ފާރިސްގެ މައްޗަށް ދައުވާ ނުކުރެވޭނެ ކަމަށް ކަނޑައަޅައިފި

ތީމުގޭގެ 2007 އަދި 2008 ވަނަ އަހަރުގެ އޮޑިޓް ރިޕޯޓްގެ މައްސަލައިގައި، ރައީސް މައުމޫން އަބްދުލް ގައްޔޫމްގެ ދަރިކަލުން އަދި ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހްމަދު ފާރިސް މައުމޫނުގެ މައްޗަށް ދައުވާ ނުކުރެވޭނެ ކަމަށް ޕްރޮސިކިއުޓަ ޖެނެރަލްގެ އޮފީހުން ނިންމައިފި އެވެ.

ޕީޖީ އޮފީހުން ބުނި ގޮތުގައި މި ގޮތަށް ނިންމާފައިވަނީ ބުރާސްފަތި ދުވަހު ކަމަށެވެ. އަދި އެކަން ނިންމި ކަމުގެ ރިޕޯޓް މިހާރު ޕޮލިހަށް ފޮނުވާފައިވާ ކަމަށް ވެސް އެ އޮފީހުން ބުންޏެވެ. ފާރިސްގެ މައްޗަށް ކޮރަޕްޝަންގެ ތުހްމަތުކޮށް މައްސަލަ ބަލަން ފެށީ، ރައްޔިތުންގެ މަޖިލީހުގެ ރައީސް މަސީހުގެ އިތުބާރު ނެތްކަމުގެ މައްސަލައާ ގުޅިގެންނެވެ.

ގާާނޫނުލް އުގޫބާތުގެ 61 ވަނަ މާއްދާގައި ބުނެފައިވާ ޖިނާއި މައްސަލަތަކުގަައި ދައުވާ ކުރެވޭނީ ކުށްކުރި ތާރީހުން ފެށިގެން އަށް އަހަރު ދުވަހުގެ ތެރޭގަ އެވެ. އަދި ޖުނުހުގެ ކުށްތަކުގައި ކުރެވޭނީ ތިން އަހަރު ދުވަހުގެ ތެރޭގަ އެވެ. ފާރިސްގެ މައްޗަށް ދައުވާކުރަން ފޮނުވީ 2007 އަދި 2008 ގެ އޮޑިޓް ރިޕޯޓްގެ މައްސަލައިގައި ކަމަށްވާއިރު، ގާނޫނުލް އުގޫބާތުގައި ބުނެފައިވާ މުއްދަތު ވަނީ ފަހަނަ އަޅައި ގޮސްފަ އެވެ.

އޮޑިޓް ރިޕޯޓްގެ މައްސަލަ އަނބުރާ ފޮނުވާލިއިރު، ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދޭން އުޅުމާއި ނުފޫޒު ފޯރުވުމުގެ ތުހުމަތު ކޮށް ފުލުހުން ވަނީ ތަހްގީގު ކުރަން ފަށައިފަ އެވެ. ނަމަވެސް އެ މައްސަލައިގައި ދައުވާ ކުރަން ފޮނުވި ކަމެއް ހާމައެއް ނުކުރެ އެވެ.