އައްސޭރި ޖަލުގެ ސްޕެޝަލް ޕްރޮޓެކްޝަން ޔުނިޓްގެ މަރާމާތުގެ މަސައްކަތް ވަރަށް ބާރަށް ކުރިއަށްދާ ކަމަށާ އެހެން ނަމަވެސް އެތަނުގެ މަރާމާތުގެ މަސައްކަތްތައް ނިންމާލެވޭނީ ކޮން ދުވަހަކުން ކަމެއް ބުނަން ނޭނގޭ ކަމަށް ކަރެކްޝަނަލް ސާވިސްއިން ބުނެފި އެވެ.
މިކަމާ ގުޅޭ ގޮތުން މައުލޫމާތު ދެއްވަމުން ކަރެކްޝަނަލް ސަރވިސްގެ މީޑިޔާ އޮފިޝަލް ވިދާޅުވީ ސްޕެޝިއަލް ޕްރޮޓެކްޝަން ޔުނިޓްގެ ވަރަށް ބޮޑު މަރާމާތެއް ކުރައްވަމުންދާ ކަމަށާއި އެގޮތުން ސީލިން އާއި ފާރު އެއްކޮށް މަރާމާތު ކުރުމުގެ މަސައްކަތް ކުރަމުންދާ ކަމަށެވެ. އެހެން ނަމަވެސް މި މަސައްކަތް ނިންމާލެވޭނީ ކޮން ދުވަހަކުން ކަމެއް ބުނަން ނޭނގޭ ކަަމަށް އޭނާ ވިދާޅުވި އެވެ.
މިދިޔަ އަހަރުގެ މެދު ތެރޭގައި ކަރެކްޝަންސް އިން ވަނީ މަރާމާތު ކުރުމަށް ކަމަށް ބުނެ އަދާލަތު ޕާޓީގެ ރައީސް ޝެއިހު އިމްރާނު އަބްދުﷲ ގޭބަންދަށް ބަދަލުކޮށްފަ އެވެ. އަދި ކުރީގެ ޑިފެންސް މިނިސްޓަރ ތަލްހަތު އިބްރާހިމް ކަލޭފާނު ވެސް ވަނީ ގޭބަންދަށް ބަދަލުކޮށްފަ އެެވެ.
ސްޕެޝަލް ޕްރޮޓެކްޝަން ޔުނިޓް މަރާމާތުކުރުމުގެ މަސައްކަތް ކުރިއަށްގެންދަނީ އައްސޭރި ޖަލު އޮފިސަރުންގެ ބެލުމުގެ ދަށުން އެ ޖަލުގެ އެލަވަންސް ވަޒީފާގައި މަސައްކަތްކުރާ ގައިދީންނެވެ.
ސްޕެޝަން ޕްރޮޓެކްޝަން ޔުނިޓްގެ މަރާމާތު ކުރުމުގެ މަސައްކަތް ނިމޭނެ ދުވަހެއް ބުނަން ނޭންގޭ ކަމަށް ކަރެކްޝަނަލް ސާވިސް އިން ބުނެފައިވާ އިރު މިދިޔަ އަހަރުގެ އޭޕްރީމް މަހު އެ ސާވިސްއިން ވަނީ މަހެއްގެ ތެރޭގައި އެ މަސައްކަތް ނިންމާލެވޭނެ ކަމަށް ބުނެފަ އެވެ.
