ކައުންސިލްތަކުގެ އިންތިޚާބުތަކުގައި ވާދަކުރާ ފަރާތްތަކުގެ ކިބައިގައި ހުންނަންޖެހޭ ޝަރުތުތައް ބަދަލުކުރުމަށް ލޯކަލް ކައުންސިލް އިންތިޚާބުތަކުގެ ގާނޫނަށް ސަރުކާރަށް ނިސްބަތްވާ ހޮޅުދޫ ދާއިރާގެ މެމްބަރު އަލީ މުހައްމަދު ހުށަހެޅުއްވި ބިލް ރައްޔިތުންގެ މަޖިލީހުން ފާސްކޮށްފި އެވެ.
ބުދަ ދުވަހު ބޭއްވި ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ތިން ވަނަ ޖަލްސާގައި އެބިލް ފާސްކޮށްފައިވަނީ 46 މެމްބަރުންގެ އަޣްލަބިއްޔަތުންނެވެ. އެބިލާ ދެކޮޅަށް 16 މެމްބަރަކު ވޯޓް ދެއްވިއެވެ.
އިދިކޮޅު އެމްޑީޕީއާއި ސަރުކާރަށް ނިސްބަތްވާ ބައެއް މެމްބަރުން ވެސް އެބިލަށް ބަހުސްކުރެއްވި އިރު ކަންބޮޑުވުން ފާޅުކޮށްފައި ވެއެވެ. އެހެންކަމުން އެބިލް ދިރާސާކުރި މަޖިލީހުގެ ގައުމީ ސަލާމަތުގެ ކޮމެޓީން ވަނީ އެބިލަށް ބޮޑެތި ބަދަލުތަކެއް ގެނެސްފަ އެވެ.
އެގޮތުން ކުރިން ކުށްވެރިންނަށާއި ކިތައްމެ ބޮޑު ކުށެއް ކުރި މީހަކަށް ވެސް އެމީހެއްގެ ހުކުމް ތަންފީޒުކުރާތާ ދެ އަހަރު ފަހުން ކައުންސިލަށް ކުރިމަތި ލެވޭ ގޮތަށް އޮތްއޮތުން ވަނީ ބަދަލު ކޮށްފަ އެވެ.
އެބިލްގައި މިހާރު ވާގޮތުން، އެއްވެސް ޖިނާއީ ކުށެއް ކުރިކަން ޝަރީއަތަށް ސާބިތުވެ، ހުކުމެއް ތަންފީޒު ކުރަމުންދާ މީހަކަށް ކައުންސިލް އިންތިހާބުގައި ވާދައެއް ނުކުރެވޭނެ އެވެ. އަދި ކުޑަ ކުއްޖަކާ މެދު ބަދުއަހުލާގީ އަމަލެއް ހިންގިކަން ނުވަތަ މީހެއްގެ އިއްފަތްތެރިކަން ފޭރިގަތްކަން ޝަރީއަތަށް ސާބިތުވެފައިވާ މީހަކަށް ވެސް ކައުންސިލް އިންތިހާބުގައި ވާދައެއް ނުކުރެވޭނެ އެވެ.
މީގެ އިތުރުން މަސްތުވާތަކެތީ ވިޔަފާރިކުރުމުގެ ކުށެއް ކުރިކަން ޝަރީއަތަށް ސާބިތުވެ، އެމީހެއްގެ މައްޗަށް ހުކުމެއް ކޮށްފައިވާ ނަމަ، އެހުކުމެއް ތަންފީޒުކޮށް ނިމުނުތާ ހަތް އަހަރު ކުރިން އޭނާއަށް ކައުންސިލް އިންތިހާބަށް ކުރިމަތި ނުލެވޭނެ ކަމަށް އެއިސްލާހުގައި ވެއެވެ. އަދި ބޮޑެތި ކުށްތައް ފިޔަވައި، 12 މަސްދުވަހަށް ވުރެ ދިގު ޖިނާއީ ހުކުމެއް ކޮށްފައިވާ މީހެއް ނަމަ އެމީހަކަށް ކައުންސިލް އިންތިހާބުގައި ވާދަކުރެވޭނީ އެހުކުމެއް ތަންފީޒުކޮށް ނިމޭތާ ތިން އަހަރު ފަހުން ކަމަށް ވެސް އެ އިސްލާހުގައި ވެއެވެ.
ކޮމެޓީން ނިންމި ގޮތުގެ ރިޕޯޓަށް ބަހުސް ކުރެއްވި އިދިކޮޅު އެމްޑީޕީއަށް ނިސްބަތްވާ ބައެއް މެމްބަރުން ވިދާޅުވީ ކޮމެޓީން ގެނެސްފައިވާ ބައެއް އިސްލާހުތައް ގަބޫލު ކުރެވޭ ކަމަށެވެ. ނަމަވެސް މިބިލް ގާނޫނަކަށް ބަދަލުވުމާއެކު ކުރިއަށް އޮތް ލޯކަލް ކައުންސިލް އިންތިހާބަށް ވެސް އެގާނޫނަށް އަމަލު ކުރެވިގެންދާތީ ކަންބޮޑުވާ ކަމަށެވެ. ސަބަބެއް ކަމަށް ބައެއް މެމްބަރުން ވިދާޅުވީ އެ ބިލްގެ ސަބަބުން އަނެއްކާ ވެސް ކައުންސިލް އިންތިހާބު ފަސްކޮށްފާނެ ކަމުގެ ބިރު އޮތުން ކަމަށެވެ.
އެބިލަށް އަމަލު ކުރަން ފަށާނީ އެބިލް ތަސްދީގުކޮށް، ދިވެހި ސަރުކާރުގެ ގެޒެޓްގައި ޝާއިއުކުރާ ދުވަހުން ފެށިގެންނެވެ. މާނައަކީ މިހާރު ކުރިމަތިވެފައިވާ އިންތިޚާބުގައި ވެސް އެ އުސޫލަށް އަމާލުކުރާނެއެވެ.
