އަނެއް ދިވެހިރާއްޖެއަށް ދާން ބޭނުމެއް ނޫން: ގާސިމް
މި ގައުމު ފަސާދަ ކުރަން ރައްޔިތުން ޖާގަ ނުދޭނެ ކަމަށް ވިދާޅުވި
ޖޭޕީގެ ލީޑަރ ގާސިމް އިބްރާހިމް
ބަޔަކު މީހުން އަނެއް ދިވެހިރާއްޖެއަށް ދާން ބޭނުންވި ނަމަވެސް ޖުމްހޫރީ ޕާޓީން އަނެއް ދިވެހިރާއްޖެ އަށް ދާން ބޭނުންނުވާކަމަށް ޖުމްހޫރީ ޕާޓީ(ޖޭޕީ)ގެ ލީޑަރ ޤާސިމް އިބްރާހިމް ވިދާޅުވެއްޖެ އެވެ.
ޖޭޕީއާއި އަލަށް ގުޅުނު މެންބަރުންތަކެއް ސޮއިކުރުމަށް ބުދަ ދުވަހުގެ ރޭ ބޭއްވި ޙަފުލާގައި ވާހަކަ ދައްކަވަމުން ޤާސިމް ވިދާޅުވީ މީގެ އެއްހާސް އަހަރު ކުރިން ޣައިރު މުސްލިމް ޤައުމެއްގެ ގޮތުގައި ދިވެހިރާއްޖެ އޮތް އިރުގެ ވާހަކަ ދައްކާ އަޑު އިވެމުންދާ ކަމަށާއި އެވާހަކަ ދައްކަވާ ބޭފުޅުން އެނގިވަޑައިގަންނަވާކަމަށެވެ.
ޤާސިމުގެ ވާހަކަފުޅުގައި އެމްޑީއެންގެ ރިޕޯޓާއި މެދު އެމަނިކުފާނު ގެންގުޅުއްވާ ވިސްނުންވެސް ހާމަކުރެއްވިއެވެ. އެރިޕޯޓާއި ދެކޮޅުކަން ހާމަކުރައްވާ ވިދާޅުވީ އެރިޕޯޓުގެ އަޑު އޮއްބާލަން ބަޔަކު އުޅުނު ކަމުގައި ވިޔަސް އެކަމަށް ދިވެހި ރައްޔިތުން ފުރުޞަތު ނުދޭނެ ކަމަށެވެ.
މަޖިލީހުގެ ރައީސް އަދި މައްޗަންގޮޅި މެދު ދާއިރާގެ މެންބަރު ރައީސް މުހައްމަދު ނަޝީދަށް އިޝާރާތް ކުރައްވާ ޤާސިމް ވިދާޅުވީ އެބޭފުޅާއަށް ސަރުކާރުގެ ތެރޭގައި ދޭތެރެ ޖައްސާ މި ސަރުކާރު ވައްޓާލަން ފުރުޞަތު ނުދޭނެ ކަމަށް ރައްޔިތުންގެ މަޖިލީހުގެ މެންބަރަކު ދާދި ފަހުން ވިދާޅުވި ކަމަށެވެ. ނަމަވެސް އެވާހަކަތައް ޤަބޫލުކުރާނެ ބަޔަކު ނެތް ކަމަށާއި އެޖައްސަވާ ކުޅިގަނޑު ނޭނގޭ އެކަކުވެސް ނޫޅޭ ކަމަށް ގާސިމް ވިދާޅުވިއެވެ. އަދި މި ޤައުމު ފަސާދަ ކުރަން ރައްޔިތުން ޖާގަ ނުދޭނެ ކަމަށެވެ.
ޤާސިމް ވިދަޅުވީ އެމްޑީއެން މައްސަލައިގައި ސަރުކާރުން ފިޔަވަޅު ނާޅާ ނުތިބޭނެ ކަމަށެވެ. ކުޑަތަންކޮޅެއް ލަސްވެގެންދާ ދިއުމަކީ ޢަދުލު އިންސާފުގެ ތެރެއިން ކަންތައް ކުރެއްވުމަށްޓަކައި ވެރިކަމާ ޙަވާލުވެވަޑައިގެން ހުންނެވި ރައީސުލްޖުމްހޫރިއްޔާގެ އިރުޝާދާއި ލަފާފުޅުގެ މަތިން ކަމަށް ވެދާނެ ކަމަށް ޤާސިމް ވިދާޅުވިއެވެ.
ޤާސިމް ވިދާޅުވީ ކަމާގުޅުންހުރި މުޢައްސަސާތަކުން ޤާނޫނީ ވާޖިބު ޢަދާނުކޮށް ނުތިބޭނެ ކަމަށެވެ. އެމްޑީއެން އުވާލުމަކުން އެ މައްސަލަ ނުނިމޭ ކަމަށާއި ރިޕޯޓުގައި މަސައްކަތް ކުރި ފަރާތްތަކާއި މެދު ކޮންމެ ތަނެއްގައި ތިބި ނަމަވެސް ފިޔަވަޅު އެޅެންޖެހޭނެ ކަމަށް ވިދާޅުވިއެވެ.
