ޓުރާން ހޯދުމަށް ޗައިނާގެ ކްލަބަކުން 100 މިލކިއަން ޔޫރޯ ހުށަހަޅައިފި

ބާސާ އަށް ކުޅެމުން އަންނަ ތުރުކީގެ މިޑްފިލްޑަރު އަރްދާ ޓުރާން ހޯދުމަށް ޗައިނާ ސުޕާ ލީގުގެ ކްލަބަކުން މަސައްކަތްކުރަމުން އަންނަ ކަމަށް ރިޕޯޓްތައް ބުނެފި އެވެ.

ބެއިން ސްޕޯޓްސް ތުރުކީ އިން ބުނީ ޓުރާން ހޯދުމަށް ޗައިނާ ކްލަބަކުން މަސައްކަތްކުރަމުން އަންނަ ކަމަށާއި، އެގޮތުން ހަތަރު އަހަރު ދުވުހުގެ އެއްބަސްވުމެއްގެ ދަށުން އޭނާ ހޯދުމަށް 100 މިލިއަން ޔޫރޯ އެ ކްލަބުން ހުށަހަޅާފައިވާ ކަމަށެވެ.

މީގެއިތުރުން އޭނާ ކުރިޔަށް އޮތް ދުވަސްތަކުގައި އެއްބަސްވުމާބެހޭ ގޮތުން ވާހަކަ ދެއްކުމަށް ޗައިނާ އަށް ދާނެ ކަމަށާއި، ވަރަށް އަވަހަށް ގޮތެއް ނިންމާނެ ކަމަށްވެސް ރިޕޯޓްތައް އަންނަނީ ބުނަމުންނެވެ.

ތުރުކީގެ ގަލަސަތަރާއި އިން ކެރިޔަރު ފެށި ޓުރާން ވަނީ އެ ކްލަބަށް ހަ ސީޒަން ކުޅެ ގިނަ ކާމިޔާބީތަކެއް ހޯދާފައެވެ. އެގޮތުން އޭނާ ވަނީ އެ ކްލަބާއެކު ތުރުކީ ލީގް، ތުރުކީ ކަޕް އަދި ތުރުކީ ސުޕާކަޕް ކާމިޔާބުކޮށްފައެވެ.

އެއަށްފަހު ދެން އޭނާ ބަދަލުވީ 2011 ވަނަ އަހަރު އެޓްލެޓިކޯ މެޑްރިޑަށެވެ. އޭނާ ވަނީ އެ ކްލަބުގައިވެސް ހަތަރު ސީޒަން ހޭދަކޮށް އެޓީމާއެކު ސްޕެނިޝް ލީގު، ކޮޕާޑެލްރޭ، ސްޕެނިޝް ސުޕާކަޕް، ޔުއެފާ ސުޕާކަޕް އަދި ޔުއެފާ ޔޫރޮޕާ ލީގުވެސް ކާމިޔާބުކޮށްފަ އެވެ.

އެޓްލެޓިކޯ ދޫކޮށްލުމަށްފަހު ޓުރާން ބާސާ އަށް ބަދަލުވީ 2015 ވަނަ އަހަރެވެ. އޭނާ ވަނީ އެ ކްލަބަށް މިވީތަނަށް ކުޅުނު 50 މެޗުގައި 15 ލަނޑު ކާމިޔާބުކޮށްފައެވެ. ތުރުކީ ގައުމީ ޓީމާއެކު ޔޫރޯ 2008 ގެ ތިންވަނަ ހޯދި ޓުރާން ވަނީ ބާސާއާއެކު ސްޕެނިޝް ލަލީގާ، ކޮޕާޑެލްރޭ އަދި ސްޕެނިޝް ސުޕާކަޕްވެސް ކާމިޔާބުކޮށްފައެވެ.