ރައީސް ނަޝީދު އައްޑޫ ސިޓީ އަށް!
2 ނޮވެމްބަރު 2019 | ހޮނިހިރު 08:33ރައީސް ނަޝީދު އައްޑޫ ސިޓީއަށް ވަޑައިގަތީ ހޮނިހިރު ދުވަހު މެންދުރު
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އައްޑޫ ސިޓީއަށް ވަޑައިގެން ސަޕޯޓަރުންނާއި ސަލާމްކުރައްވަނީ
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އައްޑޫ ސިޓީއަށް ވަޑައިގެންފިއެވެ.
ދެކުނުގެ ހަތަރު އަތޮޅަކަށް ކުރައްވަމުން ގެންދަވާ ދަތުރުފުޅުގައި ރައީސް ނަޝީދު އައްޑޫ ސިޓީއަށް ވަޑައިގެންފައިވަނީ ހޮނިހިރު ދުވަހު މެންދުރުއެވެ.
ރައީސް ނަޝީދު އައްޑޫ ސިޓީއަށް ވަޑައިގަތުމުން އެރަށުން ވަނީ ނަޝީދަށް ހޫނު މަރުހަބާއެއް ދަންނަވާފައެވެ. ރައީސް ނަޝީދުގެ މި ދަތުރުފުޅުގައި ހޮނިހިރު ދުވަހު މެންދުރު އައްޑޫ ސިޓީގައި ހުރި އެމްޑީޕީގެ ހަރުގެތަކަށް ޒިޔާރަތްކުރައްވާ މެންބަރުންނާއި ބައްދަލުކުރެއްވުމަށް ވަނީ ހަމަޖެހިފައެވެ.
މީގެ އިތުރުން ހޮނިހިރު ދުވަހު ހަވީރު 4:00 ގައި ހިތަދޫ ޔޫތް ސްޓޭޑިއަމްގައި ބޭއްވުމަށް ހަމަޖެހިފައިވާ ފެނަކަ ފުޓްސަލް މުބާރާތް ފައްޓަވައިދެއްވުމަށް ވަނީ ހަމަޖެހިފައެވެ.
މީގެ އިތުރުން ރޯއިިން އެސޯސިއޭޝަނުން ބާއްވާ އައްޑޫ އިންޓަރސްކޫލް ރޯއިން މުބާރާތް ނިންމުމުގެ ރަސްމިއްޔާތުގައި ބައިވެރިވެ ވަޑައިގަތުމަށް ވަނީ ހަމަޖެހިފައެވެ.
ރައީސް ނަޝީދު ދެކުނަށް ކުރައްވާ މި ދަތުރުފުޅުގައި ވަނީ ގދ. ތިނަދޫއާއި ގއ. ވިލިނގިލި އަދި ފުވައްމުލަކު ސިޓީއަށްވެސް ވަޑާއިގެންފައެވެ.
ރައީސްގެ މި ދަތުރުފުޅުގައި މި ދާއިރާތަކަށް ނިސްބަތްވެ ވަޑާއިގަންނަވާ ގިނަ އަދަދެއްގެ ރައްޔިތުންގެ މަޖިލީހުގެ މެންބަރުން ބައިވެރިވެ ވަޑައިގަންނަވައެވެ.
