ނޫސްތަކުން ސިފަކުރާ ފަދަ ބިރުވެރި އަމަލެއް މަޑުއްވަރި އަކު ނުހިނގާ: ކައުންސިލް
އޮޕަރޭޝަން ފެށީ ބުދަ ދުވަހު
ފުލުހުންނާއި ސިފައިން ގުޅިގެން މަޑުއްވަރީ ގައި ހިންގާ އޮޕަރޭޝަންގެ ތެރެއިން
ރާއްޖޭގެ ނޫސް މަޖައްލާތަކުން ސިފަކުރާ ފަދަ ބިރުވެރި އަމަލެއް ރ. މަޑުއްވަރީ ގައި ނުހިނގާ ކަމަށާއި، އެފަދަ ގޮތަށް ހަބަރުތައް ނުގެނެސް ދިނުމަށް މަޑުއްވަރީ ކައުންސިލުން ދިވެހި ނޫސްތަކަށް ނަސޭހަތެރި ވެއްޖެއެވެ.
ހައްދުފަހަނަ އަޅާފައިވާ މީހުން ހޯދުމަށް ފުލުހުންނާއި ސަލާމަތީ ބާރުތަކުން ވަނީ ބުދަ ދުވަހު މަޑުއްވަރީ ގެތައް ފާސްކުރުމުގެ އޮޕަރޭޝަނެއް ފަށާފައެވެ. އެކަމާއި ގުޅުވައިގެން ނޫސްތަކުގައި ޝާއިއު ކުރެވެމުންދާ ހަބަރުތަކާއި މެދު ކަންބޮޑުވުން ފާޅުކޮށް ބުރާސްފަތި ދުވަހު ކައުންސިލުން ނެރުނު ބަޔާނެއްގައި ބުނީ، އެ ރަށުގައި ދީނީގޮތުން ހައްދުފަހަނަ އެޅުމާއި ގުޅޭ ގޮތުން ގެނެސްދޭ ހަބަރުތަކުގައިއާ މަޒުމޫން ތަކުގައި ހަގީގަތެއްނެތް ވާހާކަ ނުލިޔުމަށް ނަސޭހަތްތެރިވާ ކަމަށެވެ. އަދި ނޫސްތަކުން ސިފަކޮށްފައިވާ ފަދަ ބިރުވެރި އަމަލެއް ރަށުގައި ހިނގަމުންނުދާ ކަމަށްވެސް ކައުންސިލްގެ ބަޔާނުގައި ބުންޏެވެ.
ހަރުކަށި ފިކުރު ފަތުރައި ހިންގަމުންދާ އަމަލުތައް ކުށްވެރި ކުރަމުން ކައުންސިލްގެ ބަޔާނުގައި ބުނީ، ފުލުހުންނާއި ސިފައިން ގުޅިގެން، ބައިބައިވެގެން އުޅޭ މީހުން ހޯދައި އެމީހުންގެ ޝިކާރާއަކަށް ވެފައިވާ ފަރާތްތައް ހޯދުމަށް ކަމާއިބެހޭ އިދާރާތަކުން ކުރަމުން ގެންދާ މަސައްކަތައް ޝުކުރު އަދާކުރާ ކަމަށެވެ. ކައުންސިލުން ވަނީ ހަރުކަށި ފިކުރުތަކާއި ދީނީ އިލްމުވެރިން ނިކުމެ އެކަމާއި ދެކޮޅަށް އަޑު އުފުލުމަށްވެސް ގޮވާލާފައެވެ.
