ވެލެންސިއާއަށް ފެށުނީއްސުރެ ދިމާވާ ހަމައެކަނި މައްސަލަ އަކީ ގޯލެއް ސްކޯކޮށް ނުލެވުން ކަމަށާއި، ލިބޭ ފުރުސަތުތަކުގެ ބޭނުން ހިފޭނަމަ މި މައްސަލަ ދިމާ ނުވާނެ ކަމަށް ވެލެންސިއާގެ ކޯޗް އަހްމަދު މުޖުތަބާ (ފެސްކޯ) ބުނެފިއެވެ.

އެސްޓީއޯ މާލެ ލީގުގެ ދެވަނަ ބުރުގައި ނިއުރޭޑިއަންޓް އަތުން ބަލިވި މެޗައްފަހު ނޫސްވެރިންނާ ވާހަކަ ދައްކަމުން ފެސްކޯ ބުނެފައިވަނީ، މެޗުގައި ވެލެންސިއާއަށް ލިބުނު ފުރުސަތުތަކުގެ ބޭނުން ހިފުނު ނަމަ ނަތީޖާ ބަދަލު ކޮށްލުމަށް ފުރުސަތު ލިބުނު ކަމަށާއި، ނަމަވެސް މެޗު ނިމިގެންދިޔައީ އުންމީދުކުރި ގޮތާ ހިލާފަށް ކަމަށެވެ. މެޗުގައި ނިއުގެ ފަރާތުން ވަގުތު ދުއްވަން ކޮންމެވެސް ވަރަކަށް މަސައްކަތް ކޮށްފައި ވާކަމަށްވެސް ފެސްކޯ ވަނީ ބުނެފައެވެ. ފެސްކޯ ބުނީ އެގޮތަށް ކަންތައް ނުކޮށް ރީތި ފުޓުބޯޅައެއް ކުޅޭނަމަ ކުޅިބެލުންތެރުންގެ ޝައުގުވެރިކަން އިތުރުވެގެން ދާނެކަމަށެވެ.

ފެސްކޯ ބުނީ ޖުމްލަ ގޮތެއްގައި ވެލެންސިއާގެ ކުޅުމާއިމެދު ހިތްހަމަ ޖެހޭ ކަމަށާއި، ނަމަވެސް މެޗުގައި ވަތް ހަމައެކަނި ލަނޑު ވަނީ ޑިފެންސް ލައިނުން ހެދި ބޮޑު ގޯހެއްގެ ސަބަބުން ކަމަށެވެ. ފެސްކޯ ބުނީ އެއީ ޑިފެންޑަރަކަށް ހެދޭނެ އެންމެ ބޮޑު އެއް ގޯސް ކަމަށާއި، ނަމަވެސް އެއްވެސް މީހަކު ގަސްތުގައި އެވަރުގެ ގޯހެއް ހަދައިފާނެ ކަމަށް ގަބޫލު ނުކުރާ ކަމަށެވެ. އެގޮތުން މެޗު ކުޅެން ޖެހުނީ ވިއްސާރާގައި ކަމުން ޑިފެންޑަރަށް އުނދަގޫތަކާއި ކުރިމަތި ވާނެ ކަމަށްވެސް ފެސްކޯ ވަނީ ބުނެފައެވެ.

އިތުރަށް ވާހަކަ ދައްކަމުން ފެސްކޯ ބުނީ، ދެވަނަ ބުރުގެ ފުރަތަމަ މެޗުންވެސް ނާކާމިޔާބީއާއި ކުރިމަތިލާން ޖެހުމުން، މިހާރު ވިސްނުން ބަދަލުކުރަން ޖެހިއްޖެ ކަމަށެވެ. އެގޮތުން މިހާރު ޓީމު އޮތް ހާލަތަށް ބަލާނަމަ ގަދަ 4 އިން ފުރުސަތު ހޯދޭނެ ކަމަށް ގަބޫލު ނުކުރާ ކަމަށާއި އެހެންކަމުން މަޑުމަޑުން ވިސްނުން ބަދަލުކުރާނެ ކަމަށްވެސް ފެސްކޯ ބުންޏެވެ.

މާލެ ލީގުގައި ވެލެންސިއާ އޮތީ ކުޅުނު 8 މެޗުން ލިބުނު 1 ޕޮއިންޓާއެކު ތާވަލުގެ އެންމެ ފުލުގައެވެ.