ރާއްޖޭގައި ޗައިނާ އިން ކޮށްފައިވާ އިންވެސްޓްމަންޓްތަކުގެ ކުރިމަގާ މެދު ވެރިކަން ބަދަލުވުމުން އެ ގައުމާ އެކު މަޝްވަރާކުރައްވާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

މި ވަގުތު ލަންކާގައި ހުންނެވި ރައީސް ނަޝީދު އިންޑިއާގެ އިންޑިއަން އެކްސްޕްރެސް އަށް ދެއްވި އިންޓަވިއުއެއްގައި ވިދާޅުވެފައި ވަނީ ޗައިނާ އިން ލަންކާގައި ހަދާފައިވާ ހަމްބަންޓޯޓާ ބަނދަރާ ބެހޭ ގޮތުން ލަންކާގެ ޕޯޓްސް މިނިސްޓަރު އަރްޖުން ރަނަތުންގާ މިހާރު ޗައިނާއާ އެކު އަލުން މަޝްވަރާތައް ފައްޓަވާފައިވާ ކަމަށެވެ. ހަމަ އެގޮތަށް ރާއްޖޭގައި ޗައިނާ އިން ކުރަމުން އަންނަ އިންވެސްޓްމަންޓްތަކާ ބެހޭ ގޮތުން ވެސް 2018 ވަނަ އަހަރުގެ އިންތިޚާބު ކާމިޔާބުކުރާ އިދިކޮޅު ފަރާތްތަކުން މަޝްވަރާކުރައްވާނެ ކަމަށް ރައީސް ނަޝީދު ވިދާޅުވިއެވެ.

ރާއްޖޭގައި ޗައިނާގެ ނުފޫޒު ގަދަކަން ފާހަގަކުރައްވަމުން ރައީސް ނަޝީދު ވިދާޅުވީ ރާއްޖޭގެ ދަރަނީގެ 70-80 ޕަސެންޓް ހިއްސާކުރަނީ ޗައިނާ ކަމަށް ވުމުން އެއީ ފަސޭހަ ކަމަކަށް ނުވާނެ ކަމަށެވެ.

ޗައިނާއިން ކަންކަން ކުރަމުން ގެންދަނީ ހާމަކަން ކުޑަ ގޮތެއްގައި ކަމަށާއި އަދި ޗައިނާ އިން ގުޅުން ބަދަހިކުރަނީ ވެސް އެފަދަ ގައުމުތަކާ ކަން ރައީސް ނަޝީދު ފާހަގަކުރެއްވިއެވެ.

މަޝްވަރާގެ މޭޒުދޮށަށް އައުމަށް އިދިކޮޅު ފަރާތްތަކަށް ސަރުކާރުން ގޮވާލާފައިވާ އިރު އިދިކޮޅު ފަރާތްތަކާއި އަދި ޚުދު އެމެނިކުފާނާ އެކު ރައީސް އަބްދުﷲ ޔާމީން މަޝްވަރާތަކަށް ވަޑައިގަންނަވާނެ ކަމަށް އުންމީދުކުރައްވާ ކަމަށް ވެސް ރައީ ނަޝީދު ވިދާޅުވިއެވެ.

ޓެރަރިޒަމްގެ ދައުވާކޮށް ދިގު މުއްދަތެއްގެ ޖަލު ހުކުމެއްގައި ހުންނެވި ރައީސް ނަޝީދު ވިދާޅުވީ ވެރިކަން ބަދަލުވާން ބޭނުންފުޅުވާ ކަމަށާއި ކަމަށާއި ނަމަވެސް އެކަން ވާންޖެހޭނީ ގާނޫނުއަސާސީގެ ތެރެއިން ކަމަށެވެ. ނަމަވެސް ވެރިކަން ބަދަލުކުރުމުގެ ކުރިން ނިޒާމަށް ބަދަލުތަކެއް އަންނަންޖެހޭ ކަމަށާއި ޝަރުއީ ދާއިރާ އަށް ބަދަލުތަކެއް އަންނަންޖެހޭ ކަމަށް ވެސް ރައީސް ނަޝީދު ވިދާޅުވިއެވެ.

މީގެ އިތުރުން އެމަނިކުފާނު ވިދާޅުވީ ގާނޫނު ހަދާ މަޖިލީސް ބޭނުން ކޮށްގެން އިދިކޮޅު ފަރާތްތަކުން ޝަރުއީ ދާއިރާ އިސްލާހު ކުރައްވާނެ ކަމަށެވެ. އަދި މިނިވަން މުއައްސަސާތައް ވެސް އިސްލާހްކުރައްވާނެ ކަމަށް ވެސް ވިދާޅުވިއެވެ.

ކުރިއަށް އޮތް ރިޔާސީ އިންތިޚާބުގައި ގުޅިފައިވާ އިދިކޮޅު ފަރާތްތަކުގެ ކެންޑިޑޭޓަކަށް ވާނެތޯ ސުވާލުކުރުމުން ރައީސް ނަޝީދު ވިދާޅުވީ އެ ވަގުތު ޖެހޭ އިރު އެފަދަ މާހައުލެއް އޮންނާނެ ކަމަށް ގަބޫލު ނުކުރެއްވޭ ކަމަށެވެ. އޭގެ ކުރިން ސިޔާސީ މަސްރަހް ހަމަޖެހި ޕާޓީތަކަށް ވާދަކުރެވޭނެ މާހައުލެއް ގާއިމުކުރެވިގެންދާނެ ކަމަށް އުންމީދުކުރައްވާ ކަމަށް ވެސް ވިދާޅުވިއެވެ.  

ރައީސް ނަޝީދު ވިދާޅުވީ މި މަސައްކަތުގައި ބައިނަލްއަގުވާމީ ފަރާތްތަކުން ވަރަށް ބޮޑު އެހީތެރިކަމެއް ލިބޭ ކަމަށާއި ހާއްސަކޮށް އެމެރިކާ އާއި ޔޫރަޕްގެ އިއްތިހާދާއި ކެނެޑާ ފަދަ ގައުމުތައް ފާޅުގައި އެހީތެރިކަން ފޯރުކޮށްދޭ ކަމަށެވެ. އަދި ފާޅުގައި ނޫން ނަމަވެސް ސްރީ ލަންކާ އާއި އިންޑިއާ ފަދަ ގައުމުތަކުން ވެސް ތާއީދު ލިބޭ ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދުގެ މައްޗަށް ޓެރަރިޒަމްގެ ދައުވާކޮށް ދިގު މުއްދަތެއްގެ ޖަލު ހުކުމެއް އިއްވާފައިވާ އިރު ބޭސްފަރުވާ އަކަށް އިނގިރޭސި ވިލާތަށް ވަޑައިގެން އެމަނިކުފާނު ވަނީ އެ ގައުމުގެ ހިމާޔަތް ހޯއްދަވާފައެވެ.