ޔާމީނާއި ސޮފްވާން ޖޭޕީއަށް
1 އޮކްޓޯބަރު 2019 | އަންގާރަ 20:44ރާއްޖެޓީވީ ބަންދުކުރުމަށް ސޮފްވާން މަސައްކަތް ކުރެއްވި
ޔާމީން އާއި ސޮފްވާން
ރައްޔިތުންގެ މަޖިލީހުގެ ވެލީދޫ ދާއިރާގެ ކުރީގެ މެމްބަރު ޔާމީން ރަޝީދު އާއި ބްރޮޑްކާސްޓިން ކޮމިޝަންގެ ކުރީގެ ނައިބް ރައީސް އިސްމާއިލް ސޮފްވާން ޖުމްހޫރީ ޕާޓީ އަށް ސޮއިކޮށްފިއެވެ.
އެ ދެ ބޭފުޅުން ޖުމްހުރީ ޕާޓީއަށް ސޮއިކުރެއްވީ، އަންގާރަ ދުވަހުގެރޭ މ. ކުނޫޒް ގައި ބޭއްވި ރަސްމިއްޔާތެއްގައެވެ.
ޖޭޕީއާ ގުޅިވަޑައިގަތުމުގެ ކުރިން ޔާމީން ހުންނެވީ ކުރީގެ ނައިބް ރައީސް އަހުމަދު އަދީބް އިސްވެހުންނަވާ އުފެއްދި މޯލްޑިވިއަން ތާޑްވެ ޑިމޮކްރެޓްސް (އެމްޓީޑީ) ގައެވެ. އެ ޕާޓީގެ ޓިކެޓްގައި ނިމިގެންދިޔަ ރައްޔިތުންގެ މަޖިލީހުގެ އިންތިހާބުގައި ވާދަކޮށް އޭނާ ވަނީ ނާކާމިޔާބީއާ ކުރިމަތިލައްވަން ޖެހިވަޑައިގެންފައެވެ.
ޔާމީން، ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރުކަމަށް މީގެ ކުރިން އިންތިހާބުވެ ވަޑައިގެންނެވީ އެމްޑީޕީ ޓިކެޓްގައެވެ. އެހެން ނަމަވެސް އޭނާ ވަނީ ފަހުން ޕީޕީއެމް އަށް ސޮއިކޮށްފައެޗެ.
އަންގާރަ ދުވަހުގެރޭ ސޮއިކުރެއްވި ސޮފްވާން އަކީ، ނިމިދިޔަ ރިޔާސީ އިންތިހާބަށް ފަހު އޮފީހަށް ނިކުމެ ވަޑައިނުގަނެ ބަރާބަރަށް މުސާރަ ނަންގަވަމުން ދިޔަ ބޭފުޅެކެވެ.
ސޮފްވާން ބްރޮޑްކޮމްގެ ނައިބް ރައީސް ކަމުން އިސްތިއުފާދެއްވީ، އޭނާ ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީން ނިންމާފައިވަނިކޮށެވެ.
މިނިވަން މުއައްސަސާތަކާ ބެހޭ ކޮމިޓީގައި ސޮފްވާންގެ ފަރާތުން ވަކިގޮތަކަށް ކަންކަން ނިންމަން ނުފޫޒު ފޯރުވަން މަސައްކަތް ކޮށްފައިވާ ކަމަށާއި، ރާއްޖެޓީވީ ބަންދުކުރަން އޭނާ މަސައްކަތް ކުރެއްވި ކަމަށް ބްރޮޑްކޮމްގެ ރައީސް މުހައްމަދު ޝަހީބު ވަނީ ވިދާޅުވެފައެވެ.
