ފައިސަލްއާ ސުވާލުކުރީ މަޖިލީހުގެ 42 މެންބަރުން ޖޭޕީއަށް ގެންދަން މަސައްކަތްކުރޭތޯ!
ޤާސިމް އާއި ވިލާ ފައުންޑޭޝަންގެ އެހީތަކާއި ގުޅޭގޮތުން ސުވާލުކުރި
ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު، ފައިސަލް ނަސީމް
ޖުމްހޫރީ ޕާޓީގެ ޕާލިމެންޓްރީ ގްރޫޕުގައި ހިމެނިވަޑައިގަންނަވާ، ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު، ފައިސަލް ނަސީމް ފުލުހަށް ހާޒިރުކޮށް، ރައްޔިތުންގެ މަޖިލީހުގެ 42 މެންބަރުން ޖުމްހޫރީ ޕާޓީއަށް ގެންދަން މަސައްކަތް ކުރޭތޯ ސުވާލުކޮށްފިއެވެ.
ބުދަ ދުވަހު ހެނދުނު ފުލުހަށް ހާޒިރުވުމަށްފަހު، މީޑިއާއަށް މައުލޫމާތު ދެއްވަމުން، ފައިސަލް ވިދާޅުވީ، އެނާއާ ފުލުހުން ސުވާލުކުރީ، ރައްޔިތުންގެ މަޖިލީހުގެ 42 މެންބަރުން ޖުމްހޫރީ ޕާޓީއަށް ގެންދަން މަސައްކަތް ކުރޭތޯ ކަމަށާ، އެ ސުވާލަށް ޖަވާބުދެއްވާފައިވާނެ ކަމަށެވެ.
"ކޮންމެ ޕާޓީއަކިވެސް، އެ ޕާޓީއެއްގެ އާންމު މެންބަރުންވެސް، އިތުރުކުރަން މަސައްކަތް ކުރަންޖެހޭނެ ޕާޓީއެއް ކަމަށޭ އަޅުގަނޑު ޤަބޫލުކުރަނީ. ސިޔާސި ޕާޓީއެއް ކަމަށް ވަންޏާ އާންމު މެންބަރުންނާ، އަދި ޕާލިމެންޓޭރިއަނުން އިތުރު ކުރުމަށްޓަކާ މަސައްކަތް ކުރަންޖެހޭނެ. އެއީ، އަޅުގަނޑު ޤަބޫލުކުރާ ގޮތް. އެހެން ނަމަވެސް، ޖުމްހޫރީ ޕާޓީއަށް ވަކިން، ޕާލިމެންޓް މެންބަރުން، ވަކި އަދަދަކަށް ހަމަކުރުމަށްޓަކާ، މަސައްކަތް ކުރާކަމަކަށް އަޅުގަނޑަށް ފެނިފައެއް ނެތޭ،" އޭނާ ވިދާޅުވި އެވެ.
ފައިސަލް ވިދާޅުވީ، އެބޭފުޅާ އާއި ކުރެވުނު ސުވާލުތައް ހުރީ ވަރަށް ބޮޑަށް ވަކި މީހަކަށް އަމާޒު ކުރެވިފައި ކަމަށާ، އެގޮތުން ޖުމްހޫރީ ޕާޓީގެ ލީޑަރު ޤާސިމް އިބްރާހިމް އާއި ދެކޮޅަށް ދައުލަތުން އުފުލާފައިވާ ދައުވާ އާއި ގުޅޭ ގިނަ ސުވާލުތަކެއް ކުރި ކަމަށެވެ.
އެގޮތުން ޤާސިމް އިބްރާހިމް ރައްޔިތުންނަށް ވެދެއްވާ އެހީތަކާއި، ވިލާ ފައުންޑޭޝަނުން ވެދޭ އެހީތަކާއި ގުޅޭ ގޮތުން ފުލުހުން ސުވާލުކުރި ކަމަށް ފައިސަލް ވިދާޅުވިއެވެ. އެ ސުވާލުގެ ޖަވާބުގައި،އެއީ ފައިސަލް ބައްލަވަން ޖެހިވަޑައިގަންނަވާ ކަންކަން ނޫން ކަމަށާ، ފައިސަލްއަށް އެނގިލައްވަނީ އެބޭފުޅާ ކުރައްވާ ކަންކަން ކަމަށް ދެންނެވި ކަމަށް ފައިސަލް ވިދާޅުވިއެވެ.
ޤާސިމް އިބްރާހިމް، ރައްޔިތުންގެ މަޖިލީހުގެ މެންބަރުންނަށް ނުފޫޒު ފޯރުވާކަމަށް ކުރާ ތުހުމަތާ ގުޅޭގޮތުން ވެސް ފައިސަލްއާއި ސުވާލު ކުރި ކަމަށާ، އޭގެ ޖަވާބުގައި އެފަދަ ނުފޫޒެއް ނެތް ކަމަށާ، ޖުމްހޫރީ ޕާޓީ އަކީ ރައްޔިތުންގެ ހައްޤުގައި މަސައްކަތްކުރާ ޕާޓީއެއް ކަމަށް ދަންނަވާފައިވާނެ ކަމަށްވެސް ފައިސަލް ވިދާޅުވިއެވެ.
ފައިސަލް ވިދާޅުވީ، ޖުމްހޫރީ ޕާޓީއަށް ވަކި އަދަދަކަށް ރައްޔިތުންގެ މަޖިލީހުގެ މެންބަރުން ހަމަކުރަން މަސައްކަތް ކުރާ ކަމަށް ތުޙުމަތު ކުރާއިރު، ޖުމްހޫރީ ޕާޓީން އެހެން ޕާޓީތަކަށް ގެންގޮސްފައިވާ މެންބަރުން އެގޮތަސް އަމަލުކުރެއްވީ ކީއްވެތޯ އާއީ ކޮން ނުފޫޒެއްގެ ދަށުންތޯ އެ މެންބަރުންނާ ސުވާލު ނުކުރަނީ ކީއްވެތޯ ސުވާލު އުފެއްދެވި ކަމަށެވެ.
ފައިސަލް ނަސީމް ފުލުހަށް ހާޒިރުކޮށް، ސުވާލު ކުރި ނަމަވެސް، އޭނާގެ މައްޗަށް ޖިނާއީ ތުޙުމަތެއް ކޮށްފައެއް ނުވެއެވެ.
