ކްލީން މޯލްޑިވްސްއާއި ސީނު ލޭންޑްސްކޭޕް ނާސަރީ ގުޅިގެން "ގޯ ގްރީން" ގެ ނަމުގައި، ހުޅުމާލޭ ފޭސް-2 ފެހިކުރުމުގެ ހަރަކާތެއް ކުރިޔަށް ގެންދަން ރާވައިފިއެވެ.

ހޮނިހިރު ދުވަހު ކުރިޔަށް ގެންދާ މި ހަރަކާތުގައި 2000 ގަސް އިންދުމަށް ހަމަޖެހިފައިވާ އިރު، އޭގެ ތެރޭގައި ހިމެނެނީ 1000 ރުކާއި، 1000 މަގޫ ގަހެވެ. އަދި މިއީ އާންމުންނަށް ހިލޭ ބައިވެރިވެވޭ ގޮތަށް ހުޅުވާލައިގެން ކުރިޔަށް ގެންދާ ހަރަކާތެއް ކަމަށް، މިކަން ރޭވުމުގައި އެންމެ އިސްކޮށް ހަރަކާތްތެރިވާ ކްލީން މޯލްޑިވްސްއިން ވަނީ މައުލޫމާތު ދީފައެވެ.

ގަސް އިންދުމުގެ އިތުރުން، ތަފާތު އެކި ވައްތަރުގެ ގަސް މި ހަރަކާތް ހިންގާ ސަރައްހައްދުގައި ހުންނަ ސްޓޯލަކުން ގަންނަން ލިބޭނެ ކަމަށްވެސް، ކްލީން މޯލްޑިވްސްއިން މައުލޫމާތު ދީފައިވެއެވެ. އަދި، ވިހާވެސް ތިމާވެއްޓާ ރައްޓެހިކޮށް މި ހަރަކާތް ކުރިޔަށް ގެންދިޔުމުގެ ގޮތުން، ބައިވެރިން އަމިއްލަ ފެން ފުޅި ހިފައިގެން އައުމަށްވެސް، ކްލީން މޯލްޑިވްސްއިން ވަނީ ބާރުއަޅާފައެވެ.

މިއީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ފުރިހަމަ އެއްބާރުލުމާއެކު ކުރިޔަށް ގެންދާ ހަރަކާތެކެވެ. އެގޮތުން ގަސް އިންދާ ސަރަހައްދުތަކުގައި ވަޅު ކޮނުމަށް ހަމަޖެހިފައިވަނީ އެޗްޑީސީންނެވެ.

ކްލީން މޯލްޑިވްސްއަކީ ރާއްޖޭގެ ތިމާވެށި ރައްކާތެރިކުރުމަށް ބާރުއަޅާ، މުޖުތަމައުގެ ފަރުދުންގެ މެދުގައި ތިމާވެށި ރައްކާތެރިކުރުމާއި ގުޅޭ ގޮތުން ހޭލުންތެރިކަން އިތުރުކުރުމުގެ މަގުސަދުގައި އުފައްދާފައިވާ އެންޖީއޯއެކެވެ.