ޓެރަރިޒަމް ބިލް ތަސްދީގު ކުރައްވާނެ ދުވަހެއް އަދި ނޭނގޭ: ހޫދު
ބިލް ފާސް ކޮށްފައިވަނީ ސެޕްޓެމްބަރު މަހުގެ 30 ވަނަ ދުވަހު
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
ކަންބޮޑުވުން އިންތިހާއަށް ހުރިކަމަށް ބުނެ މަޖިލީހުގެ ދައުރުން ބޭރުގައި ޖަލްސާތައް ބާއްވާ، ފާސްކުރި ޓެރަރިޒަމް މަނާ ކުރުމުގެ ގާނޫނުގެ ބިލް ރައީސް އިބްރާހިމް މުހައްމަދު ސޯލިހު ތަސްދީގު ކުރައްވާނެ ދުވަހެއްގެ މައުލޫމާތު އެނގިނުލައްވާކަމަށް ރައީސް އޮފީހުގެ ޗީފް ކޮމިއުނިކޭޝަންސް ސްޓްރެޓެޖިސްޓުގެ އިބްރާހިމް ހޫދު ވިދާޅުވެއްޖެއެވެ.
މަޖިލީހުގެ ދައުރުން ބޭރުގައި ބޭއްވި ތިން ވަނަ ޖަލްސާގައި އެ ބިލް ފާސް ކޮށްފައިވަނީ ސެޕްޓެމްބަރު މަހުގެ 30 ވަނަ ދުވަހުއެވެ. އެ ބިލް ފާސްކުރިތާ ގާތްގަނޑަކަށް ހަ ދުވަސްވެފައިވާއިރު ރައީސް އެ ބިލް ތަސްދީގުކުރައްވާފައެއް ނުވެ އެވެ. ބިލް ތަސްދީޤްކުރައްވަނީ ކޮން ދުވަހަކުތޯ ސުވާލުކުރުމުން ތަރުޖަމާނު ހޫދު ވިދާޅުވީ އެކަހަލަ މައުލޫމާތެއް އެނގި ނުލައްވާކަމަށާއި ބުރާސްފަތި ދުވަހުގެ ކުރިން ޖަވާބެއް ދެއްވާނެ ކަމަށެވެ.
ހަބަރު ޝާއިރުކުރިތާ ކުޑަވަގުތުކޮޅެފަހުން ރާއްޖެ.އެމްވީއަށް ގުޅުއްވައި ހޫދު ވިދާޅުވީ ބިލް މިހާރު ވަނީ ބަންޑާރަ ނައިބްގެ އޮފީހުގައިކަމަށެވެ.
ގެއްލުވާލާފައިވާ މީހުންނާއި މަރާލައިފައިވާ މީހުންގެ ކޮމިޝަންގެ މަސައްކަތްތައް ކުރިއަށް ގެންދިއުމަށް ބައެއް ގާނޫނުތަކަށް ބަދަލު ގެންނަންޖެހޭކަމާއި އެގޮތުން ޓެރަރިޒަމްގެ ގާނޫނާއި، ޖިނާއީ އިޖުރާއަތުގެ ގާނޫނަށް ބަދަލު ގެންނަންޖެހޭ ކަމަށް ރައީސް ސޯލިހު ވަނީ ނޫސްވެރިންނާއި ބައްދަލުކުރައްވައި ދެއްކެވި ވާހަކަފުޅުގައި ވިދާޅުވެފައެވެ.
ޓެރަރިޒަމްގެ ގާނޫނަށް ގެނައި އިސްލާހުގެ ތެރޭގައި ހައްޔަރު ކުރެވޭ މީހާއާއިއެކު އޭނާގެ ގާނޫނީ ވަކީލަކާއެކު ބައްދަލުވުމުގެ ފުރުސަތު ހައްޔަރު ކުރާ މުއްދަތުން ފެށިގެން ހަތް ދުވަހުގެ މުއްދަތަށް ނުދީ ހިފެހެއްޓިދާނެގޮތަށް ވަނީ ބަދަލު ކޮށްފައެވެ. އަދި އެ ފުރުސަތު ހަނިކުރަންޖެހޭނެ ފަދަ ހާލަތެއް އޮތްކަމަށް ފުލުހުންނަށް ފެނިއްޖެނަމަ ޕްރޮސެކިއުޓަރ ޖެނެރަލްގެ ހުއްދަ އާއެކު ހަތް ދުވަހުގެ މުއްދަތަށް އިތުރު ކުރެވިދާނެކަމަށް ވަނީ ބަދަލު ކޮށްފައެވެ.
ޓެރަރިޒަމްގެ އަމަލުތަކުގެ ތެރޭގައި ހިމެނޭ ކަންކަމުގެ ތެރޭގައި މީހެއްގެ ހަށިގަނޑަށް ބޮޑު އަނިޔާއެއް ދިނުމާއި ކުށްކުރާ މީހާ ފިޔަވައި އެހެން މީހެއްގެ ފުރާނައަށް ނުރައްކަލެއް ކުރިމަތިކުރުވުމާއި ބައެއްގެ ސަލާމަތަށް ބޮޑު ނުރައްކަލެއް ވާ ހާލަތެއް ކުރިމަތިކުރުވުން ވަނީ ހިމަނާފައެވެ. އަދި ގަދަކަމުން މީހަކު ފޮރުވުން ނުވަތަ ރަހީނެއްގެ ގޮތުގައި ހިފެހެއްޓުމާއި މުދަލަށް ބޮޑެތި ގެއްލުން ދިނުމާއި ފަސިންޖަރުން ނުވަތަ މުދާ އުފުލާ އުޅަނދެއް ހައިޖެކް ކުރުން ހިމެނެއެވެ.
ޓެރަރިޒަމްގެ އަމަލުތަކުގެ ތެރޭގައި ހިމެނޭ ކަންކަން ކުރަން އުޅޭ ކަމަށް ތުހުމަތު ކުރެވޭނަމަ ކޯޓު އަމުރެއް ނެތި ހައްޔަރު ކުރުމުގެ ބާރު ފުލުހުންނަށް އޮތީ ލިބިދީފަ އެވެ. ޓެރަރިޒަމްގެ އަމަލެއް ކުރަން ރާވާ މީހާ ހައްޔަރު ކުރަން ވެސް ބިލްގައިވާ ގޮތުން ކޯޓު އަމުރެއް ހޯދާކަށް ނުޖެހޭނެ އެވެ.
ކޯޓު އަމުރެއް ނެތި ފުލުހުންނަށް ހައްޔަރު ކުރެވޭނެ ހާލަތްތައް ބިލުގައި ހިމަނާފައިވާއިރު ހަނގުރާމަވެރި ހަތިޔާރު ނުވަތަ ގޮވާ ތަކެތި ނުވަތަ ފަނާކުރަނިވި މާއްދާ ހިމެނޭ އެއްޗެއް ނުވަތަ އެއާ އެއްފަދަ އެއްޗެއް އުފެއްދުން ނުވަތަ ބޭނުންކުރާ ނަމަ އަދި ހަނގުރާމަވެރި ހަތިޔާރު ނުވަތަ ގޮވާ ތަކެތި ނުވަތަ ފަނާކުރަނިވި މާއްދާ ހިމެނޭ އެއްޗެއް ނުވަތަ އެއާ އެއްފަދަ އެއްޗެއް އުފެއްދުން ނުވަތަ ބޭނުންކުރާނަމަ، ހައްޔަރު ކުރެވޭނެކަމަށް ވަނީ ބުނެފައެވެ.
