ކުރުދިސްތާންގެ ޕާލަމެންޓް ތެރެއަށް ބަޔަކު ވަދެގެންފި

އިރާގުގެ ކުރުދިސްތާނުގެ ޕާލަމެންޓް އިމާރާތަށް ބަޔަކު ވަދެގެންފިއެވެ. ވެރިރަށް އަރްބީލްގައި ހުންނަ ކުރުދިސްތާނު ސަރަހައްދީ ޕާލަމެންޓް އިމާރާތަށް ބަޔަކު މި ވަދެގަތީ، ކުރުދިސްތާނުގެ ރައީސްކަމުގައި މިހާރު ހުންނެވި މަސްއޫދު ބަރްޒާނީ ވެރިކަމުގައި ހުންނަވަން ދެން ބޭނުންފުޅު ނުވާކަމަށް އިޢުލާން ކުރެއްވުމާ ގުޅިގެން އެކަމުގެ ރުޅީގައި ކަމަށް ޚަބަރު ފަތުރާ ވަސީލަތްތަކުން ވަނީ ބުނެފައެވެ. ވަދެ ގަތް ބައެއް މީހުން ވަނީ ގޮލްފްކުޅެން ބޭނުންކުރާ ދަނޑިއާވެސް އެކުގައެވެ. އޭގެ ފަހުން އެހިސާބުން ބަޑީގެ އަޑުފަށްގަނޑުވެސް އިވުނު ކަމަށް ޚަބަރުތައް ބުނެއެވެ. ޕާލަމެންޓަށް ވަދެގަތް މީހުންނަކީ ޕެޝްމާގާ ހަނގުރާމަވެރިން ކަމަށް އެމީހުން އަމިއްލައަށް ވަނީ ބުނެފައެވެ. ކުރުދިސްތާނު ޕާލަމެންޓް އިމާރާތަށް ބަޔަކު ވަދެގަތުމާއި ގުޅިގެން އެއްވެސް ހަމަނުޖެހުމެއް ނުވަތަ ކުރިމަތިލުމެއް ހިނގިކަމެއް މިހާތަނަކަށް ސާފެއް ނުވެއެވެ. ކުރުދިސްތާނުގެ ރައީސް މަސްއޫދު ބަރްޒާނީ، ސަރަހައްދީ ޕާލަމެންޓަށް މިއަދު ފޮނުއްވި ސިޓީއެއްގައި ވިދާޅުވެފައިވަނީ، މިފެށޭ ނޮވެމްބަރު މަހުގެ 1 ވަނަ ދުވަހުން ފެށިގެން ރައީސްކަމުގެ ޒިންމާ އޭނާ ދޫކޮށްލައްވާނޭ ކަމަށެވެ.