ޤައުމުގައި ހުރި މައްސަލަތައް ހައްލުކޮށް ޤައުމު އަމާން ބަނދަރަކަށް ގެންދެވޭނެ ހަމައެކަނި ބޭފުޅަކީ ރައީސް މުހައްމަދު ނަޝީދު ކަމަށާއި، އެ މަނިކުފާނު މިނިވަން ނުކޮށް، ޤައުމުގައި ހުރި މައްސަލަތައް ހައްލުނުކުރެވޭނެ ކަމަށް ޕީޕީއެމްއަށް ނިސްބަތްވެވަޑައިގަންނަވާ ތިމަރަފުށީ ދާއިރާގެ މެމްބަރު މުހައްދު މުސްތަފާ ވިދާޅުވެއްޖެ އެވެ.
ރާއްޖޭގެ ސިޔާސީ މަޝްރަހުގައި ފާހަގަކުރެވޭ ކަންކަމާއި ގުޅޭ ގޮތުން ވާހަކަ ދައްކަވަމުން މުސްތަފާ ވިދާޅުވީ ރާއްޖޭގައި ހުރި މައްސަލަތައް ހައްލުކުރެވެން ނެތް ކަމަށެވެ. އަދި ޤައުމުގައި ހުރި މައްސަލަތައް ހައްލުކުރައްވާނެ ބޭފުޅަކުވެސް ނެތް ކަމަށް މުސްތަފާ ވިދާޅުވި އެވެ. އޭނާ ވިދާޅުވީ ކަންކަން ހައްލުކުރެއްވުމަށް ހުންނެވި ރައީސް ނަޝީދު ވެސް ހުންނަވަން ޖެހެނީ ޤައުމުން ބޭރުގައި ކަމަށާއި، އެ މަނިކުފާނު ވެސް ޤައުމަށް ވަޑައިގަންނަވާއިރަށް ހައްޔަރުކުރައްވާނެ ކަމަށެވެ.
ޤައުމުގައި ހުރި މައްސަލަތައް ހައްލުކުރުމަށް ރައީސް މައުމޫނަކީ ޤާބިލް ބޭފުޅެއް ކަމަށް ގަބުލުކުރައްވަންތޯ ސުވާލުކުރުމުން މުސްތަފާ ވިދާޅުވީ އެކަމާ ގުޅޭ ގޮތުން އެއްޗެއް ވިދާޅުވުމަށް ބޭނުން ނުވާ ކަމަށެވެ. ނަމަވެސް ރައީސް މައުމޫނަކީ ވަރަށް ހިތްވަރުގަދަ ބޭފުޅެއް ކަމަށް މުސްތަފާ ވިދާޅުވި އެވެ.
މުސްތަފާ ވިދާޅުވި ގޮތުގައި ޤައުމުގައި ހުރި މައްސަލަތައް ހައްލުކޮށް، ޤައުމު އަމާން ބަނދަރަކަށް ގެންދެވޭނެ ހަމައެކަނި ބޭފުޅަކީ ރައީސް މުހައްމަދު ނަޝީދު ކަމަށެވެ. އަދި ރައީސް ނަޝީދަކީ ގިނަ ދިވެހި ރައްޔިތުންގެ ލޯތްބާއި އިހުތިރާމް ލިބިވަޑައިގެން ހުންނެވި ބޭފުޅެއްގެ އިތުރުން، އެމްޑީޕީގެ މުގޫ ކަމަށް މުސްތަފާ ވިދާޅުވި އެވެ.
ރައީސް މުހައްމަދު ނަޝީދު ޤައުމުން ބޭރުގައި ހުންނަވައިގެން ކުރައްވާ މަސައްކަތްޕުޅުން ކަންކަން އިސްލާހުކުރެވިދާނެތޯ ސުވާލުކުރުމުން މުސްތަފާ ވިދާޅުވީ، އެގޮތަށް ކަންކަން ހައްލުކުރެވިދާނެ ކަމަށް ގަބޫލުނުކުރައްވާ ކަމަށެވެ.
މުސްތަފާ ވިދާޅުވީ ކުރިއަށް އޮތް ތަނުގައިވެސް ރާއްޖޭގައި އިދިކޮޅު ޕާޓީއެއްގެ ގޮތުގައި އޮންނާނީ އެމްޑީޕީކަމަށެވެ. އެމްޑީޕީ ކުރާ މަސައްކަތުން ރާއްޖޭގެ ކަންކަން ހައްލުކުރެވިދާނެ ކަމަށް ގަބޫލުކުރައްވާ ކަމަށް މުސްތަފާ ވިދާޅުވި އެވެ.
