ޕާކިސްތާނަށް އައި ބިންހެލުމުގައި މަރުވި މީހުންގެ އަދަދު 38 އަކަށް އަރައިފިއެވެ.
އަންގާރަ ދުވަހު ޕާކިސްތާންގެ ކަޝްމީރަށާއި ޕަންޖާބު ޕްރޮވިންސްތަކަށް 5.8 މެގްނިޓިއުޑްގެ ބާރު މިނުގައި އައި ބިން ހެލުމުގައި މަރުވި މީހުންގެ އަދަދު މައްޗަށް އަރައިފާ ވާއިރު ބިންހެލުމުގައި ގިނަ އަދަދެއްގެ ގެދޮރަށާއި އިމާރާތް ތަކަށް ވަނީ ގެއްލުން ލިބިފައެވެ. ބިންހެލުމުގެ އަސަރު ކޮށްފައިވާ ސަރަހައްދު ތަކުގެ ބިން ގަނޑު ވަނީ ވަރަށް ބޮޑަށް ފަޅައިގެން ގޮސްފައެވެ.
ބިންހެލުން އައުމާއި އެކު ޕާކިސްތާންގެ ހޮސްޕިޓަލް ތައް އެމެޖެންސީ ހާލަތަށް ގެނަސްފައި ވާއިރު، ބިންހެލުމުގައި އަނިޔާވި މީހުންގެ އަދަދު ވަނީ 700 އަށް އަރާފައެވެ.
ބިންހެލުމުގައި ލިބުނު ގެއްލުން ތައް ތަފާސްހިސާބު ކުރަމުންދާ ކަމަށާއި އަނިޔާވި މީހުންނާއި މަރުވި މީހުންގެ އަދަދު އިތުރުވެދާނެ ކަމަށް ޕާކިސްތާންގެ ސަރުކާރުން ބުނެފައިވެއެވެ.
މި ބިންހެލުމުގެ އަސަރު އެންމެ ބޮޑަށް ކޮށްފައި ވަނީ މިރްޕޫރް އަށެވެ. ބިންހެލުމާއިއެކު ބޮޑު ސަރަހައްދަކުން ވަނީ ކަރަންޓު ގޮސްފައެވެ.
ރިލީފް ގްރޫޕްތަކުން ދަނީ ބިންހެލުމުގައި ގެއްލުން ލިބުނު އާއިލާތަކަށް ފެނާއި ކާބޯތަކެއްޗާއި ބޭސް އަދި ޓެންޓް ފޯރުކޮށްދެމުންނެވެ.
