ޑީޖޭއޭއިން ސުޕްރީމް ކޯޓުގެ ޑިރެކްޓަރަކު ސަސްޕެންޑްކޮށްފި
12 ނޮވެމްބަރު 2019 | އަންގާރަ 12:20އާތިކާ ސަސްޕެންޑްކޮށްފައިވަނީ މައްސަލަ ތަހުގީގުކޮށް ނިންމާ ވަކިގޮތެއް އަންގަންދެން
ދިވެހިރާއްޖޭގެ ސުޕްރީމް ކޯޓު
ތަހުގީގުކުރަމުން އަންނަ މައްސަލަތަކަކާއި ގުޅިގެން ސުޕްރީމް ކޯޓުގެ ޕްރޮޓޮކޯލް ޑިވިޟަންގެ ޑިރެކްޓަރު އާތިކާ އިބްރާހިމް ސަސްޕެންޑްކޮށްފިއެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން އާތިކާ ސަސްޕެންޑްކޮށްފައިވަނީ، ތަހުގީގު ނިންމައި އެ އިދާރާއިން ވަކި އެއްޗެއް އަންގަންދެނެވެ. މައުލޫމާތު ލިބިފައިވާ ގޮތުގައި އާތިކާ ވަނީ ކުރިން އުއްތަމަ ފަނޑިޔާރުގެ ޕީއޭގެ މަގާމު ވެސް އަދާކުރައްވާފައެވެ.
އާތިކާ ސަސްޕެންޑްކޮށްފައިވަނީ، އުއްތަމަ ފަނޑިޔާރާއި ޖޭއެސްސީއާ ދެމެދު މައްސަލަ ގޯސްވެފައިވާ ދަނޑިވަޅެއްގައެވެ. އުއްތަމަ ފަނޑިޔާރު ވަނީ ޖޭއެސްސީއަށް ހާޒިރުވުމަށް އެދި ފޮނުވި ނޯޓިސްއާ ހަވާލުވެވަޑައިގަތުމަށް ދެކޮޅު ހައްދަވާފައެވެ.
އުއްތަމަ ފަނޑިޔާރުގެ 18 ސުލޫކީ މައްސަލައެއް ޖޭއެސްސީއިން ބަލަމުން އަންނައިރު، އެ މައްސަލަތައް ބެލުމުގެ ގާނޫނީ އަސާސެއް ނެތްކަމަށް ބުނެ އުއްތަމަ ފަނޑިޔާރު ވަނީ ބަޔާނެއް ވެސް ނެރުއްވާފައެވެ. އެގޮތުން ފަނޑިޔާރަކު ނިންމާ ނިންމުމަކާ ގުޅިގެން އެ ފަނޑިޔާރެއްގެ ސުލޫކީ މައްސަލައެއް ނުބެލޭނެ ކަމަށް އުއްތަމަ ފަނޑިޔާރު ވަނީ ކުރިން ވެސް ވިދާޅުވެފައެވެ.
އޭގެއިތުރުން އުއްތަމަ ފަނޑިޔާރު ވަނީ، ޖޭއެސްސީގެ ދަށަށް ޑީޖޭއޭ ގެންދިއުމާއި ގުޅިގެން އެކަމާ ނުރުހުން ފާޅުކުރައްވާއެވެ. އެގޮތުން ފަނޑިޔާރުގޭގެ އިދާރީ ހިންގުމުގެ ނިޒާމް ހުއްޓުމަކަށް އައިސްފައިވާ ކަމަށް ބުނެ އެމަނިކުފާނު ވަނީ ކަންބޮޑުވުން ފާޅުކުރައްވާފައެވެ. ޖޭއެސްސީގެ ދަށަށް ޑީޖޭއޭ ގެންދެވުނީ ޖުޑީޝަލް ސަރވިސް ކޮމިޝަންގެ ގާނޫނަށް އެންމެ ފަހުން ގެނައި އިސްލާހާ އެކުގައެވެ.
