އީޔޫ ކޮމިޝަން ގެ ނައިބް ރައީސް ބުރާސްފަތި ދުވަހު މަޖިލީހުގައި ތަގުރީރު ކުރައްވަނީ
6 އޯގަސްޓު 2019 | އަންގާރަ 06:21ތަގްރީރް ކުރުމަށް ބާއްވާ ބައްދަލުވުން ކުރިއަށް ދާނީ މަޖިލިސް ޖަލްސާއެއްގެ ގޮތަށް ނޫން
ފެޑްރިކާ މޯގްރެނީ ފޮރިން މިނިސްޓަރ އަބްދުﷲ ޝާހިދާއި ސަލާމް ކުރައްވަނީ
ޔޫރަޕް އިއްތިހާދުގެ ހައިރެޕްރެޒެންޓޭޓިވް އޮފް ދަ ޔޫނިއަން ފޯރ ފޮރިން އެފެއާރޒް އެންޑް ސެކިއުރިޓީ ޕޮލިސީ އަދި ވައިޒް ޕްރެޒިޑެންޓް އޮފް ދަ ކޮމިޝަން ފެޑްރިކާ މޯގްރެނީ ރައްޔިތުންގެ މަޖިލީހުގައި ބުރާސްފަތިދުވަހު ތަގުރީރު ކުރައްވާ ގޮތަށް ހަމަޖެހިއްޖެއެވެ.
މަޖިލީހުގެ ރައީސް މުހައްމަދު ނަޝީދު ވިދާޅުވީ ފެޑްރިކާ މަޖިލީހުގައި ތަގުރީރު ކުރެއްވުމަށް ދައުވަތު އަރުވާފައިވާ ކަމަށާއި، އެބައްދަލުވުން އޮންނާނީ މަޖިލިސް ޖަލްސާއެއްގެ ގޮތަށް ނޫން ކަމަށެވެ. އެމަނިކުފާނު ވިދާޅުވީ ނިމިދިޔަ ރިޔާސީ އިންތިޙާބު އިންސާފުވެރިކޮށް ދިޔުމުގައި އެންމެ ބޮޑު ދައުރެއް އަދާކޮށްދެއްވި އެއް ބޭފުޅަކީ ފެޑްރިކާ ކަމަށެވެ. ފެޑްރީކާ ތަގުރީރުކުރައްވާ ބައްދަލުކުރެއްވުން އޮންނާނީ ބުރާސްފަތިދުވަހު މެންދުރު މަޖިލީހުގެ އިދާރާގައެވެ.
ރައީސް ނަޝީދު ވިދާޅުވީ ފެޑްރިކާ މަޖިލީހުގައި ތަގުރީރު ކުރައްވާ، ބައްދަލުވުމަށް ރާއްޖޭގައި މަސައްކަތް ކުރައްވާ ޑިޕްލޮމެޓުންނާއި، ޔޫރަޕްގެ އިއްތިހާދުގެ އެކިއެކި ވިޔަފާރިތަކުގައި އިސްކޮށް މަސައްކަތް ކުރައްވާ ބޭފުޅުންނާއި، ރިޒޯރޓް ފަހަރުގެ ވިޔަފާރީގައި އުޅުއްވާ ބޭފުޅުންގެ އިތުރުން ކަމާއި ގުޅޭ އެހެން ބޭފުޅުންނަށް ދައުވަތު އަރުވަން ނިންމާފައިވާ ކަމަށެވެ.
ފެޑްރިކާއަކީ އިޓަލީގެ ގިނަ މަގާމްތަކެއް ފުރުއްވާފައިވާ ބޭފުޅެކެއެވެ. އެކަމަނާ އަދާކޮށްފައިވާ މަގާމްތަކުގެ ތެރޭގައި އިޓަލީގެ ކުރީގެ ފޮރިން މިނިސްޓަރު ކަމާއި، ނޭޓޯގެ އިޓަލީގެ ލީޑަރުކަމާއި އެ ގައުމުގެ ރައްޔިތުންގެ މަޖިލީހުގެ މެމްބަރުކަމާއި، އީޔޫގެ ކައުންސިލްގެ މެމްބަރުކަމުގެ އިތުރުން އެ ގައުމުގެ ފޮރިން އެފެއާރޒްގެ ގިނަ މަގާމްތަކެއް ހިމެނެއެވެ.
ފެޑްރިކާ އަކީ މިހާރުވެސް ޔޫރަޕް އިއްތިހާދުގެ ޚާރިޖީގުޅުންތައް އަދި ސަލާމަތީ ކަންކަމުގެ އެންމެހާ ކަންކަން ބަލަހައްޓަވަމުން އަންނަ އެންމެ އިސް ބޭފުޅާއެވެ. ޖޫން މަހުގެ 28 ވަނަ ދުވަހު ފޮރިން މިނިސްޓަރު އަބްދުﷲ ޝާހިދާއި ފެޑްރިކާ ވަނީ ބައްދަލުކުރައްވާފައެވެ. މި ބައްދަލުކުރެއްވުން އޮތީ ބެލްޖިއަމްގެ ބްރޫސަލްގައެވެ.
އެ ބައްދަލުކުރެއްވުމުގައި ފެޑްރިކާ ވަނީ ރާއްޖެއިން ޑިމޮކްރެސީ ހަރުދާނަ ކުރުމަށާއި، ގުޑް ގަވަރނަންސްގެ އުސޫލު ދަމަހައްޓަން ކުރަމުންދާ މަސައްކަތަށް މަރުހާބަ ދަންނަވާފައެވެ. އެބައްދަލުވުމުގައި ދެ ބޭފުޅުން ވަނީ އިޔޫއާ ރާއްޖެއާ ދެމެދު އިތުރަށް ގުޅުން ބަދަހިކުރެވިދާނެ ދާއިރާތަކުން މަޝްވަރާކޮށްފައެވެ. އެގޮތުން މަތީ ފަންތީގެ ބޭފުޅުންގެ މެދުގައި ކޮންމެ އަހަރަކުވެސް ބައްދަލުވުން ތަކެއްް ބޭއްވުމަށް ފެޑްރިކާ ހުށައެޅި ހުށައެޅުއްވުމަށް ޝާހިދު ވަނީ އިޖާބަދެއްވާފައެވެ.
މި ބައްދަލުކުރެއްވުމުގައި މުސޫމަށް އަންނަ ބަދަލުތަކާއި، ތިމާވެއްޓަށް ދިމާވާ މައްސަލަތައް ހައްލު ކުރުމަށް އީޔޫ އާއި ރާއްޖެއާ ދެމެދު ކުރެވިދާނެ ކަންތައްތަކުގެ އިތުރުން ކައުންޓަރ ޓެރަރިޒަމާއި، ސެކިއުރިޓީ ރިފޯމްގެ ދާއިރާ އިން ދެ ބޭފުޅުން ވަނީ ފުޅާދާއިރާއެއްގައި މަޝްވަރާތަކެއް ކޮށްފައެވެ. މިއީ ފެޑްރިކާ ރާއްޖެއަށް ކުރައްވާ ފުރަތަމަ ޒިޔާރަތެއެވެ.
