ފީއަލީ ކައިރީގައި ފިލްމް މަންޒަރެއް ނެގޭނީ ހުއްދަ ނަގައިގެން ކަމަށް ކަނޑައަޅައިފި
ބޭނުންވެއްޖެ ހިނދެއްގައި ހުއްދަ ދައްކަން ޖެހޭ
ފ އަތޮޅު: ފީއަލި ކަނޑުގައި ފިލްމެއް ނެގޭނީ ހުއްދަ ނަގައިގެން
ފ އަތޮޅު ފީއަލީ ކައުންސިލްގެ އިޚްތިސާސް ހިމެނޭ އެއްވެސް ސަރަހައްދެއްގައި ފިލްމީ އެއްވެސް މަންޒަރެއް ނެގޭނީ އެކައުންސިލްގެ ހުއްދައެއް ނަގައިގެން ކަމަށް ކަނޑައަޅައިފިއެވެ.
ފ ފީއަލީ ކައުންސިލުން އެކަށައަޅައި ދިވެހި ސަރުކާރުގެ ގެޒެޓްގައި ޢާއްމު ކޮށްފައިވާ ޤަވާއިދުގައި ބުނެފައިވާ ގޮތުގައި ކައުންސިލްގެ އިޚްތިސާސް ހިނގާ އެއްވެސް ސަރަހައްދެއްގައި ފިލްމެއް ނުވަތަ ފިލްމެއްގެ ބައެއް ނުވަތަ އިޝްތިހާރެއް ނަގަންވާނީ ކައުންސިލުން ލިޔުމުން ހުއްދަ ލިބިގެންނެވެ.
އެޤަވާއިދުގައި ބުނެފައިވާ ގޮތުގައި މަސައްކަތް ހިނގަމުން ދާއިރު ކައުންސިލްގެ ފަރާތުން ނުވަތަ ކައުންސިލުން ކަނޑައަޅާފައިވާ ފަރާތަކުން ނުވަތަ މޯލްޑިވސް ޕޮލިސް ސަރވިސްގެ ފަރާތުން އެފިލްމެއް ނުވަތަ ފިލްމުން ބައެއް ނަމަވެސް ނަގަމުންދަނީ ގަވާއިދާ އެއްގޮތައް ހުއްދަ ލިބިގެންތޯ ބެލުމަށް ބޭނުންވެއްޖެ ހިނދެއްގައި، ލިބިފައިވާ ހުއްދަ ދައްކަން ވާނެއެވެ. ހުއްދަ ދެއްކުމަށް އަންގާ ވަގުތު އެހުއްދަ ދެއްކިފައި ނުވާނަމަ ފިލްމު ނެގުން ހުއްޓުވުމުގެ އިޚްތިޔާރު ކައުންސިލަށް ނުވަތަ ކައުންސިލްގެ ފަރާތުން ނުވަތަ ކައުންސިލުން ކަނޑައަޅާފައިވާ ފަރާތަކުން ނުވަތަ މޯލްޑިވްސް ޕޮލިސް ސަރވިސްއަށް ލިބިގެންވެއެވެ. އެގޮތަށް ހުއްޓުވުމުން ލިބޭ ގެއްލުމުގެ ބަދަލުވެސް އެހުއްޓުވި ފަރާތުން ދޭން ނުޖެހޭނެ ކަމަށްވެސް ޤަވާއިދުގައި ވެއެވެ.
އެހުއްދަ ދޫކުރުމަށް ހަމަޖެހިފައިވަނީ ފީއެއް ނެގުމަށް ފަހުގައެވެ. އެ ފީ ކަނޑައަޅާނީ އެ މަންޒަރެއް ނަގާ ސަރަހައްދެއް ބެލުމެއްފަހުގައި ކަމަށް ވެސް ޤަވާއިދުގައި ބުނެފައިވެއެވެ.
ޤަވާއިދާ ޚިލާފްވާ ފަރާތަތްކަށް ފުރަތަމަ ފަހަރު ނަސޭހަތް ދިނުމަށް ކަނޑައަޅާފައިވާއިރު ދެވަނަ ފަހަރަށް އެފަދަ ކަމެއް ކޮށްފިނަމަ 500 ރުފިޔާ އާއި 1،000 ރުފިޔާއިން ޖޫރިމަނާ ކުރެވޭނެ އެވެ. ތިން ވަނަ ފަހަރު ނަމަ 1،000 ރުފިޔާ އާއި 3،000 ރުފިޔާ އަދި ހަތަރު ވަނަ ފަހަރު ނަމަ 3،000 ރުފިޔާއާ 5،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ. ހަތަރު ވަނަ ފަހަރަށްވުރެ އިތުރުވާ ކޮންމެ ފަހަރަކު 5،000 ރުފިޔާއިން ޖޫރިމަނާ ކުރެވޭނެ ކަމަށްވެސް އެޤަވާއިދުގައި ވަނީ ބުނެފައެވެ.
މިޤަވާއިދަށް މިހާރު ވަނީ ޢަމަލް ކުރަން ފަށާފައެވެ.
