ޙާޒިރުކުރީ ޖޭޕީއަށް މެންބަރުން ގެންނަ ގޮތާ ގުޅޭގޮތުން ސުވާލު ކުރުމަށް: ޢަބްދުﷲ ރިޔާޒް
މިހާރު ޤާސިމް އާމެދު ކުރެވޭ ތުހުމަތު ރަނގަޅު ނޫންކަމަށް ޤަބޫލުކުރެވޭނެ
ރިޔާޒް ރާއްޖެ ޓީވީއަށް މައުލޫމާތު ދެއްވަނީ
ކުއްލިގޮތަކަށް އާދީއްތަ ދުވަހުގެރޭ (މިރޭ) ފުލުސް އޮފީހަށް ހާޒިރުކުރީ މިވަގުތު ޖަލުގައި ހައްޔަރުކޮށްފައިވާ ޖުމްހޫރީ ޕާޓީގެ ލީޑަރ ޤާސިމް އިބްރާހީމްގެ މައްސަލައިގައި ބަޔާނެއް ނެގުމަށް ކަމަށާއި މައިގަނޑު ގޮތެއްގައި ޖުމްހޫރީ ޕާޓީއަށް މެންބަރުން ހޯދާގޮތާގުޅޭގޮތުން ސުވާލު ކުރި ކަމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު އަދި ޖުމްހޫރީ ޕާޓީގެ ނައިބު ލީޑަރ ޢަބްދުﷲ ރިޔާޒް ވިދާޅުވެއްޖެއެވެ.
ފުލުސް އޮފީހަށް ހާޒިރުވެވޑައިގެން 2 ގަޑިރަށްވުރެ ގިނައިރު ފުލުސް އޮފީހުގައި ހޭދަކުރެއްވުމަށްފަހު ނިކުމެވަޑައިގެން ރިޔާޒް ވިދާޅުވީ ހާޒިރު ކުރެވުނީ ޖުމްހޫރީ ޕާޓީގެ ލީޑަރ ޤާސިމް އިބްރާހިމް އާ މެދު ކުރެވޭ ތަހުގީގަށް ބަޔާނެއް ނެގެވުމަށް ކަމަށެވެ.
އެގޮތުން ކުރެވުނު ސުވާލުތަކުގެ ގޮތުގައި ރިޔާޒް ވިދާޅުވީ ޖުމްހޫރީ ޕާޓީ ހިންގާ ގޮތާއި އެޕާޓީއަށް މެންބަރުން ހޯދާގޮތާއި ކެންޑިޑޭޓުންނަށް ޓިކެޓް ދޭ ގޮތާ ބެހޭ ގޮތުން ސުވާލު ކުރެވުނު ކަމަށެވެ.
ރިޔާޒް ވިދާޅުވީ މައިގަނޑު ގޮތެއްގައި ޕާޓީ ހިންގާ ގޮތާ ގުޅޭގޮތުން ސުވާލު ކުރެވުނު އެސުވާލުތަކަށް ވަރަށް ރަނގަޅަށް ޖަވާބު ދެއްވާފައިވާނޭ ކަމަށް ރިޔާޒް ވިދާޅުވިއެވެ.
ރިޔާޒް ވިދާޅުވީ އެޕާޓީ ހިންގާގޮތާ ގުޅޭގޮތުން ފަހަރުގައި މިރެއާ ހަމަައަށް ފުލުހުންނަށް ނޭނގޭ ބައެއް ކަންކަން ހުރިނަމަވެސް މިހާރު އެކަންކަން ސާފުވާނެ ކަމަށް ޤަބޫލު ކުރައްވާ ކަމަށްވެސް ރިޔާޒް ވިދާޅުވިއެވެ.
ރިޔާޒް ވިދާޅުވީ ޖުމްހޫރީ ޕާޓީއަކީ އެޕާޓީގެ ޕީޖީ ގުރޫޕްގައިވެސް ވަރަށް ބޮޑަށް ކަންކަމުގައި މަޝަވްރާ ކުރެވިގެން ހިންގާ ޕާޓީއެއް ކަމަށާއި އެކަމުގެ ހެކި ޔައުމިއްޔާތަކުން ފެންނަން ހުންނާނެ ކަމަށެވެ.
ރިޔާޒް ވިދާޅުވީ ރިޔާޒްގެ ބަޔާނާ ގުޅިގެން ޤާސިމްއަށް ކުރާ ތުހުމަތަކީ ރަނގަޅު ތުހުމަތެއް ނޫންކަން އެނގިގެން ދާނެކަމަށް ޤަބޫލު ކުރައްވާ ކަމަށެވެ. އަދި ޤާސިމާމެދު ލުއިގޮތެއް ފެނިގެން ހިނގައިދާނެކަމަށް އުއްމީދު ކުރައްވާ ކަމަށެވެ.
ރިޔާޒް ވިދާޅުވީ އެޕާޓީގެ އިތުރު މެންބަރުން ސުވާލު ކުރެއްވުމަށް ފުލުސް އޮފީހަށް ހާޒިރު ކުރާނެކަމަށް ބެލެވޭ ކަމަށެވެ.
ރިޔާޒް ވިދާޅުވީ ޖުމްހޫރީ ޕާޓީއަށް މެންބަރުން ގެންނަ ގޮތާ ގުޅޭގޮތުން ސުވާލު ކުރައްވާއިރު ޖޭޕީގެ ޓިކެޓްގައި ހޮވިވަޑައިގެން ޕީޕީއެމަށް 9 މެންބަރަކު ބަދަލުވެފައި ކަމަށާއި ނަމަވެސް އެއިން އެއްވެސް މެންބަރަކު ޖޭޕީއަށް ބަދަލުވެފައި ނުވާކަމަށެވެ. އެހެންކަމުން ޖޭޕީން ޕީޕީއެމަށް ބަދަލުވި ގޮތާއި ބަދަލުވި ސަބަބު ހޯދުން މާރަނގަޅުވާނެކަމަށް ފުލުހުންގާތު ދެންނެވިކަމަށް ރިޔާޒް ވިދާޅުވިއެވެ.
ރިޔާޒްގެ ފުލުސް އޮފީހަށް ވަޑައިގެންނެވީ ޤާނޫނީ ވަކީލުން ކަމުގައިވާ މައްޗަންގޯޅީ އުތުރު ދާއިރާގެ މެންބަރ މާރިޔާ އަހުމަދު ދީދީއާއި އަދާލަތު ޕާޓީގެ ނައިބު ރައީސް އަލީ ޒާހިރުއާ އެކުގައެވެ.
