އެމްއެންޑީއެފް ފުޓްސަލް ޗެލެންޖުގެ ޗެމްޕިއަންކަން އެމްއެންޑީއެފް ފަޔަރ އެންޑް ރެސްކިއު ސަރވިސް ހޯދައިފި

ސިފައިންގެ ޔުނިޓްތަކުގެ މެދުގައި ކުޅުނު އެމްއެންޑީއެފް ފުޓްސަލް ޗެލެންޖު 2019 ގެ ޗެމްޕިއަންކަން ޖެހިޖެހިގެން ހަވަނަ ފަހަރަށް ފަޔަރ އެންޑް ރެސްކިޔު ސަރވިސް (އެފްއާރުއެސް) ހޯދައިފިއެވެ.

މުބާރާތް ނިންމުމުގެ ގޮތުން ބުދަ ދުވަހުގެ ރޭ ބޭއްވި ރަސްމިއްޔާތު ޝަރަފުވެރިކޮށްދެއްވައި މުބާރާތުގެ ޗެމްޕިއަން ޓީމަށާއި ރަނަރަޕް ޓީމަށް ތައްޓާއި މެޑެލް ހަވާލުކޮށްދެއްވީ މިނިސްޓަރ އޮފް ޑިފެންސް މާރިޔާ އަޙްމަދު ދީދީއެވެ.

މި މުބާރާތުގެ ޗެމްޕިއަންކަން އެފްއާރުއެސްއިން ހޯދާފައިވަނީ އިންޓެގްރޭޓެޑް ހެޑްކުއޯޓަރޒް އާއި ބައްދަލުކޮށް 3-2 ލަނޑުން މޮޅުވެގެންނެވެ. މި މެޗުގެ މޭން އޮފް ދަ މެޗަކަށް ހޮވުނީ، އެފްއާރުއެސްގެ ޖަރޒީ ނަމްބަރު 10 ސާޖަންޓް ޝައުކަތު އަމީނެވެ.

މުބާރާތުގެ ފައިނަލް މެޗަށްފަހު މުބާރާތުގެ އެކިއެކި ވަނަތަކަށް ހޮވުނު ފަރާތްތަކަށާއި، މުބާރާތް ރާވާ އިންތިޒާމްކުރި ފަރާތްތަކުގެ އިތުރުން، ދިވެހި ސިފައިންގެ ކުލަބަށް އެކި ގޮތްގޮތުން އެހީތެރިކަން ފޯރުކޮށްދެއްވި ފަރާތްތަކަށް ވަނީ ތައްޓާއި މެޑަލް ހަވާލުކޮށްދެއްވާފައެވެ.

މިމަހުގެ 6 ވަނަ ދުވަހުން ފެށިގެން ކަޅުތުއްކަލާކޮށީގައި ކުރިއަށްދިޔަ މި މުބާރާތުގައި އެމްއެންޑީއެފްގެ އެކި ޔުނިޓްތަކުން ޖުމުލަ 22 ޓީމެއް ވާދަކުރިއެވެ.