ހަޒާޑް ފައިގަ ރެނދެއްލާ ޗެކް ރިޕަބްލިކް އަދި އެސްޓޯނިއާ މެޗު ގެއްލިއްޖެ

ޗެލްސީއަށް ކުޅެމުން އަންނަ ބެލްޖިއަމްގެ ކެޕްޓަން އެޑެން ހަޒާޑް ފައި ފްރެކްޗާވެ ލިބުނު އަނިޔާއާއެކު އޭނާ އަށް ޗެކް ރިޕަބްލިކް އަދި އެސްޓޯނިއާއާ ދެކޮޅަށް ބެލްޖިއަމް ކުޅޭ މެޗު ގެއްލިއްޖެ އެވެ.

ބެލްޖިއަމްގެ ފަރިތަކުރުންތަކުގައި ބައިވަރިވަމުން ދަނިކޮށް ހަޒާޑް ފަޔަށް ލިބުނު މި އަނިޔާއާއެކު އޭނާއަށް ޗެކް ރިޕަބްލިކްއާ ދެކޮޅަށް ބެލްޖިއަމް ކުޅޭ ރަހްމަތްތެރިކަމުގެ މެޗުގެ އިތުރުން ވޯލްޑްކަޕް ކޮލިފައިންގައި އެސްޓޯނިއާއާ ދެކޮޅަށް ބެލްޖިއަމް ކުޅޭ މެޗުގައި ނުކުޅެވޭނެކަން މިހާރު ވަނީ ކަށަވަރުވެފައެވެ.

ބެލްޖިއަމް ގައުމީ ޓީމުގެ ރަސްމީ ޓުވިޓާ އެކައުންޓުން ކުރި ޓުވީޓެއްގައި ބުނީ ހަޒާޑްގެ ފައި ފްރެކްޗާވެފައިވާ ކަމަށާއި، މެޑިކަލް ޓީމުން މިހާރު ޓެސްޓުތަކެއް ހަދަމުން އަންނަ ކަމަށެވެ. އެގޮތުން ހަޒާޑްއަށް ލިބުނު އަނިޔާގެ ތަފްސީލް ކުރިޔަށް އޮތް 48 ގަޑިއިރު ތެރޭގައި އާންމުކުރާނެކަމަށްވެސް ބެލްޖިއަމް ގައުމީ ޓީމުން ބުނެއެވެ.

މި ސީޒަނުގައި ޗެލްސީގައި މޮޅު ކުޅުމެއް ދައްކާފައިވާ ހަޒާޑް އަށް ލިބުނު މި އަނިޔާގެ ސަބަބުން އޭނާ ކުޅުމާ ދުރުގައި ހުންނަން ޖެހޭ މުއްދަތު ކަށަވަވަރު ނުވާއިރު، ދިގު މުއްދަތަކަށް އޭނާ ކުޅުމާ ދުރުގައި ހުންނަން ޖެހޭނެ ކަމަށް ރިޕޯޓްތައް އަންނަނީ ބުނަމުންނެވެ.

ކޮލިފައިންގައި ބެލްޖިއަމް ހިމެނޭ ގްރޫޕަށް ބަލާއިރު، އެޓީމު ވަނީ ކުޅުނު ފަސް މެޗުން 13 ޕޮއިންޓް އެއްކޮށް ގްރޫޕްގެ އެއްވަނަ ހޯދާފައެވެ. އެޓީމާ އެންމެ ކައިރިން ވާދަކުރަނީ 11 ޕޮއިންޓާއެކު އޮތް ގްރީސް އެވެ. ތިންވަނައިގައި އޮތީ 10 ޕޮއިންޓާއެކު ބޮސްނިއާއެވެ. ބެލްޖިއަމް ވަނީ މިދިޔަ ނޮވެމްބަރު މަހު އެސްޓޯނިއާއާ ދެކޮޅަށް ކުޅުނު މެޗު 1-8 ގެ ނަތީޖާއިން ބްރަސެލްސްގައި ކާމިޔާބުކޮށްފައެވެ.