މާލެ ސިޓީ ކައުންސިލް މެންބަރު މަމްނޫން ޖޭޕީއަށް ސޮއިކުރައްވައިފި
29 މެއި 2017 | ހޯމަ 15:54މަމްނޫން ކުރިން ހުންނެވީ ޕީޕީއެމްގައި
މާލެ ސިޓީ ކައުންސިލްގެ މައްޗަންގޮޅި ދެކުނު ދާއިރާގެ މެމްބަރު އިބްރާހީމް މަމްނޫން
މާލެ ސިޓީ ކައުންސިލްގެ މައްޗަންގޮޅި ދެކުނު ދާއިރާގެ މެމްބަރު އިބްރާހީމް މަމްނޫން، ޖުމްހޫރީ ޕާޓީ އާއި ގުޅިވަޑައިގެންފިއެވެ.
ވެރިކަންކުރާ ޕީޕީއެމްގެ ޓިކެޓުގައި ސިޓީ ކައުންސިލަށް އިންތިޚާބު ވެވަޑައިގަތް މަމްނޫން ޖުމްހޫރީ ޕާޓީއާއި ގުޅިވަޑައިގަތީ ހޯމަ ދުވަހުއެވެ. ޕާޓިއާއި ގުޅިވަޑައިގެން މަމްނޫންގެ މެމްބަރޝިޕް ފޯމް ހަވާލުކުރައްވާފައިވަނީ ޖުމްހޫރީ ޕާޓީގެ ޑެޕިއުޓި ލީޑަރު ޢަބްދުﷲ ކަމާލުއްދީން އާއިއެވެ.
ޖުމްހޫރީ ޕާޓީ އާއި ގުޅިވަޑައިގަތުމާއި ހަމައަށް މަމްނޫން ހުންނެވީ ޕީޕީއެމްގެ މެންބަރެއްގެ ގޮތުގައެވެ. އަދި އޭނާ އަކީ އެ ޕާޓީގެ ކައުންސިލްގެވެސް މެންބަރެކެވެ.
ޕީޕީއެމްގެ އެތެރޭގައި އުފެދިގެންދިޔަ މައްސަލަތަކުގެ ތެރެއިން ޕާޓީ ދެބައިވެ، ދެ ލީޑަރޝިޕެއް އުފެދުނު ފަހުން، ޕާޓީގެ މުސްތަޝާރު، ރައީސް ޢަބްދުﷲ ޔާމީން ޢަބްދުލްޤައްޔޫމްގެ ފެކްޝަނުން ބޭއްވި ކައުންސިލް ބައްދަލުވުމުގައި ޕާޓީގެ ރައީސް، އަދި ކުރީގެ ރައީސުލްޖުމްހޫރިއްޔާ އަލްއުސްތާޛް މައުމޫން ޢަބްދުލްޤައްޔޫމް، އެ ޕާޓީން ވަކިކުރުމަށް މަމްނޫން ވަނީ ވޯޓު ދެއްވާފައެވެ.
އެއަށްފަހު، މި އަހަރުގެ އޭޕްރީލް މަހުގެ ދެވަނަ ދުވަހުގެރޭ ދަންވަރު މީޑިއާ އާއި ބައްދަލުކުރައްވާ މަމްނޫން ވަނީ ރައީސް މައުމޫން ފެކްޝަނަށް ތާޢީދު ކުރައްވާކަން ހާމަކުރައްވާފައެވެ. އެރޭ މީޑިއާއާއި ވާހަކަދައްކަވަމުން ރައީސް ޔާމީންގެ ފެކްޝަނުގައި އުޅުއްވީ މަޖުބޫރު ވެގެންކަމަށް މަމްނޫން ވިދާޅުވި ނަމަވެސް އެއީ ކޮން މަޖުބޫރީ ހާލަތެއް ކަމެއް އޭނާ ހާމައެއް ނުކުރައްވައެވެ. މީގެ އިތުރުން، ރައީސް މައުމޫން ޕީޕީއެމުން ވަކިކުރުމަށް ހުށަހެޅި ގަރާރަށް ވޯޓު ދެއްވުނީތީ މަމްނޫން ވަނީ ޕީޕީއެމްގެ ހުރިހާ މެމްބަރުންގެ ފަރާތުން މައާފަށްވެސް އެދިވަޑައިގެންފައެވެ.
