ލ. އަތޮޅުގެ މަދަނީ ޖަމްޢިއްޔާތަކުގެ ކޮންފަރެންސް ފަށައިފި

ލ. އަތޮޅުގައި ހަރަކާތްތެރިވާ މަދަނީ ޖަމްޢިއްޔާތަކުގެ ކޮންފަރެންސް ފަށައިފިއެވެ.

މި ކޮންފަރެންސަކީ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓާއި ލ. އަތޮޅު ކައުންސިލް ގުޅިގެން ކުރިޔަށް ގެންދާ ކޮންފަރެންސްއެކެވެ. މި ކޮންފަރެންސް ބާއްވަނީ ލ. ފޮނަދޫގައެވެ. މި ކޮންފަރެންސްގައި ލ. އަތޮޅުގައި ހަރަކާތްތެރިވާ 11 ޖަމްޢިއްޔާއަކުން ޖުމްލަ 17 ބައިވެރިން ވަނީ ބައިވެރިވެފައެވެ.

މިއީ މިފަދަ ދެވަނަ ކޮންފަރެންސް ކަމަށްވާއިރު މީގެކުރިން މިނިސްޓްރީއިން ވަނީ ގއ. އަތޮޅުގެ އަށް ރަށެއްގައި ހަރަކާތްތެރިވާ 15 މަދަނީ ޖަމްޢިއްޔާއެއްގެ 28 ބައިވެރިންނާއެކު ގއ. ވިލިނގިލީގައި ދެ ދުވަހުގެ ކޮންފަރެންސެއް ކުރިޔަށް ގެންގޮސްފައެވެ.

މަދަނީ ޖަމްޢިއްޔާތަކުގެ ޤާބިލްކަން އިތުރުކޮށް ޖަމްޢިއްޔާތަކާއި ގުޅިގެން ހަރަކާތްތައް ރޭވުމަށް މިނިސްޓްރީއިން ގެންދަނީ ގިނަ މަސައްކަތަކެއް ކުރަމުންނެވެ.

ރާއްޖޭގެ އެހެން އަތޮޅުތަކުގައި ވެސް މަދަނީ ޖަމްޢިއްޔާތަކަށް ޚާއްސަކޮށްގެން ކޮންފަރެންސްތަކެއް ކުރިޔަށް ގެންދިޔުމަށް ނިންމާފައިވާ ކަމަށް އެމިނިސްޓްރީއިން ވަނީ މަޢުލޫމާތު ދީފައެވެ