ހޮލިޑޭއިން ރިސޯޓު ކަނޑޫމާގައި، ފަސް ޓީމާއިއެކު މިނީ އޮލިމްޕިކްސް 2019 ފަށައިފިއެވެ.

މިއީ މި މުބާރާތް ކަނޑޫމާއިން ބާއްވާ 11 ވަނަ ފަހަރެވެ.

މި މުބާރާތް ފައްޓަވައިދެއްވަމުން މިނިސްޓަރ މަހުލޫފް ވިދާޅުވީ ރިސޯޓަކުން އިސްނަގައިގެން މިފަދަ މުބާރާތެއް ބޭވުމުން އެކަމާ އުފާ ކުރައްވާ ކަމަށެވެ. އަދި މިނިސްޓަރ ވަނީ ރިސޯޓުތަކުގައި ކުޅިވަރު ކުޅޭ ކުޅުންތެރިން ކުޅިވަރު ސީރިއަސްކޮން ނެގުމަށް ނަސޭހަތް ތެރިވެފައެވެ.

މީގެ އިތުރުން މިނިސްޓަރ ވިދާޅުވީ ގައުމީ ވޮލީ ޓީމަށް ބަލައިލި ކަމުގައި ވިޔަސް ގިނައިން ފެންނަނީ ރިސޯޓު މުވައްޒަފުން ކަމަށާއި އެހެންކަމުން ރިސޯޓުގައި ތިބެގެން ވެސް ކުޅިވަރުގައި އެންމެ މަތީ ފަންތީގައި ކުޅެވޭނެ ކަން ހާމަވާ ކަމަށެވެ.

ކަނޑޫމާ ރިސޯޓުގެ އެގްޒެކެޓިވް އެސިސްޓެންޓް މެނޭޖަރ ހުސެއިން ޝާހިދް ބުނީ މި މުބާރާތުގައި ގާތް ގަނޑަކަށް ކަނޑޫމާގެ ހުރިހާ ސްޓާފުން ބައިވެރިވާ ކަމަށާއި މިފަދަ މުބާރާތެއް މުވައްޒަފުންނާއި ނުލާ ނުބޭއްވޭނެ ކަމަށެވެ. މީގެ އިތުރުން އޭނާ ބުނީ މުވައްޒަފުން މަސައްކަތް އެކަނި ކޮށްގެން އުޅެވެން ނެތް ކަމަށާއި މަސައްކަތުގެ އިތުރުން މުވައްޒަފުން ކުޅިވަރު ވެސް ކުޅެން ޖެހޭނެ ކަމަށެވެ.

މި މުބާރާތް ކުރިޔަށްދާނީ ތިން ކެޓަގަރީ އަކަށް ބަހައިލައިގެންނެވެ. އެގޮތުން ޓީމް އިވެންޓް ކެޓަގަރީގައި 12 ކުޅިވަރެއް ހިމެނޭއިރު އިންޑިވިޖުއަލް އިވެންޓުގައި 7 ކުޅިވަރެއް ހިމެނޭނެއެވެ. މީގެ އިތުރުން ފަން ގޭމްސް އިވެންޓުގައި 6 ކުޅިވަރެއް ހިމެނެއެވެ.

މި މުބާރާތް ކުރިޔަށްދާނީ އޮގަސްޓު މަހު 15 އިން 28ގެ ނިޔަލަށެވެ.