ޕަތީ ޕަތްނީ އޯރް ވޯ އަށް ފަސް ދުވަހުން 46 ކްރޯޑް
11 ޑިސެމްބަރު 2019 | ބުދަ 11:51ފިލްމު ރިލީޒް ކުރީ ހުކުރު ދުވަހު
ޕަތީ ޕަތްނީ އޯރް ވޯގެ ޕޯސްޓަރ
ވޭތުވެދިޔަ ހަފްތާގެ ހުކުރު ދުވަހު ރިލީޒްކުރި ''ޕަތީ ޕަތްނީ އޯރް ވޯ''އަށް ފަސް ދުވަހުން 46 ކްރޯޑް ރުޕީސް ހޯދައި، 50 ކްރޯޑު ހަމަކުރުމާއި ދިމާލަށް މިސްރާބު ޖަހައިފިއެވެ.
މި ފިލްމު ރިލީޒްކުރި ފުރަތަމަ ދުވަހު އާމްދަނީގެ ގޮތުގައި ލިބިފައިވަނީ ނުވަ ކްރޯޑްއެވެ. ހޮނިހިރު ދުވަހު 12 ކްރޯޑް ރުޕީސް ހޯދި އެ ފިލްމަށް އާދިއްތަ ދުވަހު ލިބުނީ 14 ކްރޯޑް އެވެ. ހޯމަ ދުވަހު ލިބުނު އާމްްދަނީއާ އެކު 62 ކްރޯޑްގެ ބަޖެޓަކުން ހަދާފައިވާ ފިލްމަށް މިހާތަނަށް 46 ކްރޯޑް ރުޕީސް ވަނީ ލިބިފައެވެ.
ފިލްމުގައި ހަރަކާތްތެރިވާ ތަރިންނަކީ، ''އާކާޝްވާނީ'' ފިލްމު އިން އާއްމުންގެ ތެރެއަށް މަޝްހޫރުވެގެން ދިޔަ ކާރްތިކް އާރްޔާން އާއި ބޮލީވުޑްގެ މަޝްހޫރު ކޮމެޑިއަން ޗަންކީ ޕާންޑޭގެ ދަރިފުޅު އިތުރުން އަނަންޔާ ޕާންޑޭގެ އިތުރުން ބޫމީ ޕެޑްނޭކަރްއެވެ.
ޕަތީ ޕަތްނީ އޯރް ވޯ މި ފިލްމުގައި ދައްކުވައިދެނީ އުއްތަރްޕްރަދޭޝްގެ ކާންޕޫރް ގައި ސަރުކާރުގެ ވަޒީފާއެއް އަދާކުރާ ޗިންޓޫ ތިޔާގީ (ކާތިކް) އާއި އޭނާގެ އަންހެނުން ވެދިކާ ތިޔާގީ (ބޫމީ) ގެ ދިރިއުޅުމުގެ ތެރެއަށް ތަޕަސްޔާ ސިންހް ( އަނަންޔާ) ކިޔާ އަންހެނަކު ވަނުމުން ދިމާވާ ކަންތައްތަކެެކެވެ.
މި ފިލްމަކީ ބާގްބާން ފަދަ މޮޅެތި ފިލްމުތައް އުފައްދާފައިވާ ބަލްދޭވް ރާޖް ކަޕޫރް 1978 ވަނަ އަހަރު ހަދާފައިވާ ހެއްވާ މަޖާ ފިލްމު ''ޕަތީ ޕަތުނީ އޮރް ވޯ'' ގެ ރިމޭކް އެކެވެ. ފިލްމު ޑައިރެކްޓް ކޮށްފައިވަނީ މުދައްސަރް އަޒީޒް އެވެ.
