ހަމަނުޖެހުން އުފެދި ކަންތައްތައް ގޯސްވެގެން ހިނގައްޖެނަމަ ރައްޔިތުން ބަނޑަށް ޖެހޭނެކަމަށް ވިދާޅުވި
ޖުމްހޫރީ ޕާޓީގެ ލީޑަރ ގާސިމް އިބްރާހިމް
ބޭރު ގައުމުތަކުން ރަމަޟާންމަހު ހާފިޘުން ގެނައުމަކީ ބޮޑު އިސްރާފެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވުމުން އެކަމަށް ޖުމްހޫރީ ޕާޓީގެ ލީޑަރ ގާސިމް އިބްރާހިމް ރައްދު ދެއްވައިފިއެވެ.
ހޯމަދުވަހުގެ ރޭ މާމިގިލީގައި ޖޭޕީން ބޭއްވި ޖަލްސާގައި ވާހަކަދައްކަވަމުން ގާސިމް ވިދާޅުވީ ކޮންމެވެސް ސަބަބަކާއި ހެދީ ދިވެހިރާއްޖޭގައި ހަމަނުޖެހުން އުފެދި ގިނަ ކަންތައްތަކެއް ގޯސްވެގެން ހިނގައްޖެ ނަމަ ރައްޔިތުން ބަނޑަށް ޖެހޭނެ ކަމަށެވެ. ދިވެހިރާއްޖެއަށް އާމްދަނީގެ އެންމެ ބޮޑުބައެއް އަބަދުވެސް ލިބެނީ ޓުއަރިޒަމްގެ ދާއިރާއިން ކަމަށާއި ރާއްޖޭގައި ހަމަނުޖެހުން އުފެދި ޓުއަރިސްޓުން ނާންނަން ފަށައިފިނަމަ ދެންވާނެ ގޮތަކާއި މެދު ވަނީ ސުވާލު އުފައްދާފައެވެ.
ދިވެހިރާއްޖޭގައި ޓުއަރިޒަމް ފެތުރިގެން ދިއައީވެސް އަދި މިހާތަނަށް ފެތުރެމުން މިދަނީވެސް މި ދިވެހިރާއްޖެއަކީ 100 ޕަސެންޓް މުސްލިމްގައުމެއްގެ ގޮތުގައި އޮވެގެން ކަމަށާއި އެއްވެސް ބަޔަކު މުސްލިމު ގައުމަކަށް ވީތީއޭ ކިޔާފައި ނާންނަ ނަމަ ފުރަތަމަ ދުވަހުވެސް ނާންނާނެ ކަމަށް ޤާސިމް ވިދާޅުވި އެވެ. އެހެންކަމުން އެފަދަ ވާހަކަ ދައްކައިގެން ކުރި ހޯދަން އުޅުނަސް އެކަމެއް ނުވާނެ ކަމަށް ގާސިމް ވިދާޅުވިއެވެ.
