ރާއްޖޭގައި އެންމެ ފުރަތަމަ އުފެއްދި ޓްރެވަލް އެޖެންސީއަކީ "މިއުމަން ޓްރެވަލް އެޖެންސީ": ކެރަފާ ނަސީމް
24 ޑިސެމްބަރު 2019 | އަންގާރަ 08:03މިއުމަން (އެމްޔޫއެމްއޭއެން) ނިސްބަތްވަނީ، މުހައްމަދު އުމަރު މަނިކު، އަހުމަދު ނަސީމް އަށް
އަހުމަދު ނަސީމް (ކެރަފާ ނަސީމް): ރާއްޖެއަށް ފަތުރުވެރިކަން ތައާރަފް ކުރުމުގައި ވަރަށް ބޮޑު ދައުރެއް އަދާކުރެއްވި
ރާއްޖެއަށް ޓޫރިޒަމް ތަޢާރަފު ކުރުމުގެ ގޮތުން، ރާއްޖެއަށް ފަތުރުވެރިން ގެނައުމަށް އެންމެ ފުރަތަމަ އުފެއްދި ކުންފުންޏަށް ކިޔަނީ "މިއުމަން ޓްރެވަލް އެޖެންސީ" ކަމަށް އެކުންފުނީގެ ވެރިޔާ ރައީސުލްޖުމްހޫރިއްޔާގެ އޮފީހުގެ މިނިސްޓަރ އަޙްމަދު ނަސީމު (ކެރަފާ ނަސީމް) ވިދާޅުވެއްޖެ އެވެ.
ނަސީމަކީ ރާއްޖެއަށް ފަތުރުވެރިކަން ތަޢާރަފު ކުރުމުގައި އެންމެ އިސްކޮށް އުޅުއްވި، އަދި ރާއްޖެއަށް ފަތުރުވެރިކަން ތަޢާރަފު ކުރުމުގައި އެންމެ ބޮޑު ދައުރެއް އަދާކުރެއްވި އެއް ފަރާތެވެ.
ރާއްޖެއަށް ފަތުރުވެރިން ގެނައުމުގެ މަސައްކަތް ފެށުމުގެ ވާހަކަތައް އެންމެ ފުރަތަމަ ދެއްކެވީ، ޔުނިވަރސަލް މުޙައްމަދު އުމަރު މަނިކާއި ޗަންޕާ ޙުސައިން އަފީފުގެ އަރިހުގައި ކަމަށް ނަސީމް ވިދާޅުވި އެވެ.
ނަސީމް ވިދާޅުވީ، އެދުވަސްވަރު އެބޭފުޅުންނަށް ކުންފުންޏެއް އުފެއްދުމަށް ބޮޑެތި ގޮންޖެހުންތަކާވެސް ދިމާވި ކަމަށެވެ. އެއީ އޭރު ކުންފުންޏެއް އުފެއްދެނީ އުމުރުން 24 އަހަރު ވީމަ ކަމަށްވާތީ، އެބޭފުޅުންގެ އުމުރުން 24 އަހަރު ނުވާތީ، ކުންފުނި ރަޖިސްޓްރީ ކުރެވޭގޮތް ނުވި އެވެ.
އޭރު ރާއްޖޭގައި އިންޓަނެޓެއް، ޓެލެފޯނެއް އަދި ފެކްސް ކުރެވޭނެ ފަދަ އެއްވެސް ވަޞީލަތެއް ނުހުންނަކަމަށާއި އެހެންކަމުން ވަރަށް ބޮޑެތި ދަތިތަކާ ކުރިމަތިވި ކަމަށް ނަސީމް ވިދާޅުވި އެވެ. އެހެންކަމުން ކޮޅުބުން އެޖެންޓެއް ހޯދާ، ސިލޯން ޓުއަރސް ކިޔާ ކުންފުންޏަކާ ގުޅިގެން މަސައްކަތްކުރަމުން ދިޔަކަމަށެވެ.
ނަސީމް ވިދާޅުވީ ރާއްޖެއަށް އެންމެ ފުރަތަމަ ޓޫރިސްޓުންގެ ގްރޫޕެއް ރާއްޖެގެނެސް ބޭތިއްބީ އެބޭފުޅުންގެ ގެތަކުގައި ކަމަށެވެ. އެގޮތުން ފުރަތަމަ ގްރޫޕުގައި ވެސް 22 ޓޫރިސްޓުން ރާއްޖެ ގެނައި ކަމަށާއި، އެމީހުން ގޮވައިގެން ޑައިވިނާއި ސްނޯކްލިންގ އަދި ކައިރި ދަޅު ރަށްތަކަށް ގެންދިޔަ ކަމަށްވެސް ނަސީމު ވިދާޅުވި އެވެ.
ރިސޯޓެއްގެ ގޮތުގައި އެންމެ ފުރަތަމަ ހުޅުވުނީ ކުރުނބާ މޯލްޑިވސް (ވިހަމަނާފުށި) ކަމަށާއި އޭގެ ދެ މަސްފަހުން އެބޭފުޅުންނާ ވާދަޔަށް ބަނޑޮސް ރިސޯޓް ހުޅުވި ކަމަށް ނަސީމް ވިދާޅުވި އެވެ. އަހަރެއްހާ ދުވަސް ވީތަނުން ބަނޑޮސް ނުހިންގި ގެއްލުން ވަމުންދާތީ ސަރުކާރުން ބަނޑޮސްވެސް އެބޭފުޅުންނާ ޙަވާލު ކުރެއްވި ކަމަށް ނަސީމް ވިދާޅުވި އެވެ.
ނަސީމް ވިދާޅުވީ އެންމެ ފުރަތަމަ ކުރުނބާ މޯލްޑިވްސްގައި ހެދީ ވަރަށް އާދައިގެ 30 ކޮޓަރި ކަމަށެވެ. އަދި ފުރަތަމަ ޚިދްމަތް ދިނުމުގައި އުޅުއްވީ ވެސް އެބޭފުޅުންކަމަށް ނަސީމް ވިދާޅުވި އެވެ.
