ކެމްޕެއިންގައި ސްކޫލް ކުދިން ބައިވެރިކުރި މައްސަލަ ކަމާބެހޭ ހުރިހާ އިދާރާތަކަށް!

ހއ. އިހަވަންދޫ ޕީޕީއެމްގެ ޖަގަހަ ހުޅުވުމަށް ބޭއްވި ރަސްމިއްޔާތުގައި ޔުނިފޯމްގައި ސުކޫލް ކުދިން ބައިވެރިކުރި މައްސަލަ އެމްޑީޕީން ކަމާބެހޭ ހުރިހާ އިދާރާތަކަށް ހުށަހަޅައިފި އެވެ.

ރައީސުލްޖުމްހޫރިއްޔާގެ އަނބިކަނބަލުން ފާތުމަތު އިބްރާހިމް، އިހަވަންދޫ ޕީޕީއެމްގެ ޖަގަހަ ހުޅުއްވައިދެއްވިއިރު، ސްކޫލް ޔުނީފޯމްގައި ކުދިން ވަނީ ބައިވެރިކޮށްފަ އެވެ. އަދި ރަސްމިޔާތުގެ އެކި ހުށައެޅުންތައްވެސް ހުށައަޅައިދިނީ ވެސް ސްކޫލް ކުދިންނެވެ.

އެމްޑީޕީން ވަނީ އެ މައްސަލަ އިލެކްޝަންސް ކޮމިޝަނަށާއި، އެޑިއުކޭޝަން މިނިސްޓްރީގެ އިތުރުން ހިއުމަން ރައިޓްސް ކޮމިޝަން އޮފް ދަ މޯލްޑިވްސް(އެޗްއާރްސީއެމް) އަށް ހުށަހަޅާފަ އެވެ.

އިހަވަންދޫ ސްކޫލްގެ ބައެއް ބެލިނިވެރިން ބުނި ގޮތުގައި ރައީސުލްޖުމްހޫރިއްޔާގެ އަނބިކަނބަލުން، ފާތުމަތަށް މަރުހަބާ ކިޔުމަށް ޖެޓީ ސަރަހައްދަށް އެއްވުމަށްވެސް ބައެއް ސުކޫލް ކުދިންނަށް މަޖުބޫރުކުރުވި ކަމަށެވެ. އަދި ޕީޕީއެމްގެ ޖަގަހަ ހުޅުވުމަށް ބޭއްވި ރަސްމިއްޔާތުގައި ދާއިރާގެ މެމްބަރު މުހައްމަދު އަބްދުﷲ އާއެކުގައި ބައިވެރިވުމަށްވެސް ބައެއް ކުދިންނަށް އެންގި ކަމަށް ވެސް ބެލެވެރިން ބުނެ އެވެ.

ޤާނޫނުތައް ބުނާގޮތުން ސިޔާސީ ހަރަކާތްތަކުގައި ސުކޫލް ކުދިން އަދި ކުޑަކުދިން ބައިވެރިކުރުމަކީ ކުށެކެވެ. އަދި އެފަދަ މައްސަލަ ބަލައި، ފިޔަވަޅު އަޅަންޖެހޭނެކަމަށްވެސް ޤާނޫނުތަކުގައި ބުނެފައިވެއެވެ. ޤާނޫނުތަކުގައި، ރައީސުލްޖުމްހޫރިއްޔާއާއި އެމަނިކުފާނުގެ އަނބިކަނބަލުން ބައިވެރިވާ ސިޔާސީ ހަރަކާތްތަކުގައި ސުކޫލްކުދިން ބައިވެރިކުރެވޭނެކަމުގެ އެއްވެސް އިސްތިސްނާއެއްދީފައެއް ނުވެއެވެ.

ޕީޕީއެމްގެ ސިޔާސީ ހަރަކާތްތަކުގައި ކުޑަކުދިން ބައިވެރިކުރުވާ މައްސަލާގައި ގިނަ ބައެއްގެ ފާޑުކިޔުންތައް އަމާޒުވެފައިވީ ނަމަވެސް މީގެ ކުރިން މިފަދަ މައްސަލަތައް ހަލުއިކަމާއެކު ބަލާ މުއައްސަސާތަކުން މިހާރު މިކަންކަމަށް އަޅާނުލާ ކަމަށް ގިނަ ބަޔަކު ބުނަމުން ދެއެވެ.

އެގޮތުން ޕީޕީއެމްގެ ޖަލްސާއެއްގައި ކުޑަކުދިން ބައިވެރިކުރި މައްސަލައެއް މީގެ ކުރިން ވެސް އެޗްއާރްސީއެމް އަށް ހުށަހެޅި އެވެ. ނަމަވެސް، މިއަދާ ހަމައަށް ވެސް އެ މައްސަލަ ބަލައި އެ ކޮމިޝަނުން ނިންމާފައެއް ނުވެ އެވެ.