ފެންފުށީ ކައުންސިލްގެ ނައިބު ރައީސް ޕީޕީއެމް ދޫކޮށް ޖޭޕީއަށް ސޮއިކޮށްފި

އދ. ފެންފުށީ ކައުންސިލްގެ ނައިބު ރައީސް އަހުމަދު ސައީދު ޕީޕީއެމް ދޫކުރައްވާ ޖުމްހޫރީ ޕާޓީއަށް ގުޅިވަޑައިގެންފިއެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި ސައީދު ޕީޕީއެމް ދޫކުރެއްވީ، ކައުންސިލް އިންތިޚާބަށް ކުރިމަތިލާފައި ތިއްބެވި ޕީޕީއެމްގެ ކެނޑިޑޭޓުންނާއި ހިތްހަމަނުޖެހިގެންނެވެ.

ފެންފުށީ ކައުންސިލަށް މިފަހަރުވެސް ވާދަކުރައްވާ ސައީދު ރާއްޖެއެމްވީއަށް ވިދާޅުވީ، ޕީޕީއެމްގެ ޓިކެޓްގައި ވާދަކުރެއްވުމަށް މަސައްކަތް ކުރިނަމަވެސް އެބޭފުޅުން އެބޭފުޅުންނާއި މެދު އުފެދިފައުވާ ޚިޔާލު ތަފާތުވުމެއްގައި، އޭނާއަށް އެ ފުރުސަތު ދޭން ބޭނުން ނުވާކަން އެނގުނުކަމަށެވެ. އެހެން އެކަންވުމުން އޭނާ މި އިންތިޚާބުގައި ފުރަތަމަ ވާދަކުރަން ނިންމީ، އަމިއްލަގޮތުން ކަމަށް ސައީދު ވިދާޅުވިއެވެ.

ސައީދު ވިދާޅުވީ، އަމިއްލަ ގޮތުން ވާދަކުރުމަށް ވުރެ، އިންތިޚާބު ކާމިޔާބުކުރުމަށް ފަސޭހަވާނީ ޕާޓީއެއްގައި ހުރެގެންކަމަށް އަބަދުވެސް ގަބޫލުކުރާކަމަށެވެ. އެގޮތުން ޖޭޕީން އެ ފުރުސަތު ލިބުމުން އެޕާޓީއަށް ހުކުރުދުވަހު ސޮއި ކުރީކަމަށެވެ.

ޖޭޕީން ފެންފުށީ ކައުންސިލަށް ކުރިމަތިލާފައި ހުރީ އޭނާގެ ބަފާބެކަމުން، ބަފާބެ އެ ފުރުސަދު ދޫކޮށްލާ އޭނާއަށް ތާއީދުކުރަން ނިންމާފައިވާކަމަށް ސައީދު ވިދާޅުވިއެވެ.

ސައީދު ވިދާޅުވީގޮތުގައި މި އިންތިޚާބު ފަސޭހަކަމާއިއެކު އިދިކޮޅު ކޯލިޝަނުން ކާމިޔާބުކުރާނެއެވެ.