މާލޭގެ ވިޔަފާރި ބަނދަރުގެ ވަޞީލަތްތަކާއި ޖާގައިގެ ދަތިކަމުގެ ސަބަބުން ސަލާމަތީ ބައެއް މިންގަނޑުތައް ތަންފީޒު ނުކުރެވޭ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ ޝާހިދު ޢަލީ ވިދާޅުވެއްޖެއެވެ.

މާލޭ ވިޔަފާރި ބަނދަރުގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން އެމްޕީއެލުން ކުރިޔަށް ގެންދިޔަ "ސޭފްޓީ ވީކް" ޙަރަކާތް ނިންމުމުގެ ރަސްމިއްޔާތުގަ ވާހަކަ ދައްކަވަމުން ޝާހިދު ވިދާޅުވީ، ޖާގައިގެ ގޮތުން ކުޑަ ބަނަދަރު ކުޑަ ނަމަވެސް، ސަލާމަތާއި ރައްކާތެރި ކަމައް އެކަށައަޅާފައިވާ މިންގަނޑުތަކާއި އެއްގޮތައް ޢަމަލުކޮށް، އެއާއި އެގޮތަށް މަސައްކަތް ބައްޓަން ކުރަން ޖެހޭ ކަމަށެވެ.

އޭނާ ވިދާޅުވީ، ބަނދަރުގެ ވަޞީލަތްތަކާއި، ޖާގައިގެ ދަތިކަން ހުރިގޮތުން ސަލާމަތީ މިންގަނޑުތަކާއި އެއްގޮތައް ޢަމަލު ނުކުރެވޭ ކަމަށެވެ. އެކަމަކު އެކަން ޙުއްޖަތަކަށް ނަގައިގެން ސަލާމަތާއި ރައްކާތެރިކަން ދޫކޮށްލައިގެން ނުވާނެ ކަމަށް ވިދާޅުވިއެވެ.

އެމްޕީއެލްގެ ޢަމާޒަކީ މުވައްޒަފުން ހިމެނޭ ގޮތަށް ޕޯޓުގެ ޚިދުމަތް ލިބޭ ހުރިހާ ފަރާތްތަކުން ސަލާމަތާއި ރައްކާތެރިކަމަށް އަހުލުވެރިވެ އަދި އެކަމަށް ހޭލުންތެރިވެ އެކްސިޑެންޓު ނުހިނގާ ގޮތަށް ޕޯޓުގެ މަސައްކަތް ބައްޓަން ކުރުން ކަމަށެވެ.

ޝާހިދު ވިދާޅުވީ، ''ސޭފްޓީ ވީކް'' އަކީ އެ ކުންފުނީގެ އެތެރޭގެ ޕޯޓްގެ ސަލާމަތާއި ރައްކާތެރިކަން ހަރުދަނާ ކުރުމަށް އެޅިގެންދިޔަ ވަރަށް މުހިންމު ފިޔަވަޅެއް ކަމަށެވެ. އެމްޕީއެލުން ބުނީ، މިފަދަ ޙަރަކާތެއްގެ މައިގަނޑު ބޭނުމަކީ އެމްޕީއެލް އަކީ ސަލާމަތާއި ރައްކާތެރިކަމުގެ ޘަޤާފަަތެއް ޤާއިމުވެފައިވާ ކުންފުންޏަކަަށް ހެދުން ކަމަށެވެ.

ޝާހީދު ވިދާޅުވީ، ވާރކްޝޮޕް ތެރެއިން ފާހަގަކުރެވުނު ކަންތައްތައް ރަނގަޅު ކުރުމަށް ރާވައިގެން ފިޔަވަޅުތަކެއް އަޅަމުން ގެންދާނެ ކަމަށެވެ. އެމްޕީއެލްގެ ބަނދަރަކީ އެތަނުގެ މަސައްކަތުގެ ގޮތުން އޭގެ ޒާތުގައި އެކްސިޑެންޓުތަކާއި ހިތާމަވެރި ޙާދިސާތައް ހިނގުން ކައިރި ކަމަށެވެ. އެހެންކަމުން އެކަމަށް ސަމާލުވެ، ހިތާމަވެރި ޙާދިސާއެއް ނުހިނގާނެފަދަ ގޮތަށް މަސައްކަތް ބައްޓަން ކުރަން ޖެހޭ ކަމަށެވެ.

މާލޭ ވިޔަފާރި ބަނދަރުގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން އެމްޕީއެލުން ކުރިޔަށް ގެންދިޔަ "ސޭފްޓީ ވީކް" ނިންމުން ފާހަގަކުރުމަށް ބޭއްވި އެ ރަސްމިއްޔާތުގައި ''ސޭފްޓީ'' ވީކްގެ ބައިވެރިންނަށް ސެޓްފިކެޓް ޙަވާލުކޮށްފައިވެއެވެ.