އިންޓަރނޭޝަނަލް ފަންޑް ފޮރ އެގްރިކަލްޗަރަލް ޑިވެލޮޕްމަންޓް (އިފާޑް)އާއި މިނިސްޓްރީ އޮފް ފިޝަރީޒް، މެރިން ރިސޯސް، އެންޑް އެގްރިކަލްޗަރ ގުޅިގެން ކުރިއަށްގެންދާ [މެރިކަލްޗަރ އެންޓަރޕްރައިސް ޑިވެލޮޕްމަންޓް ޕްރޮޖެކްޓް] ގެ ދަށުން ޤާއިމުކޮށްފައިވާ އެކުއެޓިކް އެނިމަލް ހެލްތު ފެސިލިޓީ ހުޅުވައިފިއެވެ.
ހުޅުލޭގައި ޢިމާރާތްކޮށްފައިވާ މި ފެސިލިޓީ ބުރާސްފަތި ދުވަހު ހުޅުވައިދެއްވީ މިނިސްޓަރ ފޮރ ފިޝަރީޒް، މެރިން ރިސޯސް، އެންޑް އެގްރިކަލްޗަރ އޮނަރަބަލް ޒަހާ ވަހީދެވެ.
އެކުއަޓިކް އެނިމަލް ހެލްތު ފެސިލިޓީގެ މައިގަނޑު މަޤްޞަދަކީ މެރިކަލްޗަރ ކުރާ ކަނޑުގެ ދިރުމަށް ޖެހޭ ބަލިތަކަށް ސްކްރީން ކުރުމާއި، ޑައިގްނޯސްޓިކް ޓެސްޓްތައް ހެދުމާއި، ބަޔޯސެކިއުރިޓީ ކޮންޓްރޯލް ކުރުމުގެ ޚިދުމަތްތައް މެރިކަލްޗަރ ސިނާޢަތުގައި ޙަރަކާތްތެރިވާ ފަރާތްތަކަށް ފޯރުކޮށްދިނުމެވެ. މި ފެސިލިޓީގައި މުސްތަޤުބަލުގައި މޮލިކިއުލަރ ޑައިގްނޯސްޓިކްސް އާއި، ބެކްޓީރިއޮލޮޖީ އަދި ބޭސިކް ޕެރެސިޓޮލޮޖީގެ ޚިދުމަތްތަކަށް އެކަށީގެންވާ ޤާބިލުކަން އުފެއްދުމަށް ވަނީ ރޭވިފައެވެ. މީގެ އިތުރުން ރައްކާތެރިކަމާއިއެކު ކަނޑުގެ ދިރުން ރާއްޖެއަށް އެތެރެކުރުމަށްޓަކައި އެކުއެޓިކް ބަޔޯސެކިއުރިޓީގެ ދާއިރާ މި ފެސިލިޓީއާއިއެކު ރާއްޖޭގައި ތަރައްޤީވެގެން ދާނެއެވެ. މެރިކަލްޗަރ ކުރުމުގައި ބަލިތަކުގެ ސަބަބުން ދިމާވާ ބޮޑެތި އިޤްތިޞާދީ ގެއްލުންތަކުން ސަލާމަތްވެތިބުމަށްޓަކައި، ރާއްޖޭގައި މެރިކަލްޗަރ ތަރައްޤީކުރުމަށް ކުރެވޭ މަސައްކަތްތަކުގެ ތެރޭގައި އެކުއެޓިކް އެނިމަލް ހެލްތުގެ ދާއިރާއިން ޤާބިލުކަން އުފެއްދުމަކީ ސަރުކާރުން އިސްކަންދޭ ކަމަށް ފިޝަރީޒް މިނިސްޓްރީން ބުނެއެވެ.
އިފާޑުގެ އެހީގައި މިހިންގުނު މެރިކަލްޗަރ އެންޓަރޕްރައިޒް ޑިވެލޮޕްމަންޓް ޕްރޮޖެކްޓުގެ ދަށުން ވާނީ މެރިކަލްޗަރ ސިނާޢަތަށް ބޭނުންވާ އެކުއެޓިކް އެނިމަލް ހެލްތު ސްޓްރެޓަޖީއެއް އެކުލަވާލެވިފައެވެ. މިއަދު ހުޅުވިގެން މި ދިޔަ އެކުއެޓިކް އެނިމަލް ހެލްތު ފެސިލިޓީއަކީ މި ސްޓްރެޓެޖީގައި، ބަޔޯސެކިއުރިޓީއާއި އެކުއެޓިކް އެނިމަލް ހެލްތު ގެ ދާއިރާއިން ފާހަގަ ކުރާ ކަންތައްތައް ތަންފީޒުކުރުމަށް މުހިންމު ބިނާއެކެވެ. މިފެސިލިޓީގެ ލެބޯރެޓަރީ ޤާއިމުކުރުމާއި، ލެބޯރަޓަރީއަށް ބޭނުންވާ ސާމާނު ހޯދުމާއި، ފެސިލިޓީ ހިންގުމަށް ބޭނުންވާ މީހުން ތަމްރީނުކޮށްފައިވަނީ މެރިކަލްޗަރ އެންޓަރޕްރައިސް ޑިވެލޮޕްމަންޓް ޕްރޮޖެކްޓުގެ ފަރާތުންނެވެ. އަދި ފެސިލިޓީގެ ޢިމާރާތް ހަދާފައިވަނީ ސަރުކާރުގެ ފަރާތުންނެވެ.
