މި ސީޒަނަށްފަހު ހަޒާޑް އަދި ކޯސްޓާ ޗެލްސީ ދޫކޮށްލަނީ!

މި ސީޒަނަށްފަހު ޗެލްސީއަށް ކުޅެމުން އަންނަ ބެލްޖިއަމްގެ ވިންގާ އެޑެން ހަޒާޑް އަދި ސްޕެއިންގެ ސްޓްރައިކަރު ޑިއެގޯ ކޯސްޓާ އެ ކްލަބް ދޫކޮށްލަން އުޅޭ ކަމަށް ރިޕޯޓްތައް ބުނެފި އެވެ.

މަޝްހޫރު ކުޅިވަރު ނޫހެއްކަމަށްވާ ދަ ސަން އިން ބުނީ މި ސީޒަނަށްފަހު ކޯސްޓާ އަދި ހަޒާޑް ޗެލްސީ ދޫކޮށްލަން ނިންމާފައިވާ ކަމަށާއި، އެގޮތުން އެ ދެ ކުޅުންތެރިން ހޯދުމަށް ކްލަބްތަކުން މަސައްކަތްކުރަމުން އަންނަ ކަމަށެވެ.

ދާދި ފަހުން ނޫސްވެރިންނަށް މައުލޫމާތު ދެމުން ކޯސްޓާ ބުނީ ޗެލްސީގެ ކޯޗު އެންޓޯނިއޯ ކޮންޓޭ އަށް އޭނާގެ ބޭނުން ނުހިފޭނެކަމަށް ބުނެފައިވާ ކަމަށާއި، އެގޮތުން އޭނާގެ ކުރިމަގަށް ގޮތެއް ނިންމުމަށް ޗެލްސީގެ ބޯޑަށް ހުށަހަޅާފައިވާނެ ކަމަށެވެ.

ކްލަބުން ތައްޔާރުކުރަމުން އަންނަކަމަށްވެސް ރިޕޯޓްތައް ބުނެއެވެ.

މިދިޔަ ޖެނުއަރީ ޓްރާންސްފާގަވެސް ޗައިނީޒް ސުޕާ ލީގުގެ ކްލަބްތަކުން ކޯސްޓާ ހޯދުމަށް މަސައްކަތްކޮށްފައިވާއިރު، އޭނާ ވަނީ އެ ހުށަހެޅުންތައް ރިޖެކްޓްކޮށްފައެވެ. ޗައިނާ ކްލަބްތަކުގެ އިތުރުން ޔޫރަޕްގެވެސް ގިނަ ކްލަބްތަކުން އަންނަނީ ކޯސްޓާއަށް ފާރަލަމުންނެވެ.

އެޓްލެޓިކޯ މެޑްރިޑް ދޫކޮށްލުމަށްފަހު 2014 ވަނަ އަހަރު ޗެލްސީއާ ގުޅުނު ކޯސްޓާ ވަނީ މިވީތަނަށް އެޓީމަށް ކުޅުނު 119 މެޗުގައި 58 ލަނޑު ކާމިޔާބުކޮށް، އެޓީމާއެކު ޕްރިމިއާ ލީގު ދެފަހަރު އަދި ލީގް ކަޕް އެއްފަހަރު ކާމިޔާބުކޮށްފައެވެ.

އެހެންނަމަވެސް ޗެލްސީ ދޫކޮށްލާނެ ކަމުގެ އެއްވެސް އިޝާރާތެއް ހަޒާޑް ދީފައެއްނުވެއެވެ. ރިޕޯޓްތައް ބުނާގޮތުން ރެއާލް މެޑްރިޑުން އަންނަނީ ހަޒާޑް ހޯދުމަށް މަސައްކަތްކުރަމުންނެވެ. އެގޮތުން 100 މިލިއަން ޕައުންޑުގެ އަގުހުރި ބިޑެއްވެސް އެ ކްލަބުން ތައްޔާރުކުރަމުން އަންނަ ކަމަށްވެސް ރިޕޯޓްތައް ބުނެއެވެ.

ފްރާންސްގެ ލިއްލޭ އިން 2007 ވަނަ އަހަރު ކެރިޔަރު ފެށި އުމުރުން 26 އަހަރުގެ ހަޒާޑް ޗެލްސީ އަށް ބަދަލުވީ 2012 ވަނަ އަހަރެވެ. އެގޮތުން އޭނާ ވަނީ މިވީތަނަށް އެޓީމަށް ކުޅުނު 248 މެޗުގައި 72 ލަނޑު އެޓީމަށް ކާމިޔާބުކޮށްދީފައެވެ.

މީގެއިތުރުން ބެލްޖިއަމް ގައުމީ ޓީމުގެ ކެޕްޓަންކަންވެސް އަދާކުރަމުން އޭނާ ވަނީ އެޓީމަށް ކުޅުނު 76 މެޗުގައި 17 ލަނޑު ކާމިޔާބުކޮށްދީ ނިމިގެންދިޔަ ޔޫރޯ ފުޓުބޯޅަ މުބާރާތަށް އެޓީމު ކޮލިފައިކޮށްދިނުމުގެ އިތުރުން މުބާރާތުގެ ސެމީ އަށް އެޓީމުގެ ގެންގޮސްދިނުމަށް މުހިންމު ދައުރެއް އަދާކޮށްފައެވެ.