ޖަރުމަންގެ މިޑްފިލްޑަރ ޓޯނީ ކްރޫޒް ދިނުމަށްފަހު ރެއާލް މެޑްރިޑުން މެންޗެސްޓަރ ޔުނައިޓެޑަށް ކުޅެމުން އަންނަ ޕައުލް ޕޮގްބާ ހޯދަން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.
ސްޕޯޓް ބިލްޑުން ބުނީ، ރެއާލުން ޕޮގްބާ ހޯދަން ބޭނުންވާ ކަމަށާއި، އެގޮތުން ކްރޫޒް ދިނުމަށްފަހުވެސް ޕޮގްބާ ހޯދަން އެ ކްލަބުން ބޭނުންވާ ކަމަށެވެ.
ނިމިދިޔަ ޓްރާންސްފަރ ބާޒާރުގައި ޕޮގްބާ ހޯދުމަށް ގިނަ ކްލަބްތަކުން ވަނީ މަސައްކަތް ކޮށްފައެވެ. ނަމަވެސް އެއްވެސް ކްލަބަކަށް ޔުނައިޓެޑާއެކު އެއްބަސްވުމަކަށް އާދެވިފައެއް ނުވެއެވެ.
ޔުނައިޓެޑާ އެކު ޕޮގްބާ ހަދާފައިވާ އެއްބަސްވުން 2021 ވަނަ އަހަރު ހަމަވާ އިރު، އޭނާ އަށް މިހާރު ލިބެނީ ހަފްތާ އަކު 290،000 ޕައުންޑެވެ.
ޔުނައިޓެޑުން 2010 ވަނަ އަހަރު ކެރިޔަރު ފެށި އުމުރުން 26 އަހަރުގެ ޕޮގްބާ ވަނީ މިހާތަނަށް އެ ޓީމަށް ކުޅުނު 139 މެޗުގައި 31 ލަނޑު ކާމިޔާބު ކޮށްފައެވެ. އޭނާ ވަނީ އެ ޓީމާ އެކު ލީގް ކަޕް އަދި ޔޫރޮޕާ ލީގު ވެސް ކާމިޔާބު ކޮށްފައެވެ.
ފްރާންސާ އެކު 2013 ވަނަ އަހަރު 20 އަހަރުން ދަށުގެ ވޯލްޑްކަޕް އަދި މިދިޔަ އަހަރު ރަޝިއާގައި ބޭއްވި ވޯލްޑް ކަޕް ކާމިޔާބު ކޮށްފައިވާ ޕޮގްބާ ވަނީ ސީނިއާ ޓީމުގައި ހިމެނި 69 މެޗު ކުޅެ 10 ލަނޑު ކާމިޔާބު ކޮށްފައެވެ.
