ސަންޗޭޒް އަށް އަނިޔާގެ މައްސަލަ ކުރިމަތިވެ ދެ ހަފްތާއަށް ކުޅުމާއި ދުރަށްދާން ޖެހިއްޖެ.

މިދިޔަ ހަފްތާގެ އާދިއްތަ ދުވަހު ބޭއްވި ޓްރެއިނިންތަކުގައި ބަނޑުގެ މަސްގަނޑަށް ލިބުނު އަނިޔާއަކާއި ގުޅިގެން އާސެނަލްގެ އިތުބާރު ފޯވާޑް އެލެކްސިސް ސަންޖޭޒް މަދުވެގެން ދެ ހަފްތާއަށް ކުޅުމާއި ދުރުގައި ހުންނަން ޖެހިއްޖެއެވެ.

މިކަން ކަށަވަރު ކޮށްދެމުން އާސެނަލް ކޯޗު އާސެން ވެންގާ ބުނީ ސަންޗޭޒް އަށް ލިބިފައިވާ އަނިޔާ ސީރިއަސް ނޫން ނަމަވެސް އޭނާ އަށް ކުރިޔަށް އޮތް ދެހަފްތާ ކުޅުމާއި ދުރުގައި ހުންންނަޖެހޭނެ ކަމަށެވެ.

ނޫސްވެރިންނަށް މައުލޫމާތު ދެމުން އާސެނަލްގެ ކޯޗު އާސެން ވެންގާ ބުނީ ސަންޗޭޒް އަށް އަނިޔާވެފައިވަނީ މި ހަފްތާ އާދިއްތަ ދުވަހު ކުރިޔަށް ގެންދިޔަ ފަރިތަކުރުންތަކުގައި ކަމަށާއި އެހެން ކަމުން އަންނަ ހުކުރު ދުވަހު ލީގު ފަށާމެޗުގެ އިތުރުން އަންނަ ހަފްތާގައި ސްޓޯކް ސިޓީއާ ދެކޮޅަށް ކުޅޭ މެޗުގައި ސްންޗޭޒް އަށް ކުޅެވޭނެ ކަމަމާއި މެދު ސައްކު ކަމަށެވެ.

ވެންގާ ބުނީ މީގެ ދެދުވަސް ކުރިން ބަނޑުގެ ސްކޭން އެއްވެސް ހަދާފައިވާ ކަމަށާއި އެ ސްކޭންއިން ދައްކާގޮތުގައި އޭނާއަށް ކުޅުމުގެ ތެރެއަށް އަވަހަކަށް ނާދެވޭނެ ކަމަށެވެ. އެގޮތުން ދެ ހަފްތާއަށް ވުރެ ގިނަ ވުންވެސް އެކަށީގެން ވާކަމަށް ވެންގާ ބުންޏެވެ.

ވެންގާ ބުނީ ސަންޗޭޒް އަށް އަނިޔާގެ މައްސަލަ ކުރިމަތިވުމަކީ ޓީމަށް ލިބިގެންދިޔަ ދެރައެއް ކަމަށާއި ސަންޗޭސް ނެތްތަން ފޫބައްދަން އުނދަގޫތަކާއި ކުރިމަތިލާން ޖެހޭނެ ކަމަށެވެ.

" ސަންޗޭޒް އަށް ވަނީ ޓްރެއިނިން ހެދުމުގެ ތެރޭ އަނިޔާވެފައި. އޭނާ މަދުވެގެން ދެހަފްތާއަށް ކުޅުމާއި ދުރުގައި ހުންނަންޖެހޭނެ. މީ އަހަރުމެންނަށް ލިބުނު ހިތާމައެއް. މިއީ ފޫބައްދަން އުނދަގޫ މައްސަލައެއް." ވެންގާ ބުންޏެވެ.

ސަންޗޭޒްގެ އިތުރުން ކެޕްޓަން މަޓަސަކާ ، މެސުޓް އޮޒިލް، އާރޮން ރަމްސޭ އަށް އަނިޔާގެ ސަބަބުން ނުކުޅެވޭއިރު ސަސްޕެންސަނުގެ ސަބަބުން ފަހަތުގައި މުހިންމު ދައުރެއް އަދާކުރާ ލައުރެން ކޮސައިންލީ އައްވެސް ނުކުޅެވޭނެއެވެ.

އިނގިރޭސި ޕްރިމިއާ ލީގު އަންނަ ހުކުރު ދުވަހު ފެށޭއިރު ލީގު ހުޅުވާ މެޗުގައި ބައްދަލު ކުރާނީ އާސެނަލް އާއި ލެސްޓާ ސިޓީއެވެ. މި މެޗު ފަށާނީ ހުކުރު ދުވަހުގެ ރޭ ރާއްޖޭ ގަޑިން 11:45 ގައެވެ.