ފްލެޓް ކޮމިޓީއިން މުއިއްޒު ވެސް އިސްތިއުފާ ދެއްވައިފި
17 ސެޕްޓެމްބަރު 2019 | އަންގާރަ 05:12މުއިއްޒު މީގެ ކުޑަ ދުވަސްކޮޅެއް ކުރިން ފްލެޓް ކޮމިޓީން ވަނީ އިސްތިއުފާ ދެއްވާފައި
ރައީސް އުފެއްދެވި ފްލެޓް މައްސަލަ ބަލާ ކޮމިޓީ.އެ ކޮމިޓީން ތޮލާލް އަދި މުއިއްޒު ވަނީ އިސްތިއުފާ ދެއްވާފައި
ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހް އުފައްދަވާފައިވާ "ފްލެޓްތަކުގެ މައްސަލަބަލާ ކޮމިޓީ" އިން މުހައްމަދު މުއިއްޒު އަދުނާނު ވެސް އިސްތިއުފާ ދެއްވައިފިއެވެ.
މުއިއްޒު އޭނާގެ ފޭސްބުކްގައި ހޯމަ ދުވަހު ވިދާޅުވެފައިވަނީ އޭނާ މީގެ ކުރިން އިސްތިއުފާ ދެއްވާފައިވާ ކަމަށެވެ. މުއިއްޒު ވިދާޅުވީ ބައެއް ނޫސްތަކުގައި ފްލެޓް ކޮމިޓީގައި އޭނާ ހިމެނޭ ކަމަށް ބަޔާން ކުރަމުންދާތީ އޭނާ މީގެ ކުޑަ ދުވަސްކޮޅެއް ކުރިން އިސްތިއުފާ ދެއްވާފައިވާ ކަމަށެވެ. އަދި އޭނާގެ އިސްތިއުފާ ގަބޫލު ކުރައްވާފައިވާ ކަމަށް ވިދާޅުވިއެވެ.
ފްލެޓް ކޮމިޓީގެ މެމްބަރު ކަމުން އަޙްމަދު ތޮލާލް ވެސް ވަނީ އިސްތިއުފާ ދެއްވާފައެވެ. ތޮލާލް ވިދާޅުވީ އޭނާ އެކޮމިޓީގެ މެމްބަރު ކަމުން އިސްތިއުފާ ދެއްވީ ކޮމެޓީގެ މަސައްކަތްތަކަށް އެކަށީގެންވާ ވަގުތު ނުދެއްވޭތީ ވަގުތު ދެއްވޭނެ ބޭފުޅަކަށް ފުރުސަތު ދެއްވުމަށް ކަމަށެވެ.
"ހިޔާ" މަޝްރޫ އާއި "ގެދޮރުވެރިކުރުން" އަދި "ގުޅީފަޅު ހައުސިންގ ޕްރޮޖެކްޓް" ކުރިއަށް ގެންގޮސްފައިވާ ގޮތާއި ފްލެޓްތައް ދޫކޮށްފައިވާ ގޮތް ރިވިއުކޮށް، އިންސާފުވެރި ދެފުށް ފެންނަ ގޮތަށް ފްލެޓް ލިބުން ހައްގުވާ ފަރާތްތަކަށް، ފްލެޓް ލިބޭނޭ ގޮތް ހެދުމަށް "ފްލެޓްތަކުގެ މައްސަލަބަލާ ކޮމިޓީ"ގެ ނަމުގައި ފަސް މެމްބަރުންގެ މައްޗަށް އެކުލެވޭ ކޮމިޓީއެއް އެކުލަވާލާފައި ވަނީ މިދިޔަ އަހަރުގެ ޑިސެމްބަރު މަހުގެ 31 ވަނަ ދުވަހުއެވެ.
ރައީސް ޔާމީންގެ ސަރުކާރުގެ ދުވަސްވަރު ޝަރުތު ހަމަނުވާ ގިނަ ބަޔަކަށް ފްލެޓް ދީފައިވާކަން ވަނީ ހަމާވެފައެވެ. ފްލެޓްތައް ދިނުމުގައި އިސްކަން ދީފައި ވަނީ ސަރުކާރުގެ އިސްވެރިންނާއި ޕީޕީއެމްއަށް ނިސްބަތްވާ މީހުންނަށެވެ.
ތޮލާލް އިސްތިއުފާ ދެއްވުމުން އޭނާގެ ބަދަލުގައި އެމަގާމަށް މިހާރު ވަނީ ގާނޫނީ ވަކީލް ތޯހާ މުހައްމަދު އައްޔަން ކުރައްވައިފައެވެ.
ރައީސް އުފެއްދެވި ފްލެޓް ބަލާ ކޮމިޓީގައި މިހާރު ތިއްބަވަނީ ތޯހާގެ އިތުރުން ޝީރީން ނާހިދާ ލަތީފު، ފާތިމަތު ރަޝީދާ، އަލީ ޝުހައިލް މުހައްމަދެވެ.
ފްލެޓްތަކުގެ މައްސަލަ ބެލުމަށް ރައީސް ކޮމިޓީއެއް އުފައްދާފައިވަނީ މިދިޔަ ޑިސެމްބަރު މަހުގެ 31 ވަނަ ދުވަހުއެވެ. ފްލެޓް މައްސަލަ ބަލާ ކޮމިޓީން ބަލަން ހަވާލު ކޮށްފައިވަނީ "ގެދޮރުވެރިކުރުވުމުގެ މަޝްރޫއު" ގެ ނަމުގައި ހިންގި މަޝްރޫ އާއި ގުޅިފަޅު މަޝްރޫއު އަދި ހިޔާ މަޝްރޫއެވެ.
އެ ކޮމެޓީއިން އަންނަނީ ހިޔާ މަޝްރޫއަށް ހުށައަޅާފައިވާ 22,000 ފޯމް ދިރާސާ ކުރަމުންނެވެ. އެ ފޯމްތައް ދިރާސާކޮށް ނިންމުމަށް ފަސް މަސްވަރު ނަގާނެ ކަމަށް ފެބްރުއަރީ މަހުގެ ތެރޭގައި އެކޮމިޓީއިން ބުނި ނަމަވެސް އެކަން މިހާތަނަށް ނިންމައި ހާމަ ކޮށްފައެއް ނުވެއެވެ. ކޮމިޓީގެ މަސައްކަތް ލަސްވުމުގެ ސަބަބުން އެކަމުގައި އާންމުންގެ ޝަކުވާ ބޮޑެވެ.
