޑްއަށް މި ދިމާވި އަނިޔާގެ މައްސަލައާއި ގުޅިގެން ބެލްޖިއަމް އިން ގްރީސްއާ ދެކޮޅަށް ކުޅޭ މެޗާއި ޗެލްސީން ކްރިސްޓަލް ޕެލަސްއާ ދެކޮޅަށް ކުޅޭ މެޗުގައި ނުކުޅެވޭނެއެވެ.

ބެލްޖިއަމްގެ ގައުމީ ޓީމުގެ ކޯޗު ރޮބާޓޯ މާޓިނޭޒް ބުނި ގޮތުގައި ހަޒާޑް އަނިޔާއިން ރަނގަޅުވެ އެނބުރި ކުޅުމުގެ ތެރެއަށް އަންނަން 15-10 ދުވަހުގެ މުއްދަތެއް ނަގާނެއެވެ.

އެހެން ކަމުން އަންނަ އޭޕްރިލް މަހުގެ އެއްވަނަ ދުވަހު ކްރިސްޓަލް ޕެލަސްއާ ދެކޮޅަށް ކުޅޭ މެޗުގައި ހަޒާޑްއެއް ނުފެންނާނެއެވެ.

ހަޒާޑްއަށް އަނިޔާވެފައިވަނީ ސްޓޯކް ސިޓީއާއި ދެކޮޅަށް ޗެލްސީން ކުޅުނު މެޗަށް ފަރިތަކުރަމުން ދަނިކޮށެވެ. އެ މެޗުގައި ވެސް އޭނާ ކުޅެފައެއް ނުވެއެވެ.

ޕްރެކްޓިސް ތެރޭގައި ފައިގެ ކުޑަކަޅުވާ މަސްގަނޑަށް ލިބުނު ގެއްލުމުގެ ސަބަބުން އަންނަ ހޮނިހިރު ދުވަހު ވޯލްޑްކަޕް ކޮލިފައިންގައި ގްރީސްއާ ދެކޮޅަށް ބެލްޖިއަމް ކުޅޭ މެޗުގައިވެސް ބައިވެރިވުމުގެ ފުރުސަތު ވަނީ ހަޒާޑްއަށް ގެއްލިފައެވެ.

ސައްބީސް އަހަރުގެ ބެލްޖިއަމް ޤައުމީޓީމުގެ ކެޕްޓަން ހަޒާޑަށް ވޯލްޑްކަޕް ކޮލިފައިން މެޗުގައި ނުކުޅެވުމުގެ އިތުރުން ރަޝިއާ އާ ދެކޮޅަށް އަންގާރަ ދުވަހު ކުޅޭ އެކުވެރިކަމުގެ މެޗުގައި ވެސް ނުކުޅެވޭނެއެވެ.

ބެލްޖިއަމްގެ ކޯޗު ބުނެފައިވަނީ ހަޒާޑް މިވަގުތު ކުރިއަށް ގެންދާނީ ގައުމީޓީމާއި ޗެލްސީގެ މެޑިކަލް ޓީމާއެކު ލިބިފައިވާ އަނިޔާއަށް ފަރުވާ ހޯދުމުގެ މަސައްކަތް ކަމަށެވެ.

ހަޒާޑް ނެތި ގްރީސްއާ ދެކޮޅަށް ނުކުންނަން ޖެހުމަކީ ވަރަށް ބޮޑު ނުތަނަވަސް ކަމެއް ކަމަށް މާޓިނޭޒް ބުންޏެވެ. އަދި މިއީ ބެލްޖިއަމްއަށް ކުރިމަތިވާ އިމްތިހާނެއް ކަމަށްވެސް އޭނާ ވަނީ ބުނެފައެވެ.