ކުރިއަށް އޮތް ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރާނެ ފަރާތެއް ކަނޑައެޅުމަށް، ޕާޓީ ރިޔާސީ ޕްރައިމަރީ ބާއްވާނެ ކަމަށާއި، އެ ޕްރައިމަރީގަިއ ރައީސް މުހައްމަދު ނަޝީދު ވާދަކުރައްވާނެ ކަމަށް އެމްޑީޕީގެ ޗެއަރޕާސަންގެ ނައިބް އަލީ ނިޔާޒް ވިދާޅުވެއްޖެ އެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން އަލީ ނިޔާޒް ވިދާޅުވީ، އެމްޑީޕީގެ ރިޔާސީ ޕްރައިމަރީއެއް ނޯންނާނެ ކަމަށް ވިދާޅުވެ ބައެއް ފަރާތްތަކުން ވާހަކަ ދައްކާ ކަމަށެވެ. ނަމަވެސް އެމްޑީޕީގެ ރިޔާސީ ޕްރައިމަރީ އޮންނާނެ ކަމަށާއި އެ ޕްރައިމަރީގައި ރައީސް މުހައްމަދު ނަޝީދު ވާދަކުރައްވާނެ ކަމަށްވެސް އޭނާ ވިދާޅުވި އެވެ.
"އަވަހަށް ޕްރައިމަރީ ބާއްވަންޖެހޭ ސަބަބެއް މިހާރު ނެތް ކަންނޭނގެ. އޭގެ ބަދަލުގައި ޕާޓީގެ ހިންގުން ވަރުގަދަކުރުމަށްޓަކައި، އަދި ސިޔާސީގޮތުން ވަރުގަދަކުރުމަށްޓަކައި ކުރަންޖެހޭ ބައިވަރު ކަންތައްތަކެއް ކުރުމަށްފަހު، ދެން އަޅުގަނޑަށް ގަބޫލުކުރެވޭގޮތުގައި ރިޔާސީ ޕްރައިމަރީ ބޭއްވިގެންދާނީ. އެ ތާރީހު ކަނޑައަޅާނީ ޕާޓީގެ ޤައުމީ މަޖިލީހުން. އެކަމަށް ޝައުޤުވެރިވާ (އެމްޑީޕީގެ ރިޔާސީ ޓިކެޓަށް) ހުރިހާ ފަރާތްތަކަށް ވާދަކުރެވޭގޮތަށް ރިޔާސީ ޕްރައިމަރީ ބޭއްވިގެންދާނީ" އަލީ ނިޔާޒް ވިދާޅުވި އެވެ.
ރިޔާސީ އިންތިހާބާއި ގުޅޭ ގޮތުން ވާހަކަދައްކަވަމުން އަލީ ނިޔާޒް ވިދާޅުވީ، އެމްޑީޕީއާ ގުޅޭ ގޮތުން ސަރުކާރުން އެތައް ވާހަކަތަކެއް ދައްކަމުންގެންދިޔަ ކަމަށެވެ. އެމްޑީޕީގެ ތެރޭގައި ބައިބައިވުން ތަކެއް އޮތްކަމަށް ބުނެ، އެ ވާހަކަތައްވެސް ސަރުކާރުން ކޮންޓްރޯލްކުރާ މީޑިއާތަކުން ކެނޑިނޭޅި ގެނެސްދިން ކަމަށް ނިޔާޒް ވިދާޅުވި އެވެ. ނަމަވެސް އެ ހުރިހާ ވާހަކަތަކަކީ ދޮގެއްކަން ހާމަވެފައިވާ ކަމަށް ނިޔާޒް ވިދާޅުވި އެވެ.
ނިޔާޒް ވިދާޅުވީ، ސްރީ ލަންކާގައި އެމްޑީޕީގެ ރައީސް މުހައްމަދު ނަޝީދާއެކުގައި ކުރިއަށްގެންދިޔަ ބައްދަލުވުންތަކަށްފަހު، އެ މަނިކުފާނު އިންތިހާބުގައި ވާދަކުރައްވާނެކަން ކަށަވަރުވެގެން ހިނގައްޖެ ކަމަށާއި، އެކަމަށް މަގުފަހި ކުރުމަށްޓަކައި ކުރަންޖެހޭ ކޮންމެ ކަމެއް ކުރުމަށް އެމްޑީޕީގެ ޤައުމީ މަޖިލީސް އިއްތިފާޤްވެފައިވާ ކަމަށެވެ.
"ރައީސް ނަޝީދުގެ ކެންޑިޑެސީ އީސީން ޤަބޫލުނުކޮށްފިނަމަ ދެން އެހެން ކެންޑިޑޭޓަކަށް ތާއީދުކުރަން ވަނީ ޤައުމީ މަޖިލީހުގެ ޖަލްސާއިން ފާސްކޮށްފައި. ބައިނަލްއަޤްވާމީ ފަރާތްތަކުންވެސް ދަނީ ރައީސް ނަޝީދު އިންތިހާބުގައި ބައިވެރިކުރެވޭތޯ ދަނީ މަސައްކަތްކުރަމުން. ވަގުތު ޖެހުމުން އެކަން ކުރާނެ ހުރިހާ ފަރާތްތަކުންވެސް. ރައީސް ނަޝީދަކީ މަޤްބޫލު ލީޑަރެއް. ބައިނަލްއަޤްވާމީ މުޖުތައުގައި ރައީސް ނަޝީދު ކަމަކަށް އެދިވަޑައިގެންފިނަމަ އެކަމެއް ހުރިހާ ފަރާތްތަކުންވެސް ކޮށްދޭނެ. އެހެންކަމުން އެމަނިކުފާނުގެ ނަން އޮންނާނެ." ނިޔާޒް ވިދާޅުވި އެވެ.
