ރާއްޖެޓީވީން ހުޅުވާފައިވާ "އަބުރު ފަންޑު"އަށް ފައިސާ ހޯދުމަށް ދިއްދޫއާއި ކުރެންދޫއިން ފަންޑު ފޮއްޓެއް ހުޅުވައިފި

ރާއްޖެޓީވީން ހުޅުވާފައިވާ "އަބުރު ފަންޑު"އަށް ފައިސާ ހޯދުމަށް ހއ. ދިއްދޫއާއި ޅ. ކުރެންދޫގައި ފަންޑު ފޮއްޓެއް ބަހައްޓައިފި އެވެ.

އެމްޑީޕީ ހއ. ދިއްދޫ ދާއިރާގެ ސެކެރެޓަރީ ޖެނެރަލް އަލީ ހާޝިމް އާދިއްތަ ދުވަހު ވިދާޅުވީ ރާއްޖެޓީވީން ހުޅުވާފައިވާ އަބުރު ފަންޑަށް އެހީވުމުގެ ގޮތުން އާދިއްތަ ދުވަހުގެ މެންދުރުފަހު 14:00 އެރަށުގައި ފަންޑު ފޮއްޓެއް ބަހައްޓާނެ ކަމަށެވެ.

ޅ. ކުރެންދޫ އަންހެނުން ރޫހުގެ ފަރާތުން މައުލޫމާތު ދިން މީހަކު ބުނީ ހޮނިހިރު ދުވަހު އެރަށުގައި ފަންޑު ފޮއްޓެއް ބަހައްޓާފައިވާ ކަމަށެވެ.

އެ ދެ ރަށުން ވެސް ބުނީ އަބުރުގެ ގާނޫނުގެ ދަށުން ހިޔާލު ފާޅުކުރުމުގެ މިނިވަންކަން ނަގާލާ ސަރުކާރުން ރާއްޖެޓީވީއާ މެދު އަޅަމުންދާ ފިޔަވަޅުތައް ގަބޫލު ކުރެވޭ ކަމަށާއި ރާއްޖެޓީވީ ބޮޑެތި އަދަދު ތަކުން ޖޫރިމަނާ ކުރާއިރު އެކަމަށް ބޭނުންވާ ފައިސާ ހޯދުމަށް ކުރެވެންހުރި މަސައްކަތްތައް ކުރަމުން ގެންދާނެ ކަމަށެވެ.

"އަބުރު ފަންޑު"ގެ ނަމުގައި ރާއްޖެޓީވީން ފަންޑެއް ހުޅުވީ ބްރޯޑްކާސްޓިންގ ކޮމިޝަނުން ރާއްޖެޓީވީ 200،000ރ އިން ޖޫރިމަނާކޮށް ރައްޖެޓީވީގައި ކުރިން މަސައްކަތްކުރި ނޫސްވެރިޔަކު 50،000ރ އިން ޖޫރިމަނާކުރުމާއި ގުޅިގެންނެވެ.

މީގެ އިތުރުން، ރާއްޖެޓީވީގެ ނޫސްވެރިންނަށް ކްރިމިނަލް ކޯޓުގައި ހިންގާފައިވާ ޝަރީއަތްތަކުން، ރާއްޖެޓީވީގެ ދެ ނޫސްވެރިން ކަމަށްވާ މުހައްމަދު ވިސާމް އާއި ލީވާން އަލީ ނާސިރު، އެއިން ކޮންމެ ނޫސްވެރިއެއް 28،000ރ އިންޖޫރިކޮށްފައިވާއިރު، ކެމެރާމަން އާދަމް ޒަރީރު 3،000ރ އިން ވަނީ ޖޫރިމަނާ ކޮށްފަ އެވެ.

މީގެ އިތުރުން، ވިސާމުގެ މައްޗަށް އިތުރު ދައުވާއެއްގެ ޝަރީއަތް ހިންގަމުންދާއިރު، ރާއްޖެޓީވީގެ ސީއޯއޯ ހުސައިން ފިޔާޒު މޫސާގެ މައްޗަށް ވެސް ދަނީ ޝަރީއަތް ހިންގަމުންނެވެ.