އެމްޑީޕީ ތެރޭގައި ފެކްޝަންތައް އޮތް ކަމަށް ގަބޫލުކުރައްވަންތޯ ސުވާލުކުރުމުން މުސްތަފާ ވިދާޅުވީ އެމްޑީޕީ ތެރޭގައި އެއްވެސް ފެކްޝަނެއް ނޯންނާނެ ކަމަށެވެ. އެމްޑީޕީގެ ހުރިހާވެސް ބޭފުޅަކީ ރައީސް މުހައްމަދު ނަޝީދު ކަމަށާއި ރައީސް ނަޝީދާ އެއްވެސް ބޭފުޅަކު އެމްޑީޕީގެ ތެރެއިން ދެކޮޅު ނުވާނެ ކަމަށް މުސްތަފާ ވިދާޅުވި އެވެ. އޭނާ ވިދާޅުވި ގޮތުގައި ރައީސް ނަޝީދުގެ ފަހަތްޕުޅުގައި ތިއްބެވި ހުރިހާ ބޭފުޅުންނަކީވެސް އެމަނިކުފާނަށް އޮންނަ ލޯތްބެއްގެ ސަބަބުން ތިއްބަވާ ބޭފުޅުން ކަމަށެވެ. ނަމަވެސް ރައީސް ޔާމީންގެ ފަހަތުގައި ތިބި ބޭފުޅުން ތިއްބެވީ މަޖުބޫރުވެގެން ކަމަށް އޭނާ ވިދާޅުވި އެވެ.
ރައީސް އަބްދުﷲ ޔާމީނާއެކު ރައީސް މުހައްމަދު ނަޝީދު ސިޔާސީ ޑީލެއް ހައްދަވާފާނެކަމަށް ގަބޫލުކުރައްވަންތޯ ސުވާލުކުރުމުން މުސްތަފާ ވިދާޅުވީ އެއީ ބަޔަކު ދައްކާ ވާހަކައެއް ކަމަށާއި، ރައީސް ނަޝީދު އެއްވެސް ޑީލެއް ނުހައްދަވާނެ ކަމަށެވެ. ރައީސް މުހައްމަދު ނަޝީދަކީ ވަރަށް އާދައިގެ ދިރިއުޅުމަކަށް ލޯބިކުރައްވާ ބޭފުޅެއް ކަމަށާއި، އެމަނިކުފާނަކީ މުއްސިދިކަމާއި ފައިސާއަށް ލޯބިކުރައްވާ ބޭފުޅެއް ނޫން ކަމަށް މުސްތަފާ ވިދާޅުވި އެވެ.
މުސްތަފާ ވިދާޅުވީ ކުރިއަށް އޮތް ރިޔާސީ އިންތިހާބު ކާމިޔާބުކުރުމަށް ރައީސް ޔާމީން ބޭނުންފުޅުވާކަމަށެވެ. އެހެންކަމުން ރައީސް ޔާމީން އެކަމުގައި އެއްވެސް މިންވަރަކަށް ދުލެއް ނުދޭނެ ކަމަށާއި، ކޮންމެ ބަޔަކު ކޮންމެ ވާހަކައެއް ދެކި ނަމަވެސް، އަދި ކޮންމެ ފަދަ ދަތިކުރުމުގެ ފިޔަވަޅެއް އެޅިނަމަވެސް، ދުލެއް ނުދެއްވާނެ ކަމަށެވެ.
"އަޅުގަނޑަށް ވަރަށް ރަނގަޅަށް އެނގޭ ރައީސް ޔާމީން. އަޅުގަނޑަށް ޔަޤީން ކަށަވަރު 2018 ވަނަ އަހަރުގެ އިންތިހާބަށްދާއިރު އެއްވެސް މީހަކު (ސިޔާސީ ހައްޔަރީ) ސަރުކަރުން ދޫކޮށްނުލާނެކަން" މުސްތަފާ ވިދާޅުވި އެވެ.
މުސްތަފާ ވިދާޅުވީ، ރައްޔިތުންގެ ތެރެއިން ކޮންމެ ދިހަ މީހަކުން އަށް މީހަކު ރައީސް ޔާމީނަށް ތާއީދުނުކުރާ ކަމަށެވެ. އެގޮތުން އިންތިހާބުގެ އެންމެ ފަހު ވަގުތު ވޯޓު ވިއްކާލާކަމަށް މުސްތަފާ ވިދާޅުވި އެވެ. އަދި ޤައުމުގެ ކަންކަން އިސްލާހުކުރުމުގެ ބާރުއޮތްބަޔަކީ ރައްޔިތުން ކަމަށާއި، އެ ބާރު ރައްޔިތުންނަށް އޮތްއިރު އެކަމުގައި އެހެންބަޔަކު ބަދުނާމުކުރާނެ ޖާގައެއް ނެތްކަމަށް މުސްތަފާ ވިދާޅުވި އެވެ.
