"ހަސީނާ" ރިލީޒްކުރާނެ ތާރީހު އަނެއްކާ ވެސް ފަސްކޮށްފި

ބޮލީވުޑުގެ މަޝްހޫރު ބަތަލާ ޝްރަދާ ކަޕޫރުގެ އެންމެ ފަހުގެ ފިލްމު "ހަސީނާ" ރިލީޒްކުރާނެ ތާރީހު އަނެއްކާ ވެސް ފަސްކޮށްފިއެވެ.

މިފިލްމު ކުރިން މި އޮގަސްޓަ މަހުގެ 18 ވަނަ ދުވަހު ރިލީޒްކުރުމަށް ހަމަޖެހިފައި އޮތް ނަމަވެސް ފިލްމު ރިލީޒްކުރުން މިވަނީ އަނެއްކާ ވެސް ލަސްކޮށްފައި ވަނީ ކުރިއަށް އޮތް ދެ ހަފްތާ ބަންދުގައި ވެސް ބޮލީވުޑު މަޝްހޫރު ދެ ތަރިންގެ ބޮޑު ދެ ފިލްމު ބެލުންތެރިންނާ ހަމައަށް ރިލީޒް ކުރުމަށް ނިންމާފައި ވާތީ ކަމަށެވެ.

ފިލްމުގެ ޑައިރެކްޓަރު އަޕޫރްވަލާކިޔާ ބުނެފައި ވަނީ ކުރިއަށް އޮތް ހަފްތާ ބަންދު ދުވަސްތަކުގައި ޝާހްރުކް ޚާނާއި އަކްޝޭ ކުމާރުގެ ފިލްމު ރިލީޒްކުރާތީ އެފިލްމުތަކުގެ ސަބަބުން "ހަސީނާ"ގެ ވިޔަފާރި އަށް އެއްވެސް ނޭދެވޭ އަސަރެއްވާން ބޭނުން ނުވާ ކަމަށެވެ. އަދި މިފިލްމު ދެން ރިލީޒް ކުރާނެ ވަކި ތާރިޙެއް ވެސް އަންގާފައެއް ނުވެއެވެ. މިއީ މި ފިލްމު ރިލީޒްކުރުން ލަސްކުރި ހަތަރު ވަނަ ފަހަރެވެ.

ޒުވާން ބަތަލާ ޝްރަދާ ކަޕޫރު ވަނީ "ހަސީނާ" ގެ ޓްރެއިލާއާ އެކު ބެލުންތެރިން ހައިރާންކޮށްލާފަ އެވެ.

އިންޑިއާގެ އެންމެ ނުރައްކާތެރި ކުށްވެރިޔާ ދާއޫދުއިބްރާހީމްގެ ކޮއްކޮ، އަދި ކުށުގެ ދުނިޔޭގެ ރާނީގެ ގޮތުގައި ގިނަ ބަޔަކު ޤަބޫލުކުރާ ހަސީނާ ޕާކަރްގެ ހަޔާތުގެ މައްޗަށް އުފައްދާފައިވާ މިފިލްމުގެ ޓްރެއިލާއިން ޝްރަދާ ވަނީ ބެލުންތެރިން ހައިރާންކޮށްލާފައެވެ.

ޖުލައި 18 ވަނަ ދުވަހު ނެރުނު ޓްރެއިލާއަށް މިހާތަނަށް 7 މިލިއަން މީހުން ބަލާފައިވާއިރު ޝްރަދާގެ އެކްޓިންވަނީ ތަފާތު ލެވެލްއެއްގައި ކަމަށް ގިނަ ބަޔަކު ބުނެފައިވެއެވެ.

މި ފިލްމަކީ ޝްރަދާ މީހެއްގެ ހަޔާތުގެ މައްޗަށް ކުޅެފައިވާ ފުރަތަމަ ފިލްމު ކަމަށްވެފައި މިފިލްމުގައި ދެން ފެނިގެންދާނީ ޝްރަދާގެ އެއްބަނޑު އެއްބަފާ ބޭބެ ސިދާންތް ކަޕޫރެވެ. އަދި މިއީ ޝްރަދާ ނުބައިބައި ރޯލަކުން ފެނިގެންދާނެ ފުރަތަމަ ފަހަރުއެވެ. ނަމަވެސް ބައްޕަ ސަކްތީ ކަޕޫރަކީ ގިނަ ފިލްމްތަކެއްގައި ނުބައިބައި ރޯލު ކުޅެފައިވާ މަޝްހޫރު ފަންނާނެކެވެ.