ގާސިމްއާ ބައްދަލުކުރުމަށް ޖޭޕީއަށް ފުރުސަތު ދިނުމަށް ފަހު ބައްދަލުވުން ކެންސަލްކޮށްފި

ފުލުހުންގެ ބަންދުގައި ހުންނެވި ޖުމްހޫރީ ޕާޓީގެ ލީޑަރު ގާސިމް އިބްރާހިމްއާ ބައްދަލުކުރުމަށް ޖުމްހޫރީ ޕާޓީއަށް ފުރުސަތު ދިނުމަށް ފަހު ބައްދަލުވުން ކެންސަލް ކޮށްފި އެވެ.

ފުލުހުން ވަނީ ބުދަ ދުވަހުގެ ހެނދުނު 10:30 އަށް ދޫނިދޫއަށް ގޮސް ގާސިމްއާ ބައްދަލުކުރުމުގެ ހުއްދަ ޖުމްހޫރީ ޕާޓީގެ ތިން ބޭފުޅަކަށް ދީފަ އެވެ. ނަމަވެސް، 10:30 ވާން ގާތްވެފައިވަނިކޮށް ފުލުހުން ވަނީ އެ ބައްދަލުވުން ކެންސަލްކޮށްފައިވާކަން އެ ޕާޓީއަށް އަންގާފަ އެވެ.

ގާސިމް ހައްޔަރުކޮށް ދޫނިދޫގައި ބަންދުކޮށްފައިވަނީ މިދިޔަ ބުރާސްފަތި ދުވަހު އެވެ. އޭގެ ފަހުން ކްރިމިނަލް ކޯޓުން ވަނީ ގާސިމްގެ ބަންދަށް ހަ ދުވަސް ޖަހާފަ އެވެ.

ގާސިމްގެ މައްޗަށް ތިން ދައުވާއެއް ކޮށްފައިވާއިރު، ގާސިމްއާ ބައްދަލުކުރުމަށް ފުރުސަތު ނުދިން މައްސަލައިގައި ޖުމްހޫރީ ޕާޓީގެ ނައިބު ލީޑަރު ޑރ. ހުސެއިން ރަޝީދު ވިދާޅުވީ ގާސިމް ހައްޔަރުކުރީއްސުރެ ޕާޓީގެ ކަންތައްތައް ކުރިއަށް ގެންދާނެ ގޮތަކާ މެދު މަޝްވަރާ ކުރުމަށް ބައްދަލުވުމަކަށް އެދެމުންދާ ކަމަށެވެ.

ޑރ. ހުސެއިން ވިދާޅުވީ ގާސިމް ހައްޔަރުކޮށް، ބައްދަލުކުރުމުގެ ފުރުސަތެއް ނުދޭތީ ވަރަށް ބޮޑަށް ކަންބޮޑުވާ ކަމަށެވެ. އަދި މީގެ ކުރިން ޕާޓީތަކުގެ ލީޑަރުން ހައްޔަރުކުރާ ހާލަތްތަކުގައި ޕާޓީތަކުގެ މީހުންނަށް ގޮސް ލީޑަރާ ބައްދަލުކުރެވިފައިވާކަން އޭނާ ފާހަގަކުރެއްވި އެވެ.

ގާސިމް ހައްޔަރުކޮށްފައިވަނީ ގާނޫނާ ޚިލާފަށް ކަމަށް ޖުމްހޫރީ ޕާޓީއާއި އިދިކޮޅު ފަރާތްތަކުން ބުނަމުންދާ ބުނުން ޑރ. ހުސެއިން ތަކުރާރު ކުރެއްވި އެވެ. އޭނާ ވިދާޅުވީ ފުލުހުންނާއި ސަރުކާރަށް ހެދިފައިވާ ގޯސް ރަނގަޅުކޮށް، ގާސިމް ވީހާވެސް އަވަހަކަށް މިނިވަންކުރާނެ ކަމަށް އުންމީދު ކުރައްވާ ކަމަށެވެ.