ހައިކޯޓުގެ އެކިގޮފިތަކަށް ފަނޑިޔާރުން ބަދަލުވެވޭގޮތަށް، ހައިކޯޓުގެ ގޮފިތަކަށް ފަނޑިޔާރުން ހަމަޖެއްސުމުގެ ގަވައިދު ސުޕްރީމް ކޯޓުން އެކުލަވާލައި އާންމުކޮށްފި އެވެ.

ދިވެހިރާއްޖޭގެ ހައިކޯޓު ދެ ފަޅިކޮށްލާ، ހައި ކޯޓުގެ އުތުރު ގޮތްޕާއި، ދެކުނު ގޮފި ޤާއިމްކުރުމަށް 2014 ވަނަ އަހަރު ކޯޓުތަކުގެ ޤާނޫނަށް ގެނައި އިސްލާހުގެ ދަށުން، ސުޕްރީމް ކޯޓުން އާންމުކޮށްފައިވާ ގަވައިދުގައި ބުނެފައިވަނީ، ހައިކޯޓުގެ ގޮފިތަކަށް އެކޯޓުގެ ފަނޑިޔާރުންގެ ތެރެއިން ފަނޑިޔާރުން ހަމަޖެއްސުމުގައި ޢަމަލު ކުރާނެ ގޮތުގެ އުޞޫލުތައް ކަނޑައަޅާނީ އެ ގަވައިދުގެ ދަށުންކަމަށެވެ.

ޤަވައިދުގައިވާގޮތުން ގޮފިތަކަށް ފަނޑިޔާރުން ހަމަޖައްސާނީ ރޮޓޭޓްވާ އުސޫލުންނެވެ. އެގޮތުން ކޮންމެ އެއް އަހަރަކުން ފަނޑިޔާރުން، އެހެން ގޮފިތަކަށް ބަދަލުވެވޭނެ ކަމަށް ޤަވައިދުގައި ބުނެފައިވެއެވެ. އަދި އެގޮތަށް ބަދަލުވެވޭނީ މިހާރު ހައިކޯޓުގައި ތިއްބެވި ފަނޑިޔާރުން ކަމަށްވެސް ގަވައިދުގައި ބުނެފައިވެއެވެ.

ގަވައިދުގައި ހައިކޯޓުގައި މިވަގުތު ތިބި ފަނޑިޔާރުންނަށް ރޮޓޭޓްވެވޭނެކަމަށް ބުނެފައިވީނަމަވެސް އަލަށް ފަނޑިޔާރުން އައްޔަނުކުރާނީ ހުސްވާ ގޮފިތަކުގެ ފަނޑިޔާރުންނަށް ކަމަށް ބުނެފައިވެއެވެ. އަދި އަލަށް އައްޔަނުކުރާ ފަނޑިޔާރުންނަށް ރޮޓޭޓްވެވޭނެކަމަށް ގަވައިދުގައި ބުނެފައެއް ނުވެއެވެ.

ކޯޓުތަކުގެ ގާނޫނަށް 2014 ވަނަ ހުށަހެޅި އިސްލާހު ރައްޔިތުންގެ މަޖިލީހުން ފާސްކުރުމާ ގުޅިގެން ރާއްޖޭގެ އުތުރާއި ދެކުނުގައި ހައިކޯޓުގެ ދެ ގޮފި ގާއިމް ކުރުމަށް ގާނޫނު ލާޒިމް ކުރެ އެވެ. ގާނޫނުގައި ބުނެފައި ވަނީ ގާނޫނު ފާސްކޮށް ގެޒެޓުގައި ޝާއިއުކުރާތާ 90 ދުވަސްތެރޭގައި ރާއްޖޭގެ އުތުރާއި ދެކުނުގައި ހައިކޯޓުގެ ގޮފި ގާއިމް ކުރަން ޖެހޭނެ ކަމަށެވެ. ރާއްޖޭގެ ދެކުނުން އައްޑޫ ސިޓީގައި މިހާރު ހައި ކޯޓުގެ ގޮތްޕެއް ގާއިމުކޮށްފައިވާ އިރު އުތުރު ގޮފި ގާއިމްކޮށްފައިވަނީ ނިންމާފައިވާ ހދ. ކުޅުދުއްފުށީގައެވެ. ނަމަވެސް ހައިކޯޓުގެ އުތުރު ގޮފީގެ މަސައްކަތްތައް އަދިވެސް ނުފެށިވާއިރު، މާލެ ހައިކޯޓަށް ވެސް އަދި ވަނީ ފަނޑިޔާރުން ހަމަނުވެ އެވެ. ދެ ފަނޑިޔާރަކު ހޯދުމަށް އިއުލާން ކުރި ނަމަވެސް އަދި ފަނޑިޔާރުން ހޮވާފައެއް ނުވެ އެވެ. ދެކުނު ގޮފީގައި މިހާރު ޝަރީއަތްތައް ކުރިއަށް ގެންދެ އެވެ.

ހައިކޯޓުގެ ފަނޑިޔާރުކަމުގައި ކުރިން ހުންނެވި ޑރ. އަޒްމިރަލްދާ ޒާހިރު ފަނޑިޔާރުކަމުން އިސްތިއުފާދެއްވީ، ހައިކޯޓުގެ ދެކުނު ގޮތްޕަށް އައްޔަނުކުރުމަށްފަހު، އެހެން ގޮތްޕަކަށް ބަދަލުނުކޮށްދިނުމުގެ ސަބަބުނެވެ. އާއިލީ ކަންތައްތައް ހުރިގޮތުން އެހެން ގޮތްޕަކަށް ބަދަލުކޮށްދިނުމަށް އަޒްމިރަލްދާ ތަކުރާރުކޮށް އެދުނުނަމަވެސް އެކަމަށް އެއްވެސް އިދާރާއަކުން އިޖާބައެއްދީފައެއް ނުވެއެވެ.