ނިއު ޔޯކް މެރަތަން ކާމިޔާބުކޮށް ފްލަނަގަން ތާރީހުގެ ތެރެއަށް

އެމެރިކާގެ ނިއު ޔޯކް ސިޓީ މެރަތަން ކާމިޔާބުކޮށް ޝެލާން ފްލަނަގަން ތާރީހުން ޖާގަ ހޯދައިފިއެވެ.

މި މެރަތަން ކާމިޔާބުކުރުމާ އެކު ފްލަނަގަން ވެގެންގޮސްފައި ވަނީ ވޭތުވެދިޔަ 40 އަހަރު ތެރޭ މި މެރަތަން ކާމިޔާބުކުރި އެމެރިކާގެ ފުރަތަމަ އަންހެން ދުވުންތެރިޔާއަށެވެ. އުމުރުން 36 އަހަރުގެ ފްލަނަގަން މި މެރަތަން ނިންމާފައި ވަނީ ދެ ގަޑިއިރާ 26 މިނެޓުންނެވެ. މިދިޔަ ތިން އަހަރު މި މެރަތަން ކާމިޔާބުކުރި ކެންޔާގެ މެރީ ކެއިޓަނީ ދެވަނައިގައި އޮވެގެން މެރަތަން ނިންމާފައި ވަނީ ފްލަނަގަންއަށް ވުރެ އެއް މިނެޓު ލަހުންނެވެ. ފްލަނަގަން ވަނީ 2010 ވަނަ އަހަރުގެ މެރަތަންއިން ދެވަނަ ހޯދިފަހުން އަނިޔާގެ ސަބަބުން އޭނާ އޭގެ ފަހުން މި މެރަތަންގައި ބައިވެރި ވެފައެއް ނުވެއެވެ. މިއީ ފްލަނަގަންގެ ކެރިއަރުގައި އޭނާ ކާމިޔާބުކުރި އެންމެ ބޮޑު މެރަތަންއެވެ.

މި މަހުގެ ފުރަތަމަ ދުވަހު ނިއު ޔޯކުގައި ޓްރަކެއް ބޭނުންކޮށްގެން ދިން ޓެރަރިސްޓް ހަމަލާޔާ ގުޅިގެން ވަރަށް ބޮޑަށް ސަލާމަތީ ކަންކަން ވަރުގަދަކޮށްގެން ކުރިޔަށް ގެންދިޔަ މި މެރަތަންގައި 125 ގައުމަކުން 50,000 ދުވުންތެރިން ބައިވެރިވެފައި ވެއެވެ. މީގެ ކުރިން އެމެރިކާގެ ދުވުންތެރިޔަކު މި މެރަތަން ކާމިޔާބު ކޮށްފައި ވަނީ 1977 ވަނަ އަހަރުއެވެ. އެފަހަރު މި މެރަތަން ކާމިޔާބުކުރީ މިކީ ގޯމަންއެވެ.

މި މެރަތަންގެ ފިރިހެން އިވެންޓުގައި ކެންޔާގެ ޖޮފްރީ ކަމްވޯރޯ ވަނީ އޭނާގެ އަމިއްލަ ގައުމުގެ ވިލްސަން ކިޕްސެން ބަލިކުރުމަށް ފަހު ފުރަތަމަ ފަހަރަށް މި މެރަތަންއިން އެއްވަނަ ހޯދާފައެވެ. ޖޮފްރީ މެރަތަން ނިންމާފައިވަނީ ދެ ގަޑިއިރާ 10 މިނެޓުންނެވެ.

ހަމައެހެންމެ ފިރިހެނުންގެ ވީލްޗެއާ އިވެންޓުގައި ސްވިޓްޒަލޭންޑުގެ މާސެލް ހަގް އެއްވަނަ ހޯދިއިރު އަންހެނުންގެ ވީލްޗެއާ އިވެންޓުން އެއްވަނަ ހޯދީ ހަމަ އެ ގައުމުގެ މެނުއޭލާ ޝާރ އެވެ. ހަގް ވަނީ މިއަހަރު ބޭއްވި ބޯސްޓަން މެރަތަންއާ ޗިކާގޯ މެރަތަން ވެސް ކާމިޔާބު ކޮށްފައެވެ. މިއި ނިއު ޔޯކް މެރަތަންގެ ތާރީހުގައި ވެސް އެއް ގައުމަކަށް ނިސްބަތްވާ ދެ އެތުލީޓަކު ވީލް ޗެއާ އިވެންޓްތައް ކާމިޔާބުކުރި ފުރަތަމަ ފަހަރެވެ.

ނިއު ޔޯކް ރޯޑް ރަނާސްއިން 1970 ވަނަ އަހަރުން ފެށިގެން ބާއްވަމުން އަންނަ މި މެރަތަންގެ ދިގު މިނަކީ 42 ކިލޯމީޓަރަށް ވާއިރު މި މެރަތަންއަކީ ދުނިޔޭގައި ބާއްވާ އެންމެ ބޮޑު މެރަތަންއެވެ.