މޯލްޑިވްސް އިންޓަނޭޝަނަލް އާބިޓްރޭޝަން ސެންޓަރުގެ ބޯޑަށް ލަފާ ދޭ ކޮމެޓީއެއް އެކުލަވާލަން ނިންމައި، އެ ކޮމެޓީއަށް 10 މެމްބަރުން ކުރިމަތިލާން އެ ސެންޓަރުން ހުޅުވާލައިފިއެވެ.
ބުދަ ދުވަހު އެސެންޓަރުން ކޮށްފައިވާ އިއުލާނެއްގައި ބުނެފައިވަނީ އާބިޓްރޭޝަން ސެންޓަރުގެ "އާބިޓްރޭޝަން ރޫލްސް" މުރާޖާޢާކޮށް ބޯޑު މެމްބަރުންނަށް ލަފާދިނުމަށް 10 މެމްބަރުންގެ ކޮމިޓީއެއް އެކުލަވާލަން ބޭނުންވާތީވެ އެ ފުރުސަތު ހުޅުވާލާފައިވާ ކަމަށެވެ. އެގޮތުން މިމަހުގެ 14 ވަނަ ދުވަހުގެ މެންދުރު 1:30 ގެ ކުރިން އެޓަރނީ ޖެނެރަލްގެ އޮފީހަށް ލިޔެކިޔުންތައް ހުށައެޅުމަށް ވަނީ އެދިފައެވެ.
އެ އިއުލާނުގައިވާ ގޮތުން އެ ކޮމެޓީގެ މެމްބަރުކަމުގެ ޝަރުތަކީ ގާނޫނީ ދާއިރާގައި 10 އަހަރުގެ ތަޖުރިބާ ލިބިފައިވުމާއި އާބިޓްރޭޝަން ދާއިރާގައި އަމަލީ ގޮތުން ހަރަކާތްތެރިވެފައިވާ މީހަކަށް ވުމެވެ.
އާބިޓްރޭޝަން ސެންޓަރަކީ ރާއްޖޭގައި އާބިޓްރޭޝަން ކުރިއަރުވައި، އެކަމަށް މަގުފަހިކޮށްދިނުމާއި އެކަމާބެހޭ އުސޫލުތައް ކަނޑައަޅާ ސެންޓަރެވެ. އެ ސެންޓަރުގެ ސީއީއޯ އަކީ މަމްދޫހާ އަލީއެވެ. ޗެއާމަނަކީ ވަކީލް ޝަހުދީ އަންވަރެވެ. ބޯޑުގެ މެމްބަރަކަށް ވަކީލް ހުސައިން ސިރާޖާއި, ސަފާ ޝަރީފް ރައީސް ސޯލިހު ވަނީ އައްޔަން ކުރައްވާފައެވެ.
