ހެއިޓީ ސެނެޓަރ، މުޒާހަރާއެއްގެ ތެރެއަށް ބަޑިޖެހި މަންޒަރު ނެގި ގޮތުގެ ވާހަކަ ފޮޓޯގްރަފަރަކު ހިއްސާ ކޮށްފި

ހެއިޓީ ސެނެޓަރ ޖީން-މެރީ ރާފް ފެތިޔަރ، ހެއިޓިއަންގައި ކުރި މުޒާހަރާއެއްގެ ތެރެއަށް ބަޑި ޖެހި މަންޒަރުގެ ފޮޓޯ ނެގި، ރޮއިޓަރސްގެ ފޮޓޯގްރާފަރ އަންދްރޭޒް މާޓިނެޒް ކަސަރެސް، އެ ދުވަހު ފޮޓޯ ނެގި ގޮތުގެ ވާހަކަ ހިއްސާ ކޮށްފިއެވެ.

މާޓިނެޒްއާއި ހަވާލާދީ ބީބީސީގައި ރިޕޯޓުކޮށްފައިވާގޮތުން އޭނާ އެ ފޮޓޯތައް ނަގާފައިވަނީ ފެތިޔަރ އޭނާގެ ކާރުން ފޭބި ވަގުތު އެތަނުގައި ހަރަކާތްތެރިވަމުން އައި މުޒާހަރާގެ ބައިވެރިންގެ ފޮޓޯ ނަގަން މަސައްކަތް ކުރުމުގެ ތެރޭގައެވެ.

ސޯޝަލް މީޑިއާގައި ވައިރަލް ވެފައިވާ ވީޑިއޯތަކުންނާއި މާޓިނެޒްގެ ފޮޓޯތަކުން ދައްކުވައިދޭ ގޮތުގައި ފެތިޔަރ ވަނީ ކާރުން ފޭބި ގޮތަށް މުޒާހަރާގެ ބައިވެރިންގެ ތެރެއަށް ބަޑި ޖަހާފައެވެ. އަދި މުޒާހަރާގެ ބައިވެރިންގެ ހަޅޭކުގެ އަޑު ގަދަވާން ފެށުމުން އޭނާ ވަނީ ބިންމައްޗަށް ބަޑީގެ އަމާޒު ބަދަލު ކޮށްލާފައެވެ.

މާޓިނެޒް ބުނެފައިވަނީ ފޮޓޯތައް ނެގީ ވަރަށް ކުޑަ ވަގުތުކޮޅެއްގެ ތެރޭގައި ކަމަށެވެ. އެގޮތުން އެ ފޮޓޯތައް ނަގަން ނެގީ ދެތިން ސިކުންތު ކަމަށާއި ފެތިޔަރގެ ކާރުގެ އެއްފަރާތުން އަނެއް ފަރާތަށް ދިޔަ ވަގުތު އެ ފޮޓޯތައް ނަގަން ވަގުތު ލިބުން ކަމަށެވެ.

މާޓިނެޒް ބުނިގޮތުން އޭނާ އެވަގުތު އޭނާގެ ފުރާނައަށް ވެދާނެ ގެއްލުމަކަށް ނުބަލައެވެ. ނަމަވެސް ފޮޓޯ ނެގުމުގެ ސަބަބުން ހާލަތު އިތުރަށް ގޯސް ވެދާނެތީ ހާސްވި ކަމަށް އޭނާ ބުންޏެވެ.

އެ ވަގުތު އެތަނުގައި ހުރި އެހެން ފޮޓޯގްރަފަރެއް ކަމަށްވާ ޗެރީ ޑިއު-ނާލިއޯ ގެ މޫނަށް ވަޒަނެއް އެރި ކަމަށްވެއެވެ. މާޓިނެޒް ބުނި ޗެރީއަކީ ވަރަށް ކުރީއްސުރެން އޭނާ ދަންނަ ފަރާތެއް ކަމަށެވެ. ޗެރީގެ މޫނަށް އެރި ވަޒަނުގެ ސަބަބުން ޒަހަމްވި ތަނުގައި ބެންޑޭޖެއް އަޅާދިނީވެސް މާޓިނެޒްއެވެ.