ސައްބީސް އަހަރު ފަހުން އަމީތާބް ބައްޗަން އާއި ރިޝީ ކަޕޫރު އެކުގައި ފެނިގެންދާ ފުރަތަމަ ފިލްމު "102 ނޮޓް އައުޓް" ގެ ފަސްޓް ލުކް ދައްކާލައިފި އެވެ.
މި ފިލްމުގެ ފަސްޓްލުކް ދައްކާފައިވަނީ ޓުވިޓާ މެދުވެރިކޮށެވެ. "102 ނޮޓް އައުޓް" ގައި އަމީތާބާއި ރިޝީ ކަޕޫރު މި ފިލްމުގައި އަދާކުރަނީ ބައްޕައާއި ދަރިއެއްގެ ރޯލެވެ. މި ފިލްމުގައި އަމީތާބަކީ ރިޝީގެ ބައްޕައެވެ. 75 އަހަރުގެ އަމީތާބް ރިޝީއަށްވުރެ 10 އަހަރު ދިހަ އަހަރު ދޮއްޓެވެ. ރިޝީ ޓްވިޓާގައި ބުނީ އެހާ ގިނަ ދުވަސްތަކެއްފަހުން އަމީތާބާއެކު ފިލްމެއްކުޅެން ލިބުމަކީ ވަރަށް ހިތްހަމަޖެހި އުފާވާކަމެއްކަމަށެވެ. މި ފިލްމާއި ބެހޭގޮތުން މުމްބާއި މިރާގައި ބުނެފައިވަނީ ފިލްމުގެ ޝޫޓިން މެއިމަހުގެ 17 ގައި ފަށާފައިވާކަމަށެވެ. އަދި މިމަހުގެ ފަހުކޮޅާއިހަމައަށް ފިލްމުގެ މަސައްކަތް ކުރާނެކަމަށެވެ. އެއަށްފަހު ފިލްމުގެ ޝޫޓިން މެދުކަނޑާލުމަށްފަހު މިއަހަރުގެ ޖުލައިމަހުގެ ތެރޭގައި އަލުން ޝޫޓިން ފަށާނެކަމަށް އެ ނޫހުން ރިޕޯޓްކޯށްފައިވެއެވެ.
އަމީތާބާއި ރިޝީ ވަނީ 'ނަސީބް'، 'ކަބީ ކަބީ' އަދި 'އަމަރް އަކްބަރް އެންތަނީ' ފަދަ ފިލްމުތަކުގައި މަސައްކަތް ކޮށްފައެވެ. ދެ މީހުން އެކުގައި އެންމެ ފަހުން ފެނިގެން ގޮސްފައި ވަނީ 1991 ވަނަ އަހަރު ރިލީޒް ކުރި ފިލްމު 'އަޖޫބާ' އިންނެވެ.
