ސިޓީތަކުން އަންހެނުންނަށް ހާއްސަކުރެވިފައިވާ ދާއިރާތައް ކަނޑައަޅައިފި
މާލެ ސިޓީއިން 6 ގޮނޑި ވަނީ އަންހެނުންނަށް ހާއްސަކުރެވިފައި
އިލެކްޝަންސް ކޮމިޝަންގެ މެމްބަރުން ބޭއްވި ގުރުއަތުލުމުގެ ތެރެއިން
ކުރިޔަށް އޮތް ލޯކަލް ކައުންސިލް އިންތިހާބުގައި، ސިޓީ ކައުންސިލްތަކުން ކަނބަލުންނަށް ހާއްސަކުރެވިފައިވާ ދާއިރާތައް ކަނޑައަޅައިފިއެވެ.
އެހެން ފަހަރުތަކާއި ހިލާފަށް މި ފަހަރު ދާއިރާތަކަށް ދީފައިވަނީ ނަންބަރުތަކެކެވެ. އީސީގެ ނައިބް ރައީސް އަހުމަދު އަކްރަމް ވިދާޅުވީ، ދާއިރާތަކަށް ނަމުގެ ބަދަލުގައި ނަންބަރުތަކެއް ދޭން ނިންމީ ބައެއް ދާއިރާތަށް އަވަށްތަކުގެ މެދުން އައިސްފައި ހުރުމާއި އަދި ބައެއް ސަރަހައްދުތައް އެއްވެސް އަވަށަކަށް ނިސްބަތްނުވާތީ ކަމަށެވެ.
މިއީ މިފަހުން ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނައި އައު އިސްލާހުތަކަށް ފަހު ބޭއްވޭ ފުރަތަމަ އިންތިހާބެވެ. މި ގާނޫނަށް ގެނައި މައިގަނޑު އިސްލާހުތަކުގެ ތެރޭގައި ކައުންސިލްތަކުގެ ދައުރު ފަސް އަހަރަށް އިތުރުކުރުމާއި، ހުރިހާ ކައުންސިލްތަކަކުން 33 އިންސައްތަ އަންހެނުންނަށް ހާއްސަ ކުރުމުގެ އިތުރުން، ކައުންސިލްތަކަށް އަމިއްލަ ނަމުގައި ވިޔަފާރިކުރުމުގެ ބާރުތައް ހިމެނެއެވެ.
