ރައީސް ޔާމީނާއި މެޑަމް ފާތުންއާ ގުޅޭގޮތުން ފޭސްބުކްގައި ޕޯސްޓް ކުރާތީ ޑްރައިވަރަކު ވަޒީފާއިން ވަކިކޮށްފި
ވަޒީފާއިން ވަކިކުރީ ޕީޕީއެމަށް ވަނުމަށް އެދެމުން ދިއުމަށްފަހުގައި
އެމްބިއުލާންސެއް:މިލަންދޫ ޑްރައިވަރު ވަނީ ވަޒީފާއިން ވަކިކޮށްފައި
ރައީސުލް ޖުމްހޫރިއްޔާ ޢަބްދުﷲ ޔާމީނާއި އެމަނިކުފާނުގެ އަނބިކަނަބަލުން މެޑަމް ފާތިމަތު އިބްރާހީމަށް ނިސްބަތްކޮށް ސޯޝަލް މީޑިޔާގައި ތަކެތި ލިޔުމާއި ޕޯސްޓް ކުރާކަމަށް ބުނެ ޑްރައިވަރަކު ވަޒީފާއިން ވަކިކޮށްފިއެވެ.
ވަޒީފާއިން ވަކިކޮށްފައިވަނީ ށ މިލަންދޫ ސިއްޙީ މަރުކަޒުގެ ޑްރައިވަރު އެރަށު ކެތީހައުސް އަހުމަދު ޝިޔާމެވެ.
އަހުމަދު ޝިޔާމް ވަޒީފާއިން ވަކިކޮށް އޭނާއަށް ހެލްތު މިނިސްޓްރީން ދިން ލިޔުމުގައި ބުނެފައިވަނީ ރައީސުލް ޖުމްހޫރިއްޔާއާއި އެމަނިކުފާނުގެ އަނބިކަނބަލުންނަށް ސޯޝަލް މީޑިޔާ (ފޭސްބުކް) ގައި ޕޯސްޓް ކުރުމާއި އެފަދަ ޕޯސްޓްތައް ޝެއަރ ކުރަމުންދާ ކަމުގެ ޝަކުވާ އެމިނިސްޓްރީއަށް ލިބުމާއި ގުޅިގެން، އަހުމަދު ޝިޔާމްގެ ބަހެއް ހޯދުމަށް 15 ފެބްރުއަރީ 2017 ގައި ނެގުނު ބަޔާނުގައި އެއެކައުންޓަކީ އަހުމަދު ޝިޔާމްގެ އެކައުންޓެއް ނޫންކަމަށް ބުނިކަމުގައި ވިޔަސް، ލިބިފައިވާ ލިޔުންތަކާއި ހޯދުނު މއުލޫމާތައް ބަލާއިރު އެއަކުންޓަކީ އަހުމަދު ޝިޔާމްގެ އެކައުންޓެއްކަމަށް ޤަބޫލު ކުރެވޭ ކަމަށެވެ. އަދި އެކަމަކީ ސިވިލް ސަރވިސް ޤަވާއިދުގެ ޗެޕްޓަރ 2 ގައި ބުނާ ކޯޑް އޮފް ކޮންޑަކްޓްގެ ދަށުން ކޮންމެ މުވައްޒަފެއްގައި ހުންނަން ޖެހޭ ސިފަތަކާ ޚިލާފް ޢަމަލެއް ކަމަށް ބެލެވޭތީއާއި މުވައްޒަފުންގެ ކިބައިގާ ހުންނަންޖެހޭ އަޚްލާގީ މިންގަނޑަށް ނުފެތޭ ޢަމަލެއް ކަމަށް ފެންނާތީއާއި، އަދި އެކަމަކީ ސިވިލް ސަރވިސް ޤަވާއިދުގެ 271 ވަނަ މާއްދާގެ (ނ) ގެ 09 ވަނަ ނަންބަރުގައިވާ ދައުލަތާއި ސަރުކާރާއި އޮފީސް ބަދުނާމްވާފަދަ ޢަމަލެއްކަމަށް ބެލެވޭތީ މިނިސްޓްރީގެ އެޗް.އާރ.އެމް.ޑީ. ކޮމެޓީން އަހުމަދު ޝިޔާމަށް ފިޔަވަޅު އަޅަން ނިންމާފައިވާ ކަމަށެވެ.
ސިވިލް ސާވިސްގެ ގަވައިދުގައި ތިންފިޔަވަޅެއް އެޅިދާނެ ކަމަށް ބުނެފައިވާއިރު، ޝިޔާމްއަށް އެޅުމަށް ނިންމާފައިވަނީ ވަޒީފާއިން ވަކިކުރުމެވެ. އަދި 5 ދުވަހުގެ ތެރޭގައި އިސްލާހީ ފިޔަވަޅު އެޅުމަށް ކަނޑައެޅިފައިވާ ސަބަބުތުތަކަށް ޖަވާބުދާރީވުމަށް ފުރުސަތުދީ އެމުއްދަތުގެ ތެރޭގައި ޖަވާބުދާރީ ނުވިއަސް ކަނޑައަޅާފައިވާ ފިޔަވަޅު ތަންފީޒް ކުރެވޭނެ ކަމަށްވެސް އެލިޔުމުގައި ބުނެފައިވެއެވެ.
ގާތްގަނޑަކަށް 12 އަހަރު ވަންދެން އެވަޒީފައި އުޅެފައިވަނިކޮށް ވަޒީފާއިން ވަކިކޮށް ޝިޔާމަށް ފޮނުވި ލިޔުމުގައި ބުނެފައިވަނީ އަޅާފައިވާ ފިޔަވަޅަށް ބަދަލެއް ގެނެވޭނީ އެކަށީގެންވާ ސަބަބުތައް މުވައްޒަފުގެ ފަރާތުން ހުށަހަޅާފައިވާކަމަށް މިނިސްޓްރީއަށް ފެންނަ ހިނދެއްގައި ކަމަށެވެ.
ރާއްޖެ އެމްވީއަށް މައުލޫމާތު ދެމުން ޝިޔާމް ބުނީ އޭނާ ވަޒީފާއިން ވަކިކޮށްފައި ވަނީ ރައީސާއި މެޑަމްއަށް ފޭސްބުކްގައި ފާޑުކިޔާކަމަށް ބުނެ އެއްމަސްދުވަސްވަންދެން ސަސްޕެންޑް ކޮށްފައި ބެހެއްޓުމަށް ފަހުގައި ކަމަށެވެ. އަދި ޕީޕީއެމަށް ވަނުމަށް ބުނަމުންދާތާ ދުވަސްތަކަކަށްފަހު ކަމަށެވެ.
މިފަހަކަށް އައިސް ގިނަ ބަޔަކު ދަނީ ސޯޝަލް މީޑިޔާގައި މިސަރުކާރާއި ސަރުކާރުގެ ވެރިންގެ ޢަމަލްތަކާއި ގުޅޭގޮތުން ފާޅުގައާއި ސިއްރުން ތަފާތު ޝުއޫރުތައް ފާޅު ކުރަމުންނެވެ.